تۇركى الەمى: جاس بۋىن ءۇنى

ءىس-شاراعا تۇركى مەملەكەتتەرى ۇيى­مى­نا مۇشە ازەربايجان, قىرعىزستان, تۇركيا, وزبەكستان ەلدەرىنەن دەلەگاتتار كەلدى. فەستيۆال اياسىندا جاس­تار سايا­ساتى, كاسىپكەرلىك, ازاماتتىق بەل­سەن­دىلىك جانە الەۋمەتتىك باستامالاردى دامىتۋ باعىتتارىندا سەمينالار ۇيىم­داستىرىلىپ, جاس كوشباسشىلار مەن كاسىپكەر­لەر وي-پىكىرىن ورتاعا سالدى. جيىننىڭ رەسمي اشىلۋى بارىسىندا الماتى قالاسىنا «2025 جىلعى تۇركى الەمىنىڭ جاستار استاناسى» مارتەبەسى بەرىلدى.

سالتاناتتى جيىندى اشقان مادەنيەت جانە اقپارات ءمينيسترى ايدا بالاەۆا مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.

«الماتى – ازاتتىعىمىزدىڭ التىن بەسىگى, جاسامپاز جاستاردىڭ قۇتتى مەكەنى. وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كوپتەگەن ۇلى تۇلعالارىمىز وسى قالادا ءوسىپ-ونگەن. شىن مانىندە, ءتول مادەنيەتىمىزدىڭ تەمىرقازىعىنا اينالعان شەجىرەلى شاھار قازاق ەلىنىڭ عانا ەمەس, تۇركى مەملەكەتتەرىنىڭ دە رۋحاني ورداسى سانالادى. بۇگىن اسقارالى الاتاۋدىڭ باۋرايىندا ءتۇبى ءبىر تۇركى جۇرتىنىڭ ءبىلىمپاز, دارىندى ءارى بەلسەندى جاستارى باس قوسىپ وتىر. ىرگەلى ءىس-شارا اياسىندا جاڭا دوستار تاۋىپ, تىڭ يدەيا­لار مەن جوبالاردى جۇزەگە اسىراسىزدار دەپ سەنەمىن. ورەندەرىمىزدىڭ بىرلىگى بەكەم بولسا, تۇركى الەمىنىڭ تۇعىرى مىعىم, بولاشاعى جارقىن بولارى ءسوزسىز. قازاقستان باۋىر­لاس حالىقتاردىڭ يگى باستامالارىنا ۇنەمى قولداۋ كورسەتىپ كەلەدى. ءبىز ەلدەرىمىزدىڭ اراسىندا جان-جاقتى ىقپالداستىقتى نىعايتۋعا ايرىقشا ءمان بەرە­مىز. استانادا دۇنيەجۇزىلىك كوش­پەندىلەر ويىندارىنىڭ ءوتۋى, اقتاۋدىڭ تۇركى الەمىنىڭ مادەني استاناسى جانە الماتى­نىڭ تۇركى جاستارىنىڭ استاناسى اتانۋى – سونىڭ ايقىن دالە­لى», دەلىنگەن مەملەكەت باسشى­سىنىڭ قۇتتىقتاۋ حاتىندا.

ءىس-شارا بارىسىندا الماتىعا رەسمي تۇردە «2025 جىلى – تۇركى الەمىنىڭ جاستار استاناسى» مار­تەبەسى بەرىلدى. بۇل جاستار ساياساتىن دامى­تۋ­داعى قالانىڭ بەلسەندى ءرولىن ايقىنداپ, تۇركى دۇنيەسى ەلدەرى اراسىنداعى ىنتى­ماق­تاس­تىق­تى نىعايتۋدىڭ جاڭا كەزەڭىنە جول اشتى. بۇعان دەيىن بۇل مارتەبە ازەربايجاننىڭ لەنكوران قالاسىنا بەرىلگەن ەدى.

ءوز سوزىندە مينيستر ايدا بالاەۆا الما­تىنىڭ مادەنيەت پەن عىلىمنىڭ, ءبىلىم مەن ين­نوۆاتسيانىڭ توعىسقان ورتالىعى ەكەنىن اتاپ ءوتتى. ونىڭ ايتۋىنشا, قالا بۇگىندە تۇركى الەمىنىڭ جاس كوشباسشىلارى مەن شىعار­ما­شىل وكىلدەرى ءۇشىن جاڭا يدەيالار مەن سەرىك­تەس­تىكتىڭ ورداسىنا اينالىپ جاتىر.

سالتاناتتى ءىس-شاراعا ارنايى قاتىسقان تمۇ باس حاتشىسى كۋبانىچبەك ومۋراليەۆ: «بۇگىن ءبىز تۇركى الەمىنىڭ جاستار استاناسى اتاعىن لەنكوران قالاسىنان قارقىندى دامىپ كەلە جاتقان الماتى قالاسىنا تابىستاۋ ءساتىنىڭ كۋاسى بولىپ وتىرمىز. بۇل قادام ورتاق قۇندىلىقتارىمىزدىڭ ساباقتاستىعىن, سونداي-اق بولاشاق تۇركى الەمىن قالىپتاستىرۋداعى جاس­تاردىڭ ءوسىپ كەلە جاتقان ءرولىن ايقىن كورسەتەدى. وزدەرىڭىز بىلەتىندەي, الماتى قالا­سىنا بۇل مارتەبە تۇركى مەملەكەتتەرى ۇيى­مى­نا مۇشە ەلدەردىڭ جاستار جانە سپورت مينيستر­لە­رىنىڭ 8-وتىرىسىنىڭ شەشىمى نەگى­زىندە بەرىلگەن ەدى. قالانىڭ زاماناۋي مادەني ءومىرى, بەلسەندى ءبىلىم بەرۋ مەكەمەلەرى جانە ىن­تالى جاستارى – تۇركى الەمىنىڭ جاڭا بۋىنى­نىڭ رۋحى مەن الەۋەتىنىڭ ايقىن كورىنىسى», دەپ اتاپ ءوتتى.

الماتى قالاسىنىڭ اكىمى دارحان ساتىبالدى قالا جاستارىنىڭ لەبىزىمەن ءبولى­سىپ: «الماتى – تۇركى ەلدەرىنىڭ جاستارى باس قوساتىن, ورتاق مۇراتتار توعىساتىن, مادەنيە­تىمىز بەن ءداس­تۇ­رىمىز جاڭعىراتىن ۇلكەن ورتاعا اينالىپ كەلەدى. بۇل مارتەبە – تەك اتاق ەمەس, بولاشاققا دەگەن ۋادە. تۇركى جاستارىنىڭ دا­ۋىسى وسى الما­تىدان ەستىلىپ, يدەيالارى باستاۋ الىپ, دوس­تىعى وسى شاھاردا بەكىسىن! الماتى – ءبىزدىڭ ورتاق ءۇيىمىز, تۇركى جاس­تارىنىڭ شامشىراعى, بولا­شاقتىڭ ورتا­لى­عى!» دەدى.

ايتا كەتەيىك, حالىقارالىق فەستيۆال مادەنيەت جانە اقپارات مينيسترلىگىنىڭ جانە الماتى قالاسى اكىمدىگىنىڭ قولداۋىمەن سالتانات قۇردى.

اباي الاڭىندا ۇيىمداستىرىلعان ءىس-شارادا الماتى تۇرعىندارى مەن قوناق­تا­رى­نا ەسترادا وكىلدەرى مەن شىعار­ماشىلىق ۇجىم­دار­دىڭ قاتىسۋىمەن كەڭ كولەمدى كونتسەرت ۇسى­نىل­دى. تۇركى مەملەكەتتەرى ۇيى­مى­نا مۇشە ەلدەر – قازاقستان, ازەربايجان, قىرعىزستان, تۇركيا جانە وزبەكستاننان كەلگەن دەلەگاتتار جاستار ساياساتى, كاسىپكەرلىك, ازاماتتىق بەلسەندىلىك جانە الەۋمەتتىك باستامالاردى دامىتۋ تاجىريبەلەرىمەن ءبولىستى. سونداي-اق جاس كوشباسشىلار مەن كاسىپكەرلەردىڭ كەزدەسۋى ءوتتى.

جىل بويى الماتىدا حالىقارالىق جاس­تار كەمپينگى, «Digital Turkic Youth» فورۋمى, «جاي­دارمان fest» فەستيۆالى جانە ەكولوگيا, مادەنيەت پەن جاستار باس­تاما­لا­رىنا ارنالعان باسقا دا جوبا ۇيىم­داستىرىلادى. بۇل ءىس-شارا­لار تۇركى دۇنيەسى جاس­تارىنىڭ بىرلىگى مەن شىعار­ما­شى­لى­عى­نىڭ, جاسامپازدىعىنىڭ ايقىن كورىنىسى بولماق.

الماتى