الماتىدا پوليتسيا ساموكات تىزگىندەۋشىلەرگە ۇندەۋ جاسادى

كەيىنگى ۋاقىتتا ەلەكترلى ساموكاتتى پايدالانۋ كەزىندە زاڭ بۇزۋشىلىقتار جيىلەدى. پوليتسيا بۇل كولىك ءتۇرىن باسقارۋ ەرەكشە جاۋاپكەرشىلىك پەن مۇقياتتىلىقتى تالاپ ەتەتىنىن ەسكەرتەدى.

قولدانۋ ەرەجەلەرىن بۇزۋ جانە ساموكاتتاردى رەتسىز تۇراققا قويۋ جاياۋ جۇرگىنشىلەردىڭ, سونىڭ ىشىندە بالالاردىڭ, ءومىرى مەن دەنساۋلىعىنا قاۋىپ توندىرەدى. وسىعان بايلانىستى پوليتسيا قىزمەتكەرلەرى ءموبيلدى توپتارمەن بىرلەسىپ, قالا كوشەلەرىندە تۇراقتى پاترۋل جۇرگىزىپ جاتىر. 

جاياۋ جۇرگىنشىلەردىڭ نەمەسە كولىك قوزعالىسىنىڭ ەركىن قوزعالۋىنا كەدەرگى كەلتىرەتىن, سونداي-اق ساموكاتتاردى تروتۋارلار مەن جول بويىنا قويۋ دەرەكتەرى انىقتالعان جاعدايدا, قۇقىق بۇزۋشىلار اكىمشىلىك جاۋاپكەرشىلىككە تارتىلادى.

وسى رەتتە پوليتسيا وكىلدەرى اتا-انالارعا دا ارنايى ۇندەۋ جاسايدى: بالالارعا ەلەكترلى ساموكاتتى ايداۋعا رۇقسات بەرمەڭىزدەر. بۇل – ولاردىڭ ءومىرى مەن دەنساۋلىعىنا تونەتىن ۇلكەن قاۋىپ. زاڭ كامەلەتكە تولماعانداردى تيىسىنشە قاداعالاماعانى ءۇشىن اتا-انالارعا دا اكىمشىلىك جاۋاپكەرشىلىكتى قاراستىرادى. 

– ەلەكترلى ساموكاتتى پايدالانۋشىلاردى جول قوزعالىسى ەرەجەلەرىن قاتاڭ ساقتاۋعا, جاياۋ جۇرگىنشىلەرگە قۇرمەتپەن قاراۋعا جانە الماتى كوشەلەرىندە قاۋىپسىزدىكتى قامتاماسىز ەتۋگە شاقىرامىز, - دەدى الماتى قالاسى پد جەرگىلىكتى پوليتسيا قىزمەتى باسقارماسى باستىعىنىڭ ورىنباسارى تيمۋر نوعايباەۆ.