بۇقار جىراۋ اۋدانىنىڭ بوتاقارا كەنتىندەگى اۋداندىق اۋرۋحانا وبلىستىق بيۋدجەت ەسەبىنەن جاڭا مەديتسينالىق قۇرىلعىلارمەن تولىقتى. زاماناۋي تەحنيكا ءتۇرلى اۋرۋلاردى جوعارى دالدىكپەن انىقتاپ, ءتيىمدى ەم جۇرگىزۋگە مۇمكىندىك بەرەدى, دەپ حابارلايدى Egemen.kz.
اۋرۋحاناعا فليۋوروگرافيا فۋنكتسياسى بار ءموبيلدى رەنتگەن اپپاراتى اكەلىندى. بۇرىن تەك ستاتسيونار جاعدايىندا قولدانىلعان ەسكى جابدىقتىڭ ورنىنا كەلگەن بۇل جۇيە ناۋقاستاردى ورنىنان قوزعالتپاي-اق شولۋ جانە فليۋوروگرافيالىق تۇسىرىلىمدەر جاساۋعا مۇمكىندىك بەرەدى.
ۆاكۋمدى سورعىش, ءدارى ەنگىزۋ جۇيەسى, جارىقتاندىرۋ جانە بەينەباقىلاۋ فۋنكتسيالارى بار لور-كومباين ورناتىلدى. ول قۇلاق, تاماق جانە مۇرىن اۋرۋلارىن دياگنوستيكالاۋ مەن ەمدەۋدىڭ ساپاسىن ارتتىردى.
اۋرۋحانا امبەباپ وپەراتسيالىق ۇستەلمەن, جاڭا ناركوز-تىنىس الۋ اپپاراتىمەن جانە پاتسيەنت مونيتورىمەن جابدىقتالدى. مونيتور جۇرەك سوعىسىن, قاننىڭ وتتەگىمەن قانىعۋىن, ارتەريالىق قىسىمدى جانە دەنە تەمپەراتۋراسىن تاۋلىك بويى باقىلاۋعا مۇمكىندىك بەرەدى.
رەانيماتسيا جانە ينتەنسيۆتى تەراپيا بولىمدەرىنە ەرەسەكتەر مەن بالالارعا ارنالعان وكپەنى جاساندى جەلدەتۋ قۇرىلعىسى الىندى.جاڭادان الىنعان بۇل تەحنيكا اۋداندىق اۋرۋحانانىڭ دياگنوستيكالىق جانە ەمدىك مۇمكىندىكتەرىن ايتارلىقتاي كەڭەيتىپ, مەديتسينالىق قىزمەت ساپاسىن جاڭا دەڭگەيگە كوتەردى.