شىعىس قازاقستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ماتەريالىنا سايكەس, وبلىس ورتالىعىنىڭ تۇرعىنى كۇيەۋىنە التى جەردەن, ونىڭ ىشىندە جۇرەگىنە پىشاق سۇعىپ العان, دەپ حابارلايدى Egemen.kz.
وسكەمەندەگى جەكە ۇيلەردىڭ بىرىندە وتباسى داستارقان جايىپ, وتىرىس جاساعان. ەرلى-زايىپتى ىشىمدىك ىشكەن, ال ۇيدە اقىل-ەسى كەم, توسەككە تاڭىلعان ايەلدىڭ اكەسى دە بولعان.
«قارت دەنساۋلىعىنا بايلانىستى ۇنەمى كۇتىمدى قاجەت ەتكەن, بۇل كۇيەۋ بالاسىن قاتتى اشۋلاندىرعان. كۇندىزگى ساعات ەكىلەر شاماسىندا زەينەتكەر توسەكتە جاتىپ ەرىكسىز دارەت سىندىرعان. ەر ادام وعان ايقايلاي باستايدى. قىزى اكەسىنە اراشا تۇسكەن, بىراق كۇيەۋى اگرەسسيا كورسەتكەن», - دەپ جازدى باسىلىم.
جانجال شىعىپ, ايەل اس ۇيگە بارىپ, سول جەردەن پىشاق العان. ول العاشقى سوققىنى كۇيەۋىنىڭ كەۋدە تۇسىنان جاساعان. سودان كەيىن جۇرەك تۇسىنان تاعى ءتورت رەت ۇرادى, ال قاشىپ كەتپەك بولعاندا, ونى قۋىپ جەتىپ, ارقاسىنان التىنشى رەت ۇرعان.
جابىرلەنۋشى سول جەردە كوز جۇمدى – پىشاق جۇرەكتى, باۋىردى, وكپەنى زاقىمداعان.
تەرگەۋ انىقتاعانداي, كىسى ءولتىرۋ الكوگولدىك ماساڭ كۇيدە جاسالعان, ارازدىق جىلدار بويى جيناقتالعان. ايىپتالۋشى ءوز ارەكەتىنىڭ سالدارىن ءبىلىپ, ويىن سوڭىنا دەيىن جەتكىزگەن.
كىسى ولتىرگەننەن كەيىن ول پوليتسيا شاقىرعان. ۇكىم شىعارۋ كەزىندە سوت كىناسىن مويىنداعانىن, سوتتىلىعىنىڭ جوقتىعىن جانە اسىراۋىندا قارت اكەسىنىڭ بولۋىن ەسكەردى. وسىعان قاراماستان ايەل سەگىز جىلعا باس بوستاندىعىنان ايىرىلدى.