سەنات توراعاسى ماۋلەن اشىمباەۆ الماتى وبلىسىندا مەملەكەت باسشىسىنىڭ وڭىرلەردىڭ ءوسىپ-وركەندەۋىنە جول اشاتىن جاڭا ءوندىرىس ورىندارىن دامىتۋ جونىندەگى تاپسىرماسىن ىسكە اسىرۋ بارىسىمەن تانىستى. ساپار اياسىندا ەلىمىزدىڭ وڭتۇستىك-شىعىسىنداعى ماڭىزدى ستراتەگيالىق جوبالاردىڭ ءبىرى – الاتاۋ قالاسىن سالۋ جوسپارىنا باسا ءمان بەرىلدى.
پالاتا سپيكەرى قالانىڭ باس جوسپارىمەن تانىسىپ, الداعى ۋاقىتتا قولعا الىناتىن ىرگەلى جوبالارعا نازار اۋداردى. الاتاۋدا ءتورت سالالىق كلاستەردى قامتيتىن ارنايى ەكونوميكالىق ايماق قۇرىلعان. بۇلار – مادەنيەت جانە تۋريزم ورتالىعى, ءبىلىم جانە مەديتسينا ايماعى, ىسكەرلىك جانە قارجى ورتالىعى, سونداي-اق يندۋستريالىق-لوگيستيكالىق اۋدان. جوسپارعا سايكەس 2050 جىلعا قاراي جاڭا قالانىڭ تۇرعىندارى 2 ميلليونعا جەتۋى مۇمكىن. مۇندا 400-دەن اسا الەۋمەتتىك نىسان سالىنىپ, جىل سايىنعى تۋريستىك اعىن 4 ميلليون ادامنان اسپاق.
م.اشىمباەۆ الاتاۋدى دامىتۋ اۋقىمدى قالا سالۋمەن عانا شەكتەلمەيتىنىن اتاپ ءوتتى. ونىڭ ايتۋىنشا, مەملەكەت باسشىسىنىڭ وسى تاپسىرماسىن ساپالى ىسكە اسىرۋ بۇكىل ءوڭىردىڭ وركەندەۋىنە وڭ اسەرىن تيگىزەدى.
«الاتاۋ قالاسى بىلتىر پرەزيدەنت قاسىم-جومارت توقاەۆتىڭ جارلىعىمەن قۇرىلدى. بۇل – الماتى اگلومەراتسياسىنا عانا ەمەس, بۇكىل ەلدىڭ دامۋىنا تىڭ سەرپىن بەرەتىن پەرسپەكتيۆاسى زور ماڭىزدى باستامالاردىڭ ءبىرى. سەنات وڭىرلەردىڭ مۇددەسىن قورعايتىن پالاتا رەتىندە ايماقتاردىڭ دامۋىنا بەلسەندى ىقپال ەتىپ كەلەدى. سوندىقتان الداعى ۋاقىتتا الاتاۋ يننوۆاتسيا, ينۆەستيتسيا جانە تالانتتى جانداردى تارتاتىن وزىق دامىعان شاھارعا اينالۋعا ءتيىس دەپ ەسەپتەيمىز. وسى ماڭىزدى جوبانىڭ ساپالى جانە ۋاقتىلى جۇزەگە اسىرىلۋى ءۇشىن ءبارىمىز كۇش سالۋىمىز قاجەت», دەدى م.اشىمباەۆ.
سونىمەن قاتار سەنات توراعاسى Alatau ارنايى ەكونوميكالىق ايماعىندا ورنالاسقان ءىرى نىسانداردىڭ قىزمەتىمەن تانىستى. اتاپ ايتقاندا, ول ۇزدىكسىز جۇك تاسىمالىن قامتاماسىز ەتۋ جانە وڭىرلىك ساۋدانى دامىتۋ ىسىندە ماڭىزدى ءرول اتقاراتىن «يستكومترانس» كولىك-لوگيستيكالىق ورتالىعىنا ارنايى باردى. سونداي-اق م.اشىمباەۆ «FRUIT ART» جشس جەمىس-جيدەك كومبيناتىنىڭ جۇمىسشىلارىمەن كەزدەستى. سەرىكتەستىكتىڭ قۇرامىندا جىل بويى قۇلپىناي وسىرەتىن جىلىجاي كەشەنى, سىيىمدىلىعى 15 مىڭ تونناعا جەتەتىن جەمىس قويماسى جانە نەمىس تەحنولوگياسى بويىنشا جۇمىس ىستەيتىن سۋبليماتسيا كومبيناتى بار. بۇل كاسىپورىنعا جالپى كولەمى 44 ملرد تەڭگەدەن اسا ينۆەستيتسيا سالىنعان. سەنات توراعاسى اگروونەركاسىپتىك كەشەندى ودان ءارى وركەندەتۋدىڭ جانە وسى باعىتتاعى كاسىپورىنداردى قولداۋدىڭ ماڭىزدى ەكەنىن ايتىپ, ولاردىڭ ەلدىڭ ازىق-ت ۇلىك قاۋىپسىزدىگىن قامتاماسىز ەتۋگە تيگىزەتىن اسەرى زور ەكەنىن تىلگە تيەك ەتتى.