بۇل ارت-نىسان قازاقستان حالقى اسسامبلەياسىنىڭ 30 جىلدىق مەرەيتويىنا ارنالعان. تالدىقورعان قالاسىنداعى كوپقاباتتى ۇيلەردىڭ ءبىرىنىڭ قابىرعاسىنا سالىنعان سۋرەت ەلىمىزدەگى ەتنوستاردىڭ تاتۋلىعى مەن مادەني ءومىرىن ايشىقتاپ تۇر.
وڭىردە 70-تەن استام ەتنوس وكىلى تۇرادى. ولاردىڭ ءبارى وبلىس ورتالىعىندا ورنالاسقان دوستىق ۇيىمەن تىعىز بايلانىستا ءھام ۇلتتىق مەرەكەلەردە بەلسەندى قىزمەت كورسەتەدى. بۇل تۋىندىنىڭ ومىرگە كەلۋىنە دە ولاردىڭ شىنايى قارىم-قاتىناسى سەبەپ بولعان. ارت-نىسان قازاقستان حالقى اسسامبلەياسىنىڭ قوعامداعى تۇراقتىلىق پەن تاتۋلىقتى ساقتاۋ جولىنداعى ماڭىزدى ءرولىن كوركەم بەينەلەيدى.
اۋقىمدى مۇرالدا ءتۇرلى ەتنوس وكىلدەرىنىڭ كەلبەتى, ۇلتتىق ناقىشتاعى ويۋ-ورنەكتەر مەن دوستىقتى بىلدىرەتىن بەلگىلەر بەينەلەنگەن. سونىمەن قاتار اسسامبلەيانىڭ 30 جىلدىق مەرەيتويىنا قاتىستى ەلەمەنتتەر دە كورىنىس تاپقان. تۋىندىنى جاس سۋرەتشىلەر توبى بىرىگىپ سالعان. جوبانىڭ يدەيالىق نەگىزى مەن كوركەمدىك تۇجىرىمىن جەتىسۋ وبلىستىق قازاقستان حالقى اسسامبلەياسى مەن وڭىردەگى شىعارماشىلىق ۇيىمدار بىرلەسە دايىنداعان.
«بيىلعى مەرەيتوي «بىرلىك پەن كەلىسىمنىڭ 30 جىلى» دەگەن ۇرانمەن اتالىپ ءوتىپ جاتىر. وسىعان وراي, وبلىس كولەمىندە ءتۇرلى فورماتتاعى ءىس-شارالار ۇيىمداستىرىلىپ جاتىر. سولاردىڭ ءبىرى – وسى مۇرال. قابىرعا سۋرەتىندە ەتنوستار اراسىنداعى ورتاق بولاشاق, ۇلتتىق مۇرا مەن قۇندىلىقتاردى بىرىكتىرەتىن كوركەم بەينەلەر جيناقتالعان. ءاربىر دەتال – حالقىمىزدىڭ تاريحىنا, مادەنيەتى مەن بىرلىگىنە كورسەتىلگەن ءىلتيپات», دەيدى وبلىستىق «قوعامدىق كەلىسىم» مەكەمەسىنىڭ باسشىسى ەركەبۇلان اقبولاتوۆ.
مۇرال سالىنعان «قاراتال» شاعىن اۋدانىنىڭ 18/2-ءۇي تۇرعىنى ولەسيا الاحۆەرديەۆا دا بۇل يگى باستاماعا وڭ باعاسىن بەردى.
«مۇنداي كوركەم تۋىندىلار قالامىزدىڭ اجارىن اشىپ قانا قويماي, تاربيەلىك ءمانى زور ويدى جەتكىزەدى. بۇل ارت-نىسان حالقىمىزدىڭ بەيبىت ءومىر سۇرۋگە دەگەن ۇمتىلىسىن, مادەنيەت پەن كەلىسىمگە نەگىزدەلگەن بىرلىگىن ناقتى تۇردە ايشىقتاپ تۇر», دەدى ول.
جەتىسۋ وبلىسى