شىلدە ايىندا اقتوبە وبلىسىندا موتوكولىك جانە موپەد جۇرگىزۋشىلەرىنە قاتىستى رەيدتىك تەكسەرىستەر كەزىندە 200-دەن استام اكىمشىلىك قۇقىقبۇزۋشىلىق انىقتالعان, دەپ جازادى Egemen.kz.
تاراتىپ ايتقاندا, 132 موپەد يەسىنىڭ جۇرگىزۋشىلىك كۋالىگىنىڭ بولماۋى, 16 جاعدايدا قورعانىس باس كيىمىنىڭ جوقتىعى جانە 102 موتوكولىكتىڭ مەملەكەتتىك تىركەۋگە الىنباعانى انىقتالدى, دەپ حابارلايدى egemen.kz.
پوليتسيا قىزمەتكەرلەرى زاڭبۇزۋشىلىقتارعا جول بەرگەن موتوكولىكتەر مەن موپەد جۇرگىزۋشىلەرىنە جول قاۋىپسىزدىگى ەرەجەلەرىن ساقتاۋدى ەسكەرتتى.
جالپى رەيد بارىسىندا قالا كوشەلەرىندە جۇرگەن وسى ساناتتاعى 700-دەن استام كولىك قۇرالدارى تەكسەرىستەن ءوتتى.
اقتوبە وبلىسىنىڭ پوليتسيا دەپارتامەنتى جاياۋ جۇرگىنشىلەردەن باستاپ اۆتوكولىك جانە موتوكولىك جۇرگىزۋشىلەرىن دە جول قاۋىپسىزدىگى ەرەجەلەرىن قاتاڭ ساقتاۋعا شاقىرادى. موپەدتەردىڭ قالا كوشەلەرىندەگى قوزعالىسىن باقىلاۋ جانە اپاتتى جاعدايلاردىڭ الدىن الۋعا بايلانىستى پروفيلاكتيكالىق شارالار جازدىڭ سوڭىنا دەيىن جالعاسادى.
اقتوبە وبلىسى.