ەلىمىزدە ماۋسىم ايىندا ەلەكتر ەنەرگياسىن تۇتىنۋ كولەمى كۇرت تومەندەدى. ۇلتتىق ستاتيستيكا بيۋروسىنىڭ مالىمەتىنشە, 2025 جىلعى ماۋسىمدا قازاقستاندا ەلەكترمەن جابدىقتاۋ دەڭگەيى مامىرمەن سالىستىرعاندا 6,6 پايىزعا كەمىپ, 9,2 ملرد كيلوۆاتت/ساعاتتى قۇرادى. بۇل – ءبىر ايدىڭ ىشىندەگى ايتارلىقتاي وزگەرىس سانالادى, دەپ جازادى Egemen.kz.
ەنەرگيا رەسۋرستارىنا قاتىستى وزگە دە دەرەكتەر دە نازار اۋدارتادى. ماسەلەن, جىلۋ ەنەرگياسىن ءوندىرۋ كولەمى دە ازايعان. ماۋسىمدا ەلىمىز بويىنشا 3,7 ملن گيگاكالوريا جىلۋ ءوندىرىلىپ, بۇل كورسەتكىش مامىر ايىمەن سالىستىرعاندا 4,2 پايىزعا تومەن بولعان. ساراپشىلار بۇل وزگەرىستى اۋا رايىنىڭ جىلىنۋىمەن بايلانىستىرىپ وتىر – جاز ايلارىندا جىلۋعا دەگەن سۇرانىس ادەتتە ازايادى.
ال سۋ رەسۋرستارىن پايدالانۋ كەرىسىنشە, ءوسىم كورسەتتى. ەلدەگى سۋمەن جابدىقتاۋ كولەمى ماۋسىمدا 254 ملن تەكشە مەترگە جەتىپ, ءبىر اي ىشىندە 7,6 پايىزعا ارتقان. بۇل كورسەتكىش اۋىل شارۋاشىلىعى ماۋسىمىنىڭ قىزعان شاعىمەن جانە اۋا تەمپەراتۋراسىنىڭ كوتەرىلۋىنە بايلانىستى سۋ تۇتىنۋدىڭ ۇلعايۋىمەن تۇسىندىرىلەدى.
ساراپشىلاردىڭ ايتۋىنشا, ەلەكتر جانە جىلۋ تۇتىنۋىنداعى ماۋسىمدىق اۋىتقۋلار – قالىپتى قۇبىلىس. الايدا بۇل كورسەتكىشتەر ەنەرگەتيكالىق جوسپارلاۋعا, ينفراقۇرىلىمدى وڭتايلاندىرۋعا جانە تۇتىنۋ مادەنيەتىن قالىپتاستىرۋعا ايتارلىقتاي ىقپال ەتەدى.