اگرارلى ايماقتا ەگىندى ءارتاراپتاندىرۋ جۇيەلى ءجۇرىپ جاتىر. بيىل قانت قىزىلشاسى ازايىپ, باسقا مايلى داقىلدار كوبىرەك سەبىلدى. اسىرەسە زىعىر, ۇرمەبۇرشاق پەن راپستىڭ نەمىس سورتتارىنا باسىمدىق بەرىلدى.
ەسكەلدى اۋدانىندا اتالىپ وتكەن القاپ كۇنىندە ءسوز العان وبلىستىق اۋىل شارۋاشىلىعى باسقارماسىنىڭ باسشىسى نۇرداۋلەت كەنەنباەۆتىڭ ايتۋىنشا, بۇل داقىلدار فەرمەرلەرگە ەكونوميكالىق تۇرعىدان ءتيىمدى. سونىمەن قاتار سۋ ۇنەمدەۋگە مۇمكىندىك بەرەتىن سۋارۋدىڭ ديسكرەتتى ءادىسى ۇسىنىلىپ وتىرعان كورىنەدى. شارانى ۇيىستىرۋعا مۇرىندىق بولعان «دۇيسەمبينوۆ ا.ك.» شارۋا قوجالىعىنىڭ جەتەكشىسى ايدىن دۇيسەمبينوۆتىڭ سوزىنشە, اتالعان مايلى داقىلدار جەرگىلىكتى كليماتقا بەيىم ءارى ونىمدىلىگى جوعارى دەيدى. شارۋا قوجالىعى قازىر 4 شارۋاشىلىقتى بىرىكتىرىپ, 50 اۋىل شارۋاشىلىعى تەحنيكاسىن پايدالانىپ, 50 ادامدى تۇراقتى جۇمىسپەن قامتىپ وتىر.
القاپ كۇنى اياسىندا فەرمەرلەر, اۋىل شارۋاشىلىعى سالاسىنىڭ ساراپشىلارى جانە تەحنيكا ءوندىرۋشى كومپانيالار اراسىندا تىكەلەي پىكىر الماسۋعا مۇمكىندىك تۋدى. قاتىسۋشىلار سۋدى ءتيىمدى پايدالانۋ, داقىل ونىمدىلىگىن ارتتىرۋ, تەحنيكا پاركىن جاڭارتۋ, سونداي-اق عىلىم مەن بيزنەستىڭ ءوزارا ىنتىماقتاستىعى تاقىرىپتارىندا ءوزارا تاجىريبە ءبولىستى. جيىن بارىسىندا كوكسۋ اۋدانىنان كەلگەن شارۋالاردىڭ كول-كوسىر ەڭبەگى دە ەلەنبەي قالعان جوق. كوكسۋ جۇرتى بيىل دا جەردى ءيىتىپ, ءدان سەۋىپ, تىرشىلىك تامىرىنا قان جۇگىرتتى. اۋداندا 31 382 گەكتارعا اۋىل شارۋاشىلىعى داقىلدارى ەگىلگەن. ءداندى داقىلدار – 10 500 گەكتارعا, مايلى داقىلدار 11 478 گەكتارعا ەگىلگەن. مايبۇرشاق پەن كۇنباعىس تا جايقالىپ تۇر. 1 822 گەكتار القاپقا قانت قىزىلشاسى ەگىلگەن.
«قانت قىزىلشاسى مەن مايبۇرشاق, بالپىق ءبيدىڭ تەرىسكەيىندە جايقالعان بيداي جانە لاباسىداعى جۇگەرى القاپتارى ءجىتى نازاردا. بۇگىندە اگرارلىق سالا – ەسكىشە قارا كەتپەنمەن ەمەس, تىڭ ءتاسىل, جاڭا ۇلگىمەن جۇزەگە اسىرىلاتىن كۇردەلى جۇيە. سۋارۋ, تىڭايتقىش بەرۋ, زيانكەسكە قارسى شارالار سىندى اگروتەحنيكالىق تالاپتاردى قاتاڭ ساقتاۋ كەرەك. بۇل بەرەكەلى ءونىمنىڭ العىشارتى ەكەنىن ۇمىتپاعان ءجون», دەيدى اۋدان اكىمى داۋلەت حالەلوۆ.
بۇگىندە قابانباي اۋىلىندا قىزۋ تىرلىك. جەر باۋىرىن شاڭداتقان سوقالار مەن ءدان سەپكىش تەحنيكالاردىڭ گۇرىلى كوڭىلگە سەنىم ۇيالاتادى. «كوكتەمنىڭ ءبىر كۇنى جىلعا ازىق» دەپ سەنەتىن ديقانداردىڭ قيمىلى شيراق. سول قاتاردا ماشەن بايزاقوۆتىڭ ەگىس القابىنا دا سوقا ءتىسى تيگەلى ءبىراز بولعان. كوكتەمگى مامىراجاي كۇنمەن بىرگە قاربالاس جۇمىس ءبىر توقتاعان ەمەس. ويتكەنى بيىل شارۋاشىلىقتىڭ ەگىس كولەمى ارتىپ, جۇمىس اۋقىمى ۇلعايا تۇسكەن ەكەن.
«350 گەكتار جەردى قۇرايتىن ەگىس القابىمىز سۋارمالى جانە ءتالىمدى بولىپ بولىنەدى. ونىڭ 150 گەكتارىنا قانت قىزىلشاسىن, 200 گەكتارىنا ماي بۇرشاق سەبۋدى جوسپارلادىق. تەحنيكا, تۇقىم, تىڭايتقىش پەن ءدارى-دارمەك قورىمىز جەتكىلىكتى. كوكتەمگى ەگىس ناۋقانىنا قاجەتتى تەحنيكالار تولىق جوندەلگەن. ەگىس جۇمىسىن ەرتەرەك اياقتايمىز دەگەن سەنىمدەمىز», دەيدى شارۋاشىلىق باسشىسى.
جەتىسۋ وبلىسى