ەلوردادا ءبىر تاۋلىكتىڭ ىشىندە ءتورت بالا كوپقاباتتى تۇرعىن ۇيلەردىڭ تەرەزەسىنەن قۇلاپ كەتكەن. وكىنىشكە قاراي, ولاردىڭ ەكەۋى العان جاراقاتتارىنان وقيعا ورنىندا كوز جۇمعان, دەپ حابارلايدى Egemen.kz.
اتاپ ايتقاندا, وتكەن تاۋلىكتە شۇعىل مەديتسينالىق كومەك قىزمەتىنىڭ 103 پۋلتىنە «بالا قۇلاپ كەتتى» دەگەن سەبەپپەن ءتورت شاقىرتۋ تۇسكەن. زارداپ شەككەن بالالار ءارتۇرلى بيىكتىكتەن, ءبىرىنشى قاباتتان باستاپ 16-قابات ارالىعىندا قۇلاعان.
«10 جانە 16-قاباتتان قۇلاعان بالالار العان جاراقاتتارىنان وقيعا ورنىندا كوز جۇمدى. ونىڭ بىرەۋى 3 جاستا, ەكىنشىسى 6 جاستا بولعان. تاعى ەكەۋى وقيعا ورنىنان جەدەل جاردەممەن بالالار ستاتسيونارىنا جەتكىزىلدى, ولاردىڭ دەنەسىندە كوپتەگەن جاراقات بار. قازىرگى ۋاقىتتا ەكى بالا دا جانساقتاۋ بولىمىندە جاتىر. دارىگەرلەر ولاردىڭ جاعدايىن اۋىر دەپ باعالاپ وتىر», دەپ حابارلادى قالا اكىمدىگىنىڭ ءباسپاسوز قىزمەتى.
№2 كوپبەيىندى قالالىق بالالار اۋرۋحاناسىنىڭ تراۆماتولوگ-دارىگەرلەرى مۇنداي جاعدايلاردىڭ جيىلەپ كەتكەنىن ايتىپ, اتا-انالارعا ساق بولۋدى ەسكەرتتى.
«وكىنىشكە قاراي, ەرەسەكتەردىڭ سالعىرتتىعىنىڭ سالدارىنان بالالاردىڭ دەنساۋلىعىنا ۇلكەن زيان كەلىپ قانا قويماي, قايتىس بولىپ تا جاتىر. اۋىر حالدە تۇسكەن بالالاردى كورگەندە: «مۇنداي جاعدايعا ەرەسەكتەر قالاي جول بەردى؟ نەگە بالا قاراۋسىز قالدى؟» دەگەن سۇراقتار تۋىندايدى. وكىنىشكە قاراي, بيىكتەن قۇلاۋ فاكتىلەرى جىلدان-جىلعا كوبەيىپ كەلەدى. جىل باسىنان بەرى ءتۇرلى بيىكتەن قۇلاعان 51 بالا بىزگە جەتكىزىلدى. ولاردىڭ تورتەۋى العان جاراقاتىنان ستاتسيوناردا قايتىس بولدى», دەپ مالىمدەدى تراۆماتولوگ-دارىگەرلەر.
ايتا كەتەيىك, بالالاردىڭ قۇلاۋىنا كوبىنەسە تەرەزەگە ورناتىلعان ماساعا قارسى تور سەبەپ بولادى. كوپ جاعدايدا بالالار ءدال وسى تورعا سۇيەنىپ, قۇلاپ كەتەدى.
«ماساعا قارسى تورعا ەشقاشان سەنبەڭىزدەر. ولار قۇلاۋدان قورعايتىن قۇرال ەمەس. قۇرمەتتى اتا-انالار, بالاڭىزدى ءبىر ساتكە نازاردان تىس قالدىرۋ اۋىر زارداپتارعا اكەلۋى مۇمكىن», دەپ ەسكەرتتى قوعامدىق دەنساۋلىق ساقتاۋ باسقارماسى.
قالالىق دەنساۋلىق ساقتاۋ باسقارماسىنىڭ مالىمەتىنشە, 2025 جىلدىڭ العاشقى التى ايىندا ەلوردالا 60 بالا تەرەزەدەن قۇلاپ كەتكەن. ولاردىڭ توعىزى جەدەل جاردەم كەلگەنگە دەيىن كوز جۇمعان.