كاسساتسيالىق سوتتار جۇمىسى باستالدى

بۇعان دەيىن جوعارعى سوت زاڭدى كۇشىنە ەنگەن شەشىمدەردى قايتا قارايتىن نەگىزگى ينستانتسيا سانالاتىن. ەندى ول مىندەتتى كاسساتسيالىق سوتتار اتقارادى. كاسساتسيالىق سوت زاڭدى كۇشىنە ەنگەن سوت اكتىلەرىنە قاتىستى ىستەردى قايتا قاراپ, شەشىم شىعارادى. ال جوعارى سوت ەرەكشە جاعدايلاردا عانا جوعارعى سوت سۋدياسىنىڭ ۇسىنىسى نەمەسە باس پروكۋروردىڭ قارسىلىعى بويىنشا ىستەردى وندىرىسكە الادى.

– بۇل – قازاقستاننىڭ سوت جۇيەسىن دامىتۋدىڭ ءتيىمدى قا­دامى. ۋاقىت تالابىنا ساي جو­عارعى سوتتىڭ جۇكتەمەسىن ازاي­تىپ, باستى نازاردى ەل ازامات­تارىنىڭ قۇقىقتىق ماسەلە­لەرىنە اۋدارۋىمىز كەرەك. سول ارقىلى ازاماتتاردىڭ سوتقا قول­جەتىمدىلىگىن ارتتىرامىز. ىستەردى قايتا قاراۋدىڭ قوسىمشا ينستانتسياسىن ەنگىزۋ ازاماتتاردىڭ قۇقىق قورعاۋعا قاتىستى پروبلەمالارىن جەڭىلدەتىپ, سوت شەشىمدەرىنىڭ ساپاسىن ارتتىرادى جانە زاڭدىلىقتى باقىلاۋ الدەقايدا ناقتى بولادى, – دەدى سپيكەر.

سپيكەر كاسساتسيالىق سوتتاردىڭ بوس لاۋازىمدارىنا كانديداتتاردى ىرىكتەۋ كونكۋرس نەگىزىندە, HR-باعالاۋدىڭ قۇرالدارىن قولدانۋ ارقىلى جۇزەگە اسىرىلعانىن مالىمدەدى.

2025 جىلدىڭ 22 قاڭتارىندا جوعارى سوت كەڭەسى كاسساتسيالىق سوتتارعا 87 بوس سۋديالىق لاۋازىمعا كونكۋرس جاريالاپ, ازاماتتىق ىستەر جونىندەگى كاسساتسيالىق سوتقا – 39, قىلمىستىق ىستەر جونىندەگى كاسساتسيالىق سوتقا – 29, اكىمشىلىك ىستەر جونىندەگى كاسساتسيالىق سوتقا 19 سۋديا تاعايىندالعان.

– كاسساتسيالىق سوتتاردىڭ بوس لاۋازىمدارىنا كانديداتتاردى ىرىك­تەۋ كەڭەسپەن اقىلداسا وتى­رىپ, كونكۋرس نەگىزىندە HR-باعا­لاۋ­دىڭ كەڭ سپەكترىن قولدانۋ ارقى­لى جۇزەگە اسىرىلدى. ىرىكتەۋ بارى­سىن­دا پراكتيكالىق تاجىريبە, سۋديا­­لىق ەڭبەك ءوتىلى, سوت تورەلىگىن جۇز­ەگە اسىرۋ ساپاسى, قارالعان ىس­تەر­­دىڭ كۇردەلىلىك دەڭگەيى, ءمىنسىز بە­دەل, سۋديالىق ەتيكا تالاپتارىن ساق­­تاۋ, اڭگىمەلەسۋدىڭ ناتيجەلەرى, جوعار­عى سوتتىڭ پلەنارلىق وتى­رى­­سىنىڭ جانە سۋديالار قاۋىم­داس­تىعى ورگاندارىنىڭ قورى­تىن­دى­لارى, كانديداتتاردى باعا­لاۋ­دىڭ كوپ ساتىلى جانە كەزەڭ­دىك جۇ­يە­سىن­دە قاراستىرىلعان باسقا دا كري­تە­ريلەر ەسكەرىلدى, – دەدى ە.ايتجانوۆ.

سونىمەن قاتار كانديداتتار تاڭداۋ كەزىندە جۇرتشىلىق پەن زاڭگەرلىك قاۋىمداستىق وكىلدەرىنىڭ پىكىرلەرى, بۇقارالىق اقپارات قۇرالدارىندا جاريالانعان ماتەريالدار دا نازارعا الىنعان.

جوعارى سوت كەڭەسىنىڭ مۇشەسى ەرلان ايتجانوۆ كونكۋرسقا قاتىسۋ ءۇشىن بارلىعى 334 ۇمىتكەر­دەن قۇجاتتار كەلىپ تۇسكەنىن, ونىڭ ىشىندە بىلىكتىلىك تالاپتارىنا سايكەس كەلگەن 170 ۇمىتكەر كون­كۋرسقا جىبەرىلگەنىن, ىرىكتەۋ ناتيجەسىندە 75 ۇمىتكەر تاڭدالىپ الىنعانىن تىلگە تيەك ەتتى. بوس لاۋازىمدارعا تاعايىندالعان سوتتاردىڭ 49-ى, ياعني 65 پايىزى – ايەلدەر جانە 26-ى, ياعني 35 پا­يىزى – ەرلەر.

– كونكۋرسقا ەلىمىزدىڭ بارلىق وڭىرىنەن ۇمىتكەرلەر قاتىستى. بۇل قادام كاسساتسيالىق سوتتار قۇرامىندا جان-جاقتى وڭىرلىك وكىلدىكتى قامتاماسىز ەتەدى. ۇسى­نىلعان سۋديالاردىڭ ورتاشا جاسى – 52 جاس, ورتاشا سۋديالىق ءوتىلى – 20 جىل, ونىڭ ىشىندە اپەللياتسيا­لىق ينستانتسيادا – 10 جىل. جاڭا كاسساتسيالىق سوتتارعا جۇرگىزىلگەن مۇقيات ءارى اشىق ىرىكتەۋ اياسىندا ءبىرىنشى جانە اپەللياتسيالىق ينستانتسيالارداعى ۇلكەن جۇمىس تاجىريبەسى بار ەڭ تاجىريبەلى سۋديالار ۇسىنىلدى, – دەدى سپيكەر.

جوعارى سوت كەڭەسىنىڭ مۇشەسى سالتانات جۇنىسپەكوۆا جوعارى سوت كەڭەسى كاسساتسيالىق سوتتار­عا كانديداتتاردى ىرىكتەۋمەن قاتار باسقا دا سۋديالاردى ىرىكتەۋ جانە ولاردىڭ مانساپتىق ءوسۋىن جەتىلدىرۋگە باعىتتالعان جۇمىس­تارمەن تانىستىردى. سپيكەردىڭ ايتۋىنشا, سۋديا لاۋازىمىنا بىلىكتىلىك ەمتيحانىن تاپسىرۋ جيىلىگى ارتقان. بۇرىن سۋديالار جىلىنا 4 رەتتەن بىلىكتىلىك ەمتيحانىن تاپسىرسا, ەندى سىناق سانى 12-گە دەيىن كوبەيگەن. بىلىك­تىلىك ەمتيحانىن تاپسىرۋ مەرزىمى 1,5 جىلدان 3 ايعا دەيىن قىسقارىپ, پسيحولوگيالىق تەستىلەۋ وتكىزۋ جيىلىگى جىلىنا 3 رەتتەن 10 رەتكە دەيىن ۇلعايعان.

– العاش رەت سۋديا لاۋازىمىن يەلەنەتىن ۇمىتكەرلەرگە قويىلاتىن تالاپتار دا كۇشەي­تىلدى. قۇقىق قورعاۋ جانە ارنايى ورگانداردىڭ دەرەكتەر بازالارى ارقىلى قوسىم­شا تەكسەرۋلەر ەنگىزىلدى. بۇل ۇمىتكەرلەردىڭ قىلمىستىق جولمەن الىنعان تابىستاردى زاڭ­داستىرۋ, ەسىرتكى چاتتار, راديكال­دى اعىمدار, زاڭسىز قۇمار ويىندار, تسيفرلىق اكتيۆتەر اينالىمى جانە باسقا دا قۇقىققا قايشى ارەكەتتەرگە قاتىستىلىعىن انىقتاۋعا مۇمكىندىك بەرەدى, – دەدى س.جۇنىسپەكوۆا.

جوعارى سوت كەڭەسىنىڭ مالى­مەتىنە قاراعاندا, 2025 جىل­دىڭ 6 ايىندا بىلىكتىلىك كوميس­سياسىنىڭ 18 وتىرىسى ءوتىپ, 125 كانديدات سىناقتاردى ءساتتى تاپسىرعان. بىلتىر 73 كانديدات ىرىكتەۋدەن ءوتىپ, بوس لاۋازىمدارعا تاعايىندالعان ەدى.

س.جۇنىسپەكوۆا سۋديالىق لاۋازىمدارعا ۇمىتكەر قابىلداۋ كونكۋرستارى جىلىنا ەكى رەتتەن ارتىق وتپەگەندىكتەن, 2-3 جىل بويى ەلىمىزدەگى 300-350-گە جۋىق سۋديالىق لاۋازىم بوس تۇرعانىن, بۇل جاعداي قازىرگى سۋديالاردىڭ جۇكتەمەسىنىڭ شامادان تىس ارتتىرىپ, مامانداردىڭ زەينەت جاسىنا جەتپەي وتستاۆكاعا كەتۋىنە اسەر ەتەتىنىن جەتكىزدى.

– بۇل پروبلەمانى شەشۋ ءۇشىن ەندى جىلىنا 6 كونكۋرس وتكىزىلەتىن بولدى. ءبىر كونكۋرستى وتكىزۋ مەرزىمى 6 ايدان 2 ايعا دەيىن قىسقارتىلدى, كونكۋرستىق پروتسەسس تولىعىمەن قايتا فورماتتالدى. ياعني سۋبەكتيۆيزم الىنىپ تاستالدى. ەندى ايقىن, اشىق جانە وبەكتيۆتى ولشەمدەرگە باسا نازار اۋدارىلدى. كانديداتتاردى باعالاۋ كەزىندە ازاماتتاردىڭ پىكىرلەرى ەسكەرىلەدى, بۇل ءۇشىن الەۋمەتتىك الاڭدار كەڭىنەن پايدالانىلادى, مونيتورينگ جۇرگىزىلەدى, سوتتارمەن ءوزارا ءىس-قيمىل جاسايتىن قوعامدىق كەڭەستەردىڭ پىكىرلەرى نازارعا الىنادى. بۇل جۇيەلى جاڭارتۋ سوتتار قۇرامىن تەز جانە ساپالى جاساقتاۋعا مۇمكىندىك بەرەدى, – دەدى سپيكەر ءوز سوزىندە.