مەسسەندجەرلەر مەن الەۋمەتتىك جەلىلەردە تاراعان «استانا قالاسىنداعى “الەم” ساۋدا ورنىنا ءسىبىر جاراسىمەن اۋىرعان مالدىڭ ەتى جەتكىزىلدى» دەگەن اقپارات شىندىققا سايكەس كەلمەيدى. بۇل مالىمەتتى ۆەتەريناريالىق باقىلاۋ جانە قاداعالاۋ كوميتەتى رەسمي تۇردە جوققا شىعاردى, دەپ حابارلايدى Egemen.kz.
بۇگىنگى كۇنگە دەيىن ەلورداداعى ساۋدا ورتالىقتارىندا, سونىڭ ىشىندە «الەم» ساۋدا ورنىندا جۇقپالى اۋرۋمەن اۋىرعان مال ەتى ءونىمىنىڭ ساتىلۋى نەمەسە جەتكىزىلۋى تۋرالى ەشقانداي فاكت تىركەلگەن جوق. بارلىق جەتكىزىلگەن ەت ونىمدەرى مىندەتتى ۆەتەرينارلىق-سانيتارلىق تەكسەرۋدەن وتەدى. سوندىقتان تۇرعىنداردىڭ الاڭداۋىنا ەش نەگىز جوق.
بۇعان دەيىن بىرەن-ساران جاعدايلار تىركەلگەن اتباسار اۋدانىندا كەشەندى دەزينفەكتسيالىق جۇمىستار تولىق اياقتالدى. قاۋىپتى ەت ونىمدەرى بەلگىلەنگەن سانيتارلىق تارتىپپەن جويىلدى. تۇرعىندار مەديتسينالىق تەكسەرۋدەن ءوتىپ جاتىر.
ازاماتتاردى تەك رەسمي دەرەككوزدەرگە, ياعني, اۋىل شارۋاشىلىعى مينيسترلىگى مەن ۆەتەريناريالىق باقىلاۋ جانە قاداعالاۋ كوميتەتىنىڭ اقپاراتتارىنا سەنۋگە شاقىرامىز. جالعان اقپارات تاراتۋ قازاقستان رەسپۋبليكاسى زاڭناماسىنا سايكەس جاۋاپكەرشىلىككە اكەلەتىنىن ەسكەرتەمىز.