بۇگىنگى مەكتەپ كوشباسشىلارى

مەملەكەت باسشىسى قاسىم-جومارت توقاەۆ رەسپۋبليكالىق پەداگوگتەر سەزىندە اۋىل مەكتەپتەرىن زياتكەرلىك, سونداي-اق قوعامدىق ورتالىق رەتىندە دامىتۋ ماڭىزدى ەكەنىن اتاپ وتكەن بولاتىن. سول سەبەپتى, جوبا سەرتيفيكاتىن يەمدەنگەن پەداگوگتىڭ موينىندا اۋىل مەكتەبىنىڭ ءبىلىم ساپاسىن ارتتىرۋ جۇگى بار.

دۋمان ءسادىريسلام ء«بىلىم بەرۋدەگى وزگەرىستەردىڭ 1000 كوشباسشىسى» كادرلىق رەزەرۆى جوباسىنىڭ ىرىكتەۋ كەزەڭىندە ۇلىتاۋ وبلىسىنىڭ اتىنان باعىن سىناپتى. بۇل جوبا مەملەكەت باسشىسىنىڭ تاپسىرماسىمەن وقۋ-اعارتۋ مينيسترلىگى پرەزيدەنت­تىك جاستار كادرلىق رەزەرۆىنىڭ ۇلگىسىن­دە ءبىلىم سالاسىنداعى وزگەرىستەر­دىڭ كوشباسشىلارىن ىرىكتەۋ جانە دايارلاۋ تەتىگىن ازىرلەۋ جانە بەكىتۋ بويىنشا جۇمىس جۇرگىزىپ وتىر.

دۋمان عاني ۇلى جوبانىڭ ىرىكتەۋ كەزەڭى­نەن سۇرىنبەي ءوتىپ, وقۋعا قابىلدانادى. جوبانىڭ التى كەزەڭىنەن, بەس ەمتيحانىنان مۇدىرمەي وتكەن ول ءبىلىم سالاسىنداعى كادر رەزەرۆى قاتارىنا ەنەدى. بىلتىر سالتاناتتى تۇردە وقۋ-اعارتۋ ءمينيسترى عاني بەيسەمباەۆتىڭ قولىنان سەرتيفيكات العان.

جوبانىڭ ەرەكشەلىگى سوندا, كادر رەزەرۆىنە قابىلدانعان پەداگوگ كونكۋرسسىز مەكتەپتەگى باسشىلىق لاۋازىمىنا بىردەن تاعا­يىندالادى. دۋمان عاني ۇلىنا كادر رەزەرۆى­نىڭ قاتىسۋشىسى رەتىندە ۇلىتاۋ وبلىسى, اقمولا وبلىسى, قاراعاندى وبلى­سى­نىڭ ءبىلىم باسقارمالارىنان ۇسىنىس ءتۇسىپتى.

ءسويتىپ, ءساۋىر ايىندا قاراعاندىنى تاڭداعان ۇمىتكەر وبلىستىق ءبىلىم باسقار­ماسىنىڭ باسشىسى گۇلباقىت ءجۇنىسوۆا­نىڭ كەلىسىمىمەن, قارقارالى اۋداندىق ءبىلىم ءبولىمىنىڭ باسشىسى ابىلاي جالەلوۆتىڭ قولداۋىمەن قاراعايلى كەنتىنىڭ №16 مەكتەبىنە ديرەكتور بولىپ تاعايىندالدى.

ءۇر جاڭا ديرەكتور دۋمان عاني ۇلى­نىڭ ءومىر جولى ءتۇرلى وڭىرمەن ورىلگەن. قىزىلوردا وبلىسى جاڭاقورعان اۋدانى كەڭەس اۋىلىندا دۇنيەگە كەلىپ, جەزقازعان قالاسىنداعى №1 جالپى ءبىلىم بەرەتىن مەكتەپتە وقۋدى ۇزدىك ءتامامدايدى. استانا قالاسىنداعى ا.قۇسايىنوۆ اتىن­داعى ەۋرازيا گۋمانيتارلىق ينستيتۋتىن­دا «قازاق ءتىلى مەن ادەبيەتى» ماماندىعى­نا وقۋعا تۇسەدى. 2016 جىلى وقۋىن ءساتتى اياقتاپ, ديپلومىن قولىنا العان سوڭ, جەزقازعان قالاسىنداعى قارا شاڭىراق №8 گيمنازياسىنا اعا تالىمگەر بولىپ جۇمىسقا قابىلدانعان. سودان كەيىن قازاق ءتىلى مەن ادەبيەتى ءپانى مۇعالىمى قىزمەتىنە اۋىسىپ, بالالارعا ساباق بەرەدى. جاس مامانداردىڭ رەسپۋبليكالىق, وبلىستىق, قالالىق بايقاۋلارىنا قاتىسىپ, جۇلدەلى ورىندارعا يە بولادى. «ۇزدىك ءتىل مامانى», «ۇزدىك ۇيىم», «قازاقستان ۇستازى» بايقاۋلارىنىڭ جەڭىمپازى. مۇعالىمدىك ەڭبەك ەتكەن جىلىنىڭ قورىتىندىسىندا مەكتەپتەگى «كرەاتيۆتى ۇستاز» اتالىمىن جەڭىپ العان. ونىمەن قوسا, وقۋشىلارى رەسپۋبليكالىق مۇقاعالي وقۋلارى, اباي وقۋلارى, ءابىش وقۋلارى, ماعجان وقۋلارى سياقتى ءتۇرلى بايقاۋدا توپ جارعان.

«ورلەۋ» بىلىكتىلىكتى ارتتىرۋ ورتا­لىعى ۇيىمداستىرعان رەسپۋبليكالىق «پەداگو­گيكالىق يدەيالار پانوراماسى» كونكۋرسىنىڭ وقۋ ساۋاتتىلىعى اتالىمىندا I ورىن, «پەداگوگيكالىق يدەيالار فەس­تيۆالى» كونكۋرسىنىڭ قالالىق, وبلىستىق كەزەڭدەرىنىڭ جۇلدەگەرى. مەكتەپتەگى تەلەستۋديا كابينەتىنىڭ جەتەكشىسى رەتىندە وقۋشىلاردى جۋرناليستيكا ماماندىعىنا باۋلىعان. وسىنداي جەتىستىكتەرى بار دۋماننان وسال باسشى شىعا قويماس.

«جوبادا العان ءبىلىمىمدى اۋىلدىق جەردە شىڭداپ, تاجىريبە جيناعانىم دۇرىس شىعار دەگەن شەشىمگە كەلدىم. قاراعاندى وبلىسى ءبىلىم باسقارماسىنىڭ كادر ءبولىمى مامانى جاننات امانگەلدىقىزىنىڭ كومەگىمەن قارقارالى اۋدانى قاراعايلى كەنتىن تاڭدادىم. قالادان اۋىلعا كوشىپ كەلگەندەگى العاشقى اسەرىمدى سوزبەن جەتكىزە المايمىن. قارقارالىنىڭ كوزدىڭ جاۋىن الاتىن تابيعاتى, اسپانمەن تالاسقان تاۋلارى جازىقتا تۋىپ-وسكەن ماعان ۇنادى. اۋىل تۇرعىندارىنىڭ, مەكتەپ ۇجىمىنىڭ قۇشاق جايا قارسى الۋى جۇرەككە جىلۋ سىيلادى. اۋىل اكىمى مۇراتبەك زەكەن ۇلى ۇجىممەن تانىستىرىپ, اۋىلدىڭ تىنىس-تىرشىلىگىنەن حابار بەرىپ, قولدان كەلەر كومەگىن ايامايتىنىن ايتتى. اۋىل جۇرتىنىڭ دالاداي دار­قان كوڭىلى بار كۇش-جىگەرىمدى ايانباي قىزمەت ەتۋگە سەرپىن بەرەدى», دەيدى دۋمان عاني ۇلى.

جارى جانسايا قايىرجانقىزىمەن جوعارى وقۋ ورنىندا تانىسقان. ول دا – قازاق ءتىلى مەن ادەبيەتى ءپانىنىڭ مۇعالىمى. جارى مەكتەپ جانىنداعى «بالدىرعان» بالاباقشاسىنا قازاق ءتىلى مامانى بولىپ جۇمىسقا ورنالاسىپتى. وسىلايشا, اۋىلعا قونىس اۋدارعان مۇعالىمدەر وتباسى ءۇيىنىڭ قامىنا كىرىسىپ جاتىر.

قاراعاندى وبلىسى