«قازاقكونتسەرت» كەزەكتى كونتسەرتتىك ماۋسىمىن اياقتادى

بيىل «قازاقكونتسەرت» ۇيىمى 82 كونتسەرت, 3 ءىرى شىعارماشىلىق جوبا جانە كوپتەگەن مەملەكەتتىك ماڭىزى بار ءىس-شارالاردى ۇيىمداستىرعان. اتاپ ايتقاندا «روزا باعلانوۆا» اتىنداعى حالىقارالىق ۆوكالدىق كونكۋرسى, «سەرپەر» ۇلتتىق ونەر كونكۋرسى جانە «مەنىڭ قازاقستانىم» اتتى ءشامشى قالداياقوۆ اندەرىنىڭ حالىقارالىق فەستيۆالى جۇزەگە اسىرىلدى.

سونىمەن قاتار, ۇيىمنىڭ ارتىستەرى فرانتسيا, ۇلىبريتانيا, يتاليا, كانادا, تۇركيا, يسپانيا, چەحيا, بولگاريا, بەلارۋس, ماجارستان, ءباا,تاجىكستان, رەسەي فەدەراتسياسى, تۇركىمەنستان, گرۋزيا, ارمەنيا, لاتۆيا جانە ازەربايجان سەكىلدى 22 شەت مەملەكەتكە گاسترولدىك ساپارمەن بارىپ, قازاق ونەرىن الەم ساحنالارىندا پاش ەتتى. وعان قوسا قوستاناي, اقمولا, شىعىس قازاقستان, ۇلىتاۋ, قىزىلوردا, تۇركىستان, جامبىل, جەتىسۋ جانە الماتى وبلىسىن قامتىعان 17 رەسپۋبليكالىق گاسترولدىك ساپار بارىسىندا ەلىمىزدىڭ تۇكپىر-تۇكپىرىندە ۇلتتىق مادەنيەتتى كەڭىنەن دارىپتەدى.

قازاقكونتسەرت ارتىستەرى مەن شىعارماشىلىق ۇجىمدارى «قازاقستاننىڭ حالىق ءارتىسى», «قازاقستاننىڭ ەڭبەك سىڭىرگەن قايراتكەرى», «ەرەن ەڭبەگى ءۇشىن», «بارىس» وردەنى سىندى 12 مەملەكەتتىك ماراپاتقا يە بولدى. بۇعان قوسا «قازاقستان حالقى اسسامبلەياسىنا 30 جىل» توسبەلگىسىمەن, «Dala dauysy» جانە امەريكا, رەسەي, گرۋزيا مەملەكەتىندە وتكەن 7 رەسپۋبليكالىق جانە حالىقارالىق بايقاۋلاردا جۇلدەلى ورىنداردى قانجىعالادى.

قورىتىندى كەش استاناداعى امفيتەاتردا ءوتتى. بۇل كەشتە وتاندىق ەسترادا جۇلدىزدارى, تانىمال ساحنا شەبەرلەرى مەن جاس تالانتتار باس قوسىپ, اشىق اسپان استىندا كەڭ كولەمدى مۋزىكالىق شوۋ ۇسىندى.

كونتسەرتتىك باعدارلامادا تانىمال كومپوزيتسيالار, زاماناۋي ارانجيروۆكالار, وركەسترلىك سۇيەمەلدەۋ جانە اشىق اسپان استىنداعى مەرەكەلىك اتموسفەرا ۇسىنىلدى. ەل ەسىندە ساقتالعان سۇيىكتى اندەر جاڭاشا ارلەنىپ, جاندى ورىنداۋدا كورەرمەنگە جول تارتتى. ولاردىڭ قاتارىندا «سالەم ساعان, تۋعان ەل», «جان دوسىم», «اق داريعا», «قازاق ەلى», «جەلسىز تۇندە جارىق اي», «احاۋ كەرىم» سىندى حالىق جۇرەگىنەن ورىن العان تۋىندىلار بار.

ءىس-شاراعا «قازاقكونتسەرتتىڭ» تانىمال سوليستەرى مەن شىعارماشىلىق ۇجىمدارى قاتىستى: قازاقستاننىڭ حالىق ءارتىسى ماقپال ءجۇنىسوۆا, قازاقستاننىڭ ەڭبەك سىڭىرگەن ءارتىسى نۇرلان ونەرباەۆ, قازاقستاننىڭ ەڭبەك سىڭىرگەن قايراتكەرلەرى سۇلەيمەن يبراگيموۆ, قۇرماش ماحان, كلارا تولەنباەۆا, گۇلسىم مىرزابەكوۆا, ازامات جىلتىركوزوۆ, بيبىگۇل جانۇزاق, «ەرەن ەڭبەگى ءۇشىن» توسبەلگىسىنىڭ يەگەرلەرى التىنشاش مۇقاتاەۆا, اننا ۋۆاروۆا, «مادەنيەت سالاسىنىڭ ۇزدىگى» توسبەلگىسىنىڭ يەگەرى پەريزات تۇرار, «دارىن» مەملەكەتتىك جاستار سىيلىعىنىڭ لاۋرەاتى ازات مالىك, حالىقارالىق جانە رەسپۋبليكالىق بايقاۋلاردىڭ لاۋرەاتتارى داريا بەكپەمبەت, اياۋلىم قاماجان, ديدار ابدۋحالىك, اقبوپە الىبەكوۆا, اسىلحان شالقاروۆ, ەربول تاجىباەۆ, نۇرسۇلتان انۋاربەك, نۇرسەزىم ساماتقىزى سونداي-اق, قازاق مەملەكەتتىك سيمفونيالىق وركەسترى, «گۇلدەر» جانە «بىرلىك» انسامبلدەرى, «TURAN» ەتنو-فولكلورلىق ءانسامبلى, «SAZ&SOUL» توبى جانە «Astana Musical» مەملەكەتتىك تەاترى.