پارىقسىز پرانك شەڭبەردەن شىعىپ بارادى

وكىنىشكە وراي, لايك پەن قارالىم ءۇشىن الدى-ارتىنا قاراتپايتىن جارىس ءازىل-قالجىڭ مەن دۇرىس كوڭىل كوتەرۋدىڭ شەگىنەن الىستاپ كەتىپ ءجۇر. ماسەلەن, جۋىردا جەلىدە تاراعان ءبىر بەينەجازبادا ەر ادام جۇكتى سەرىگىمەن بىرگە كوشە سىپىرۋشىلاردىڭ اياعىنىڭ استىنا قوقىس توگىپ: «ناشار جۇمىس ىستەيسىز» دەپ ايىپتايدى. كوممۋنالدىق قىزمەتكەرلەردىڭ ءبىرىن جىلارمان كۇيگە جەتكىزگەن سوڭ, بۇل الەۋمەتتىك ەكسپەريمەنت ەكەنىن مالىمدەپ, كەشىرىم سۇرايدى. ورىنسىز قالجىڭىمەن جەلى قولدانۋشىلاردىڭ ىزاسىن تۋدىرعان ەر ادامعا قاتىستى ءىس الماتى اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتىندا قارالدى. ءسويتىپ, پرانكشىنىڭ قوعامدىق ءتارتىپتى بۇزىپ, اينالاسىنداعىلارعا قۇرمەتسىزدىك تانىتقانى انىقتالدى. ال استانادا ليفت ىشىندە «مۇردە» تاسىپ جانە بالتامەن شابۋىل جاساپ, جۇرتتىڭ ۇرەيىن ۇشىرعان بلوگەرلەردىڭ «تاپقىرلىعى» ودان دا اسىپ ءتۇستى. قاتىگەز پرانكتىڭ بارلىق قاتىسۋشىلارى 15-تەن 30 تاۋلىككە دەيىن اكىمشىلىك قاماۋعا الىندى. الماتى وبلىسىندا ەكسترەمالدى ۆيدەو ءتۇسىرۋ كەزىندە جاس جىگىت كەلە جاتقان كولىكتىڭ ۇستىنەن سەكىرمەك بولعان. وكىنىشكە وراي, بۇل ارەكەت قايعىلى اياقتالىپ, ول اۋىر جاراقاتتان كوز جۇمدى. مۇنداي ازىلدەر قاۋىپتى عانا ەمەس, سونىمەن بىرگە ادەپ نورمالارىنا سايكەس كەلمەيدى. قوعامدىق ءتارتىپتى بۇزىپ, قاۋىپسىزدىككە نۇقسان كەلتىرۋ ورنى تولماس سالدارعا اكەلۋى مۇمكىن. بۇل كورىنىستەردىڭ كۋاگەرلەرى قورقىنىشتان كۇيزەلىسكە ۇشىراسا, ورىنداۋشىلار ءوز ومىرلەرىن قاتەرگە تىگەدى.

ايتتىڭ نە, ايتپادىڭ نە, جىل باسىنان بەرى وسىنداي دەرەكتەر بويىنشا 24 ادام اكىمشىلىك جاۋاپكەرشىلىككە تارتىلعان. ىشكى ىستەر مينيسترلىگى پرانك ۇيىمداستىرىپ, كونتەنت جاسايتىن ازاماتتارعا Polisia.kz. ارقىلى ۇندەۋ جاساپ, اۆتورلار ەشكىمگە زيان كەلتىرمەيتىن كونتەنتتىڭ ورنىنا اگرەسسيا, ارانداتۋ, زورلىق-زومبىلىق كورسەتىپ, ومىرگە قاۋىپ توندىرەتىن ارەكەتتەرگە بارىپ جاتقانىن مالىمدەدى. مۇنداي ارەكەتتەر جالپىعا قاۋىپتى جانە قوعامدىق ءتارتىپتى بۇزادى.

«ىشكى ىستەر مينيسترلىگى ەسكەرتەدى: قوعامدىق ءتارتىپتى ورەسكەل بۇزاتىن, دۇربەلەڭ تۋعىزاتىن نەمەسە زيان كەلتىرەتىن, سونداي-اق ادامنىڭ ار-نامىسىن قورلايتىن ارەكەتتەر ءۇشىن اكىمشىلىك جانە قىلمىستىق جاۋاپكەرشىلىك كوزدەلگەن. بلوگەرلىك پەن كامەراعا ءتۇسىرۋ قۇقىق بۇزۋعا سىلتاۋ بولماۋى كەرەك. قاتىگەز پرانك پەن قاۋىپتى تريۋك – بۇل ونەر ەمەس, زاڭ بۇزۋشىلىق. كۇماندى كورىنىستى تۇسىرمەس بۇرىن نەمەسە وعان قاتىسپاس بۇرىن سالدارىن وي ەلەگىنەن وتكىزىڭىز. ومىردە دە, ينتەرنەتتە دە وزگەلەردىڭ سەزىمىن, قاۋىپسىزدىگىن جانە جەكە شەكاراسىن قۇرمەتتەڭىز. زاڭدى ساقتاڭىزدار جانە قۇقىقتىق جاۋاپكەرشىلىككە اكەلەتىن ارەكەتتەرگە بارماڭىزدار», دەدى ءىىم رەسمي وكىلى شىڭعىس الەكەشەۆ