«Qarmet» كومپانياسى «التىن گەفەست 2025» ۇلتتىق بايقاۋىندا ەرەكشە تسيفرلىق جوبالارى ءۇشىن «تاۋ-كەن مەتاللۋرگيا كەشەنىندەگى ەڭ ۇزدىك digital-شەشىم» ارنايى اتالىمىندا جەڭىمپاز اتاندى. كومپانيانىڭ كومىر دەپارتامەنتى ديسپەتچەرلىك-تالداۋ ورتالىعىن جانە ەلىمىزدە بالاماسى جوق – پەرسونال مەن تەحنيكا پوزيتسياسىن انىقتايتىن بىرىكتىرىلگەن جۇيەنى ازىرلەپ, ىسكە قوسقان.
ءار شاحتەرمەن جەكە بايلانىس جۇيەسى ورنايدى
ورتالىق 2024 جىلعى تامىزدا قاراعاندى قالاسىندا ىسكە قوسىلعان جانە قازىردىڭ وزىندە ناقتى ناتيجەلەر كورسەتىپ وتىر. شاحتالاردا گاز دەڭگەيىنىڭ كوتەرىلۋىنە بايلانىستى بولاتىن توتەنشە جاعدايلار سانى 43,8%-عا ازايعان. جوبا – «Qarmet» كومپانياسىنىڭ كەڭ كولەمدى تسيفرلاندىرۋ باعدارلاماسىنىڭ ءبىر بولىگى جانە وتاندىق DMMS وندىرىستىك باسقارۋ پلاتفورماسى نەگىزىندە جۇمىس ىستەيدى. جوبانىڭ نەگىزگى ماقساتى – وندىرىستىك قاۋىپسىزدىك دەڭگەيىن ارتتىرۋ جانە بارلىق 8 شاحتادا باسقارۋدى جاقسارتۋ. «Qarmet» اق تۇراقتى دامۋ جونىندەگى باسقارۋشى ديرەكتورى ەربول يسمايلوۆتىڭ ايتۋىنشا, جەراستى پوزيتسيالاۋ جۇيەسى قازىردىڭ وزىندە 4 شاحتادا ەنگىزىلگەن, جىل سوڭىنا دەيىن بارلىق شاحتادا جۇمىس ىستەيدى.
«بۇل جۇيە بىزگە ءار شاحتەردىڭ قاي جەردە ەكەنىن, ونىڭ جاعدايىن, جۇمىس ورنىنداعى اۋا مەن جەلدەتۋدىڭ جاي-كۇيىن باقىلاۋعا مۇمكىندىك بەرەدى. ءبىز جەر استىنداعى ءار قىزمەتكەرمەن بايلانىسقا شىعا الامىز», دەيدى ە.يسمايلوۆ.
ءوندىرىستى تسيفرلاندىرۋدىڭ پايداسى نەدە؟
كومىر دەپارتامەنتىنىڭ باس ەنەرگەتيگى يۋري باركوۆسكيدىڭ ايتۋىنشا, كەن ورىندارىنا جارىلىسقا ءتوزىمدى بەينەباقىلاۋ جۇيەسى ورناتىلعان.
«ول گازدى ورتادا دا جۇمىس ىستەيدى. كامەرالار بايلانىسقا قوسىلعان ساتتەن سوڭعى مينۋتقا دەيىن كورسەتەدى. وندا قۋاتتاۋشى ستانسالار بار. مۇنىمەن قوسا, شاحتالارعا كىرۋ تۋرنيكەتى مەن اۆتوماتتاندىرىلعان مەديتسينالىق قوندىرعىلار ورناتىلعان. ولار كەنشىنىڭ دەنساۋلىعىن بىردەن تەكسەرەدى. تالاپقا سايكەس كەلمەگەن جاعدايدا جەر استىندا جۇمىس ىستەۋىنە شەكتەۋ قويىلادى. ارنايى تەرمينالدار كەنشىلەردىڭ قاۋىپسىزدىك تۋرالى ءبىلىمىن جەتىلدىرۋىن قامتاماسىز ەتەدى. ولار سىناق تاپسىرىپ, ناتيجەلەرىن دەرەۋ كورەدى», دەيدى.
«Alarmphone» احۋالدى تۇزەيدى
بىلتىر مەملەكەت باسشىسى قاسىم-جومارت توقاەۆ قاراعاندىعا ساپارىندا «Qarmet»-ءتىڭ ديسپەتچەرلىك-تالداۋ ورتالىعىن ارالاپ كوردى. پرەزيدەنت شاحتەرلەردىڭ وندىرىستەگى قاۋىپسىزدىگىن قامتاماسىز ەتۋ باعىتىندا قابىلدانعان تىڭ شارالارمەن تانىستى. مەملەكەت باسشىسى «ساران» شاحتاسىندا, 620 مەتر تەرەڭدىكتە جۇمىس ىستەپ جاتقان كەنشىلەرمەن بەينەبايلانىس ارقىلى سويلەستى. كاسىپورىن جۇمىسشىلاردى جاڭا «alarmphone» قۇرىلعىسىمەن جابدىقتاعان. قورعانىس دەڭگەيى اسا جوعارى گادجەتتە قىزمەتكەرمەن جەدەل بايلانىسۋعا ارنالعان سمارتفون فۋنكتسياسى بار.
قاراعاندى وبلىسى