2025 جىلى قاڭتار مەن ءساۋىر ارالىعىندا نەگىزگى كاپيتالعا سالىنعان ينۆەستيتسيا 4,4 ترلن تەڭگەگە جەتتى. ءسويتىپ, جىلدىق ماندە 13,7%-عا ۇلعايدى. دەگەنمەن مۇنداي اسەرلى ءوسىم نەگىزىنەن وتكەن جىلعى تومەن بازانىڭ اسەرىمەن, سونداي-اق ەكونوميكانىڭ بيۋدجەتتىك سەكتورلارىنا كۇردەلى سالىمداردىڭ ايتارلىقتاي ارتۋىمەن بايلانىستى. بۇل رەتتە نەگىزگى ءوندىرىس سالالارىندا نە قالىپتى ءوسۋ قارقىنى, نە ينۆەستيتسيا كولەمىنىڭ تومەندەۋى بايقالدى.
ءوندىرۋشى سەكتوردىڭ قۇلدىراۋى اياسىندا وڭدەۋ ونەركاسىبى وڭ ديناميكا كورسەتتى: ەسەپتى كەزەڭدە ينۆەستيتسيا كولەمى 34,3%-عا ءوستى.
قارجى ساراپشىسى اندرەي چەبوتارەۆتىڭ ايتۋىنشا, بيۋدجەت قارجىسىنا دەگەن شامادان تىس بەيىمدەلۋشىلىك جاعدايدى وڭ باعىتقا قاراي بۇرمايدى. ياعني نارىق قاتىسۋشىلارىنىڭ ءوز بەتتەرىنشە ۇزاقمەرزىمدى جەكە كاپيتالدى تارتۋعا قاتىستى ىنتاسىن تومەندەتىپ جىبەرۋى ىقتيمال. سونداي-اق قاتىسۋشىلاردىڭ ىقىلاسى كەمىپ, يننوۆاتسيالىق بەلسەندىلىگى دە تومەندەيدى.
«سونىمەن قاتار قاتاڭ اقشا-نەسيە ساياساتى جانە جوعارى پايىزدىق مولشەرلەمەلەر جاعدايىندا جەكە قارىز الۋ مۇمكىندىكتەرى شەكتەۋلى بولىپ قالادى. بۇل ءوز كەزەگىندە قارجىلاندىرۋ قۇرىلىمىنداعى تەڭسىزدىكتى تۋدىرادى. قىسقا مەرزىمدىك باعدارمەن, جوعارى ينفلياتسيامەن جانە ەكونوميكالىق فاكتورلاردىڭ كۇشتى قۇبىلمالىلىعىمەن سيپاتتالاتىن قازىرگى ماكروەكونوميكالىق جاعدايدا ينۆەستيتسيالىق بەلسەندىلىك شەكتەلگەن كۇيىندە قالىپ وتىر. جوسپارلاۋ كوكجيەكتەرى تارىلىپ, سىرتقى جانە ىشكى تاۋەكەلدەر جوعارى دەڭگەيدە بولعاندا بيزنەسكە ستراتەگيالىق جوسپارلاردى قۇراستىرۋ قيىن. مۇنداي ورتادا ۇزاقمەرزىمدى ينۆەستيتسيالاۋ ماسەلەسى ۇلكەن بەلگىسىزدىككە ۇرىنادى. سالدارىنان كومپانيالاردىڭ ءوز رەسۋرسىن ءوندىرىس اۋقىمىن كەڭەيتۋگە, تەحنولوگيانى جاڭارتۋعا جانە جاڭا نارىقتاردى يگەرۋگە قارجى باعىتتاۋعا قاتىستى دايىندىعى دا تومەندەپ كەتەدى», دەيدى ساراپشى.
اندرەي چەبوتارەۆتىڭ پىكىرىنشە, ءوسۋدىڭ قازىرگى مودەلىن قالىپتاستىرۋدا مەملەكەتتىك قولداۋ ەرەكشە ءرول اتقارادى, ول اۋقىمى مەن قامتىلۋىنا قاراماستان تابيعاتى تۇرعىسىنان ۋاقىتشا جانە كومپەنساتسيالىق سيپاتتا بولادى.
«ەكونوميكالىق اگەنتتەردىڭ كوپشىلىگى ىسكەرلىك بەلسەندىلىكتىڭ قازىرگى كەڭەيۋى كوبىنە ەكونوميكانىڭ ىشكى تۇراقتىلىعىنان گورى فيسكالدىق ىنتالاندىرۋعا بايلانىستى ەكەنىن جاقسى ءتۇسىنىپ وتىر. بۇل تۇراقتى بيزنەس ۇلگىلەرىن قۇرۋدىڭ ورنىنا قىسقامەرزىمدى پايدا تابۋعا باعىتتالعان مىنەز-ق ۇلىقتى قالىپتاستىرادى», دەيدى قارجىگەر.