استانادا قازاقستاننىڭ حالىق اقىنى, بەلگىلى قوعام قايراتكەرى قونىسباي ءابىل 2012-2022 جىلدارى تۇرعان دوستىق داڭعىلى, 13-ۇيدە ەسكەرتكىش تاقتا اشىلدى, دەپ جازادى Egemen.kz.
سالتاناتتى راسىمگە پارلامەنت ءماجىلىسى مەن استانا قالاسى ءماسليحاتىنىڭ دەپۋتاتتارى, بەلگىلى قالامگەرلەر تولەن ابدىك, سەرىك تۇرعىنبەك ۇلى, ءورىس ياشۇكىرقىزى, كامال الپەيىسوۆا, اقىننىڭ وتباسى مەن شاكىرتتەرى قاتىستى.
جيىندى اشقان قازاقستان جازۋشىلار وداعى استانا فيليالىنىڭ ديرەكتورى, اقىن باۋىرجان باباجان ۇلى قونىسباي ءابىل قازاق ادەبيەتىنىڭ قازىناسىن, ونىڭ ىشىندە ايتىس ونەرىن بارىنشا بايىتىپ كەتكەنىن, سونداي-اق استانادا ۇلت مادەنيەتىنىڭ دامۋىنا قوسقان ۇلەسىنىڭ ولشەۋسىز ەكەنىن اتاپ ءوتتى.
«قونىسباي ءابىلدىڭ ۇيىمداستىرۋىمەن استانا قالاسىندا رەسپۋبليكالىق دەڭگەيدە 10 رەت اقىندار ايتىسى وتكىزىلدى. جاس ۇرپاقتى حالىق ەرتەگىلەرى كەيىپكەرلەرى رۋحىندا تاربيەلەۋ ماقساتىندا «تازشا بالا» بايقاۋى قولعا الىنىپ, ەل ىشىندەگى كوپتەگەن تالانتتاردىڭ تانىلۋىنا جول اشتى», دەدى باۋىرجان باباجان ۇلى.
العاشقى بولىپ ءسوز العان مەملەكەتتىك سىيلىقتىڭ لاۋرەاتى, جازۋشى تولەن ابدىك بۇگىنگى ءىس-شارا استانانىڭ رۋحاني الەمى مەن قازاق قوعامىنداعى ۇلكەن وقيعا ەكەنىن ايتتى. ۇلت رۋحانياتىن بيىككە كوتەرگەن ءبىرتۋار ازاماتتىڭ كىسىلىك كەلبەتى مەن تۇلعالىق قاسيەتىنە توقتالدى.
سونىمەن بىرگە پارلامەنت ءماجىلىسىنىڭ دەپۋتاتى, ايتىسكەر اقىن امانجول التاەۆ, استانا قالاسى ءماسليحاتىنىڭ دەپۋتاتى قانات ەستەك ءسوز سويلەپ, ەستەلىكتەر ايتتى. اقىننىڭ تۋىستارى اتىنان ءسوز العان اقتورتا ىسكەندىرقىزى استانا قالاسى اكىمدىگىنە, قالالىق تىلدەردى دامىتۋ جانە ارحيۆ ءىسى باسقارماسىنا العىسىن جەتكىزدى.
ەسكەرتكىش تاقتانى جازۋشى تولەن ابدىك پەن اقىننىڭ اپاسى اقتورتا ىسكەندىرقىزى اشتى.
قونىسباي ىسكەندىر ۇلى ءابىل ۇلت رۋحانياتى مەن مادەنيەتىنە ەلەۋلى ەڭبەك سىڭىرگەن كورنەكتى قايراتكەر, سازگەر, ساتيريك, جۋرناليست, قازاقستاننىڭ حالىق اقىنى. ولەڭدەرى مەن اندەرى حالىق اراسىندا كەڭىنەن تارالعان.
قونىسباي ءابىل ەلوردادا تىلدەردى دامىتۋ باسقارماسىن اشىپ, انا ءتىلىمىزدى وركەندەتۋ باعىتىندا بەل شەشە ەڭبەك ەتتى. سول كەزدەگى استانا قالاسى اكىمىنىڭ ورىنباسارى تولەگەن مۇحامەدجانوۆتىڭ باسشىلىعىمەن باسقارما جانىنان «رۋحانيات» مەملەكەتتىك ءتىلدى جەدەلدەتىپ وقىتۋ ورتالىعى اشىلىپ, وندا وزگە ۇلت وكىلدەرى ارنايى دايارلىقتان ءوتتى.
سول سەكىلدى ناۋرىز مەيرامىن حالىقتىق مەرەكە رەتىندە تويلاۋ, ءتىل فەستيۆالىن قالىپتاستىرۋ, اباي ەسكەرتكىشى جانىندا «پوەزيا ساعاتىن» ۇيىمداستىرۋ, ەلوردادا تۇراتىن قالامگەرلەرمەن كەزدەسۋلەر وتكىزۋ داستۇرگە اينالدى.
ەلوردا تورىندە ء«اي-ءاي اقىنعا» ەسكەرتكىش تاقتانىڭ اشىلۋى حالىق اقىنىنا ارنالعان يگى ىستەردىڭ باستاۋى بولارى انىق.
مۇحاربەك جاكەي ۇلى, جۋرناليست