پرەمەر-ءمينيستردىڭ ورىنباسارى قانات بوزىمباەۆ پەن «Power China Chengdu Engineering Corporation» ديرەكتورلار كەڭەسىنىڭ توراعاسى حە يانفەن ەنەرگەتيكا جانە سۋ رەسۋرستارى سالالارىنداعى ءوزارا ءتيىمدى ىنتىماقتاستىقتى كەڭەيتۋ كەلەشەگىن تالقىلادى.
«Power China Chengdu» – جوبالاۋ مەن ينۆەستيتسيالاۋدان باستاپ قۇرىلىس پەن پايدالانۋعا بەرۋگە دەيىنگى تولىق قىزمەتتەر تىزبەگىن ۇسىناتىن الەمدەگى جەتەكشى كومپانيالاردىڭ ءبىرى. بۇگىندە «Power China Chengdu» قازاقستاندا بىرقاتار ءىرى جوبانى جۇزەگە اسىردى. ولاردىڭ قاتارىندا «مويناق» سۋ ەلەكتر ستانساسى, «جاڭاتاس» جانە «شەلەك» جەل ەلەكتر ستانسالارى بار. قازىرگى تاڭدا «حرومتاۋ» جانە «ارقالىق» جەل ەلەكتر ستانسالارىن ىسكە قوسۋعا دايىندىق جۇرگىزىلىپ جاتىر.
كەلىسسوزدەر بارىسىندا قىتايلىق تاراپ يرريگاتسيا جانە سۋ شارۋاشىلىعى سالالارىنداعى جوبالارعا قاتىسۋعا قىزىعۋشىلىق تانىتتى. ءوز كەزەگىندە قانات بوزىمباەۆ ەلدەگى ءىرى ينفراقۇرىلىمدىق جوبالار تۋرالى ايتىپ ءوتتى, ولاردىڭ قاتارىندا الاتاۋ قالاسىنىڭ قۇرىلىسى مەن كوممۋنالدىق جانە ەنەرگەتيكالىق سەكتورلاردى جاڭعىرتۋ جونىندەگى ۇلتتىق جوبا بار.
كادر دايارلاۋ ماسەلەسىنە دە ەرەكشە نازار اۋدارىلدى. قانات بوزىمباەۆ تاراپتاردىڭ بىرلەسكەن جۇمىسىنىڭ ماڭىزدى باعىتتارىنىڭ ءبىرى رەتىندە تاراز قالاسىنداعى قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ بازاسىندا جاس مامانداردى دايارلاۋ تۋرالى ايتتى.
كەزدەسۋ سوڭىندا تاراپتار بىرلەسكەن باستامالاردىڭ الەۋەتىن اتاپ ءوتىپ, ىنتىماقتاستىقتى ودان ءارى نىعايتۋعا ءوزارا نيەتتەرىن ءبىلدىردى.