الەۋمەتتىك جەلىلەردە شىعىس قازاقستان وبلىسىندا ءبىر توپ ادامنىڭ جاس جىگىتتى ۇرلاپ, ارتىنان ونىڭ دەنەسىن وسكەمەن قالاسىنداعى اۋرۋحانا الدىنا قالدىرىپ كەتكەنى تۋرالى اقپارات تارادى. بۇل جاعدايعا قاتىستى پوليتسيا تەرگەۋ جۇرگىزىپ جاتىر, دەپ حابارلايدى Egemen.kz.
شقو پوليتسيا دەپارتامەنتى بۇل اقپاراتتى راستاپ, قىلمىسقا قاتىسى بار كۇدىكتىلەردىڭ جەكە باسىن انىقتاعان.
«قازىر ءۇش ەر ادام ۇستالىپ, ۋاقىتشا ۇستاۋ يزولياتورىنا قامالدى. تاعى ءۇش كۇدىكتىگە ىزدەۋ جاريالاندى. وقيعانىڭ ءمان-جايىن جانە سەبەپتەرىن انىقتاۋ ءۇشىن بارلىق قاجەتتى جەدەل-تەرگەۋ ءىس-شارالارى جۇرگىزىلىپ جاتىر», دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
سونىمەن قاتار, ۆەدومستۆو قازىرگى تاڭدا الەۋمەتتىك جەلىلەردە تاراعان «قاۋىپتى قىلمىسكەرلەر قاشىپ كەتتى» دەگەن اقپاراتتى جوققا شىعاردى. بۇل جالعان مالىمەتكە بايلانىستى پوليتسيا حالىقتى تەك رەسمي دەرەككوزدەرگە سەنۋگە شاقىردى.
«قوعامدا نەگىزسىز دۇربەلەڭ تۋدىرماۋ ءۇشىن ازاماتتاردى تەكسەرىلمەگەن اقپارات تاراتپاۋعا شاقىرامىز. بەلوۋسوۆكا كەنتىندەگى ەممج پاترۋلدەرىنىڭ قاتىسۋىمەن جۇرگىزىلگەن شارالار جوسپارلى سيپاتتا بولدى», دەلىنگەن حابارلامادا.
بۇعان دەيىن پاۆلودار وبلىسىندا بۇرىنعى پوليتسيا قىزمەتكەرلەرى دە قاتىسقان قىلمىستىق توپ ۇستالىپ, ولار ادام ۇرلاۋ جانە ءىرى كولەمدە اقشا بوپسالاۋمەن اينالىستى دەگەن كۇدىككە ىلىنگەن بولاتىن.