حالىقارالىق بالالار كۇنى مەرەكەسىندە جامبىل وبلىسىنىڭ اكىمى ەربول قاراشوكەەۆتىڭ قاتىسۋىمەن «زەربۇلاق» دەمالىس كەشەنىندە اۋقىمدى مەرەكەلىك ءىس-شارا ءوتتى, دەپ حابارلايدى Egemen.kz.
ءوڭىر باسشىسى جامبىلدىق بۇلدىرشىندەردى ايتۋلى مەرەكەمەن قۇتتىقتاپ, جىلى لەبىزىن جەتكىزدى.
«بالا – ءبىزدىڭ بولاشاعىمىز, ەلىمىزدىڭ ەرتەڭى. دۇنيەدە بالادان اسىل, ءسابيدىڭ كۇلكىسىنەن قىمبات قازىنا جوق. مەملەكەت باسشىسى قاسىم-جومارت كەمەل ۇلى توقاەۆ بالالارعا جاعداي جاساۋ, ولاردىڭ الاڭسىز, ساپالى ءبىلىم الۋىن تۇراقتى باقىلاۋدا ۇستاپ كەلەدى.
وڭىردە بالالاردىڭ جان-جاقتى دامۋىنا, ءال-اۋقاتىن ارتتىرۋعا باعىتتالعان ناقتى جۇمىستار اتقارىلىپ جاتىر. جاڭا مەكتەپتەر مەن بالاباقشالار اشىلىپ, ءبىلىم وشاقتارى زاماناۋي قۇرال-جابدىقتارمەن قامتاماسىز ەتىلگەن. بارشا بۇلدىرشىنگە شۋاقتى جاز ايىمەن قاتار كەلگەن مەرەكەدە شاتتىققا تولى بالالىق شاق پەن باقىتتى عۇمىر تىلەيمىن! – دەدى ەربول قاراشوكەەۆ.
ءىس-شارا بارىسىندا بالالاردىڭ كوڭىلىن كوتەرىپ, ونەرى مەن دارىنىن دامىتۋعا باعىتتالعان ءتۇرلى ويىن-ساۋىق باعدارلامالارى مەن شىعارماشىلىق كورىنىستەر ۇيىمداستىرىلدى. كىشكەنتاي قاتىسۋشىلارعا شاتتىق پەن كوتەرىڭكى كوڭىل كۇي سىيلاعان بۇل كۇن جارقىن اسەرلەرگە تولى بولدى.
«باقىتتى بالا – باقىتتى ەل» تاقىرىبىندا وتكەن مەرەكەلىك ءىس-شارا تەك وبلىس ورتالىعىندا عانا ەمەس, اۋدانداردا دا جەرگىلىكتى بيلىكتىڭ قاتىسۋىمەن جوعارى دەڭگەيدە وتكىزىلدى. ءىس-شارا اياسىندا مەرەكەلىك كونتسەرتتەر, سپورتتىق جارىستار, شىعارماشىلىق بايقاۋلار مەن شەبەرلىك ساباقتارى ۇيىمداستىرىلىپ, ولارعا 4 مىڭعا جۋىق بالا بەلسەنە قاتىستى.
جامبىل وبلىسى