جەتىسۋ جەرى قاشاندا دارىندىلارىن ەلەپ-ەسكەرىپ, تالانتتى پەرزەنتتەرىنە قۇرمەت كورسەتۋدەن جالىققان ەمەس. ءيسى قازاقتىڭ تۇلعاسىنا اينالعان ءانۋار ءالىمجانوۆتىڭ 95 جىلدىق تورقالى تويى مۇندا كەڭ كولەمدە اتالىپ ءوتىلدى. قازاق ادەبيەتىنىڭ كورنەكتى وكىلى, جازۋشى, مەملەكەت قايراتكەرىنىڭ مەرەيتويىنا وراي رەسپۋبليكالىق عىلىمي-تانىمدىق كونفەرەنتسيا وتكىزىلدى.
قالامگەر تۋعان وڭىردەگى قابانباي اۋىلىنا ارنايى ات باسىن بۇرعان وبلىس اكىمى بەيبىت يساباەۆ, ءماجىلىس دەپۋتاتى ەرلان سايروۆ, مەملەكەتتىك سىيلىقتىڭ لاۋرەاتى, اقىن ۇلىقبەك ەسداۋلەت, عالىمدار, قالامگەرلەر, جالپى اۋدان جۇرتشىلىعى ءانۋار ءالىمجانوۆتىڭ رۋحىنا تاعزىم جاسادى. بەرەكەلى اۋىلدىڭ ورتالىعىندا ورنالاسقان قالامگەر اتىنداعى ساياباقتاعى بيۋستىنە گۇل شوقتارىن قويدى. بۇدان ءارى شارا قابانباي اۋىلدىق مادەنيەت ۇيىندە «الەمگە ايگىلى ءانۋار» اتتى عىلىمي-تانىمدىق كونفەرەنتسيامەن جالعاستى.
مادەنيەت ءۇيىنىڭ فويەسىندە مۋزەي ەكسپوناتتارىنان, كىتاپتاردان كورمە ۇيىمداستىرىلىپ, ءا.الىمجانوۆقا ارنالعان بەينەفيلم كورسەتىلدى. كونفەرەنتسيانى اشقان وبلىس اكىمى بەيبىت يساباەۆ جەتىسۋ جەرىنە قادام باسقان كوپشىلىككە «قوش كەلدىڭىزدەر» دەي وتىرىپ, الدىمەن مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
مەرەيتويعا جولدانعان پرەزيدەنتتىڭ وسى قۇتتىقتاۋ حاتى مەن پارلامەنت ءماجىلىسى توراعاسىنىڭ قۇتتىقتاۋى اۋىلداعى قابانباي اتىنداعى تاريحي-ولكەتانۋ مۋزەيىنىڭ قورىنا تاپسىرىلدى. كونفەرەنتسيا بارىسىندا ءانۋار ءالىمجانوۆتىڭ ەلدىك مۇددە جولىنداعى قارىمدى قايراتكەرلىگى, جازۋشىلىق قىرى, تۇلعالاردى تانىتۋداعى ەرەن ەڭبەگى كەڭىنەن باياندالدى.
«جازۋشىلاردىڭ ءبارى دە ەڭبەكتەنەدى, بىراق كوپتىڭ ىشىنەن وزا شاۋىپ, حالىقتىڭ كوڭىلىندە, تاريحتىڭ جادىندا قالاتىن قايراتكەرلەر كوپ ەمەس. ءانۋار تۇرلىبەك ۇلى سونداي ايتۋلى ازاماتتاردىڭ قاتارىندا. ول – ءابۋ-ناسىر ءال-ءفارابيدى ورتامىزعا الىپ كەلگەن تۇلعالاردىڭ ءبىرى. ول كەزدە عىلىمي, ادەبي ورتا اقجان ءال-ماشاني ارقىلى ءال-ءفارابيدى تانىعانىمەن, جالپى قوعام تولىق بىلە قويماعان ەدى. ءانۋار ءالىمجانوۆ ونىڭ تەگى قىپشاق ەكەنىن, وتىرار قالاسىنان شىققانىن دالەلدەپ, ءومىر جولىن باياندايتىن «وتىراردان جەتكەن سىي», «ۇستازدىڭ ورالۋى» سياقتى شىعارمالارىن جازدى. الماتىداعى داڭعىلعا ءال-فارابي ەسىمى بەرىلۋىن كوتەرىپ, وعان كوپ ەڭبەك سىڭىرگەنىن بۇگىنگى ۇرپاقتىڭ ءبىلىپ جۇرگەنى ءجون», دەگەن حالىقارالىق «الاش» ادەبي سىيلىعىنىڭ لاۋرەاتى, جازۋشى نۇرداۋلەت اقىش اياۋلى اعامىزدىڭ وزگە دە قىرلارىنا كەڭىنەن توقتالدى.
وسى تاقىلەتتەس ەستەلىكتەر مەن جازۋشى تۇرعىسىنداعى سونى پىكىرلەر ايتىلعان كونفەرەنتسيادا فيلولوگيا عىلىمدارىنىڭ دوكتورى, پروفەسسور, ءانۋارتانۋشى كاكەن حامزين: ء«بىز ءانۋار ءالىمجانوۆتى جەكەشەلەندىرە المايمىز, ول بۇكىل قازاققا ورتاق پەرزەنت, ءتىپتى حالىقارالىق كەڭىستىككە اتى كەتكەن اسا كورنەكتى قايراتكەر. كەلەشەكتە بۇدان دا سالماقتى حالىقارالىق دەڭگەيدەگى ءىس-شارا وتەرىنە كامىل سەنەمىن», دەدى.
ءوز كەزەگىندە اقىن ۇلىقبەك ەسداۋلەت جازۋشىنىڭ حالىقارالىق ادەبي بايلانىستاردى نىعايتۋداعى رولىنە توقتالدى: زاڭعار جازۋشى مۇحتار اۋەزوۆتىڭ: ء«بىرىنشى پەتر ەۋروپاعا تەرەزە تەسكەن بولسا, ءانۋار ءالىمجانوۆ ازياعا ايقارا جول اشتى», – دەيتىن ءسوزى بار. راسىندا ءالىمجانوۆ كسرو-نىڭ ازيا, افريكا جازۋشىلارىمەن بايلانىس جونىندەگى كوميتەتى توراعاسىنىڭ ورىنباسارى, ءدال وسىنداي ەۋروپا جازۋشىلارىمەن بايلانىس جونىندەگى كوميسسيانىڭ بەلسەندى مۇشەسى بولدى. بۇل الەم ادەبيەتىمەن تىكەلەي بايلانىس جاساپ وتىرعان قازاقتىڭ وكىلى دەگەن ءسوز», دەدى ۇ.ەسداۋلەت.
كونفەرەنتسيا بارىسىندا بەلگىلى قالامگەر, الماتى وبلىسىنىڭ قۇرمەتتى ازاماتى ءالي ىسقاباي جازۋشى تۋرالى تولعامىن جەتكىزسە, حالىقارالىق «الاش» ادەبي سىيلىعىنىڭ لاۋرەاتى قۋات قايرانباەۆ جازۋشى رۋحىنا ارنالعان جىرىن وقىدى.
ء«انۋار اعامىزدىڭ رۋحاني بولمىسىنا بويلادىق, اسقاق تۇرپاتىن كوزگە ەلەستەتتىك. ەندى وسى مەرەيتوي ۇستىندە ساكەن اعامىزدىڭ ءانۋار ءالىمجانوۆ قايتىس بولعاندا جازعان ولەڭىن وقىپ بەرۋدى ءجون سانادىم», دەپ قوس تۇلعانى تەڭ كوتەرە تولعانعان «قۇرمەت» وردەنىنىڭ يەگەرى, اقىن جۇماتاي وسپان ۇلى جىرعا كەزەك بەردى. «اعام بار ەدى ءمىر ءتىلدى, جاعام بار ەدى – جىرتىلدى! قان جىلاپ تۇرعان جۇرەكپەن, جۇباتام قالاي جۇرتىمدى؟», – دەپ كەلەتىن ساكەن يماناسوۆ جىرىمەن تۇيىندەلگەن كونفەرەنتسيادان سوڭ كوپشىلىك جازۋشىنىڭ رۋحىنا ارنالعان اسقا قاتىستى.
جەتىسۋ وبلىسى