كاسىپورىن كولىك شينالارىن شىعارا باستادى

ءسويتىپ, بۇعان دەيىن تەك شەتەلدىك شينا تاعىنعان تەمىر تۇلپارلار ەندى تولىقتاي وتاندىق ونىممەن قامتىلا باستايدى. باستاپقى 900 داناسى قوستانايداعى «Allur» كاسىپورنىنا جىبەرىلدى. ەندى 205/55 R16 مولشەرلى «Attar S01» مودەلدى جازدىق شينالار وتاندىق جەڭىل اۆتوكولىكتەردىڭ دوڭگەلەگىنە تاعىلادى.

«شينا قۇرىلىمى 7 نەگىزگى ەلەمەنتتەن تۇرادى. گەرموقابات ءونىمنىڭ گەرمەتيكالىعىن قامتا­ماسىز ەتىپ, اۋانىڭ سىرتقا شى­عۋى­نا جول بەرمەيدى. بورتتىق ساقينالار مەن قاناتشالار شينا مەن دوڭگەلەك ديسكىسىنىڭ دۇرىس ورنالاسۋىن قامتاماسىز ەتەدى. كەلەسى ەلەمەنت – بۇيىرلىك بولىكتەر, وسى ارادا بارلىق جازۋ ايقىن وقىلىپ, كورىنەدى. ودان كەيىن قاباتتاسىپ ورنالاسقان كاركاس كەلەدى. ول ەكى تۇرگە بولىنەدى: ماتالى جانە مەتالدى (برەكەر). نەگىزگى مىندەتى – شينانى مەحانيكالىق زاقىمدانۋدان مەيلىنشە قورعاۋ. سوڭعى ەلەمەنتى – پروتەكتور. وسى جەتىلگەن 7 ەلەمەنتتىڭ ارقايسى­سى ارنايى جابدىق قالىبىندا وندىرىلەدى», دەيدى «Tengri Tyres» جشس ديرەكتورىنىڭ ءوندىرىس جانە تەحنيكالىق قامتاماسىز ەتۋ جونىندەگى ورىنباسارى ماكسيم بەلياۆسكي.

ءونىم الدىن الا «ومولوگاتسيادان» وتكەن. بۇل – ءونىمنىڭ نەمەسە تەحنيكالىق قۇرىلعى­نىڭ ءتيىستى ستاندارت پەن تالاپقا ساي­كەس ەكە­نىن رەسمي راستاۋ. بۇل ءۇردىس كوبىنە اۆتوكولىك ونەركاسى­بىندە قۇرىل­عىلاردى پايدالانۋ قاۋىپ­سىزدىگى مەن تيىمدىلىگىن تەكسەرۋ ءۇشىن قول­دانى­لادى. نارىقتا ومولوگاتسياسىز ءونىمدى سەرتيفيكاتتاۋ جانە ساتۋ مۇلدە مۇم­كىن ەمەس. دەمەك ءونىمنىڭ نارىققا شىعۋى­نا جانە ونىڭ قاۋىپسىزدىگىن قامتاماسىز ەتۋگە كەپىلدىك بار.

زاۋىتتاعى باقىلاۋ ءۇردىسى قاتاڭ. ءار شينا مىندەتتى ۆيزۋال­دى تەكسەرۋدەن سوڭ, اۆتوماتتى قۇرالدارمەن سىناقتان وتەدى. تەحنيكالىق تەكسەرۋدەن وتپەگەن ءونىم جارامسىز دەپ تانىلىپ, قايتا وڭدەلەدى.

ءوندىرىس رەتتىلىگى 5 كەزەڭدى قامتيدى. العاش­­­قى­­دا ءارتۇرلى شي­كىزات تۇرىنەن رەزەڭكە قوسپا­لار ازىرلەنەدى. سوسىن ساپالى شينانىڭ جاب­دىق­تارى (ماتالى كورد, برەكەر, پروتەك­تور) دايىن­­دالادى. ودان كەيىن بارلى­عى جيناق­تا­لىپ, شينا قالىبى­نا كەلگەندە ونى ۆۋل­­كا­­ني­­زاتسيا­لاۋ ۇدەرىسى جۇرەدى. كۇردەلى قالىپ­تاۋ امالدارى ارناۋلى قالىپتا جوعارى قىسىم مەن بەلگىلى ءبىر تەمپەراتۋرادا جۇزەگە اسىرىلا­دى. وسىلايشا, رەزەڭكە قوسپا­سى ءوز قاسيەتتەرىن وزگەرتىپ, قاجەت­تى پروتەكتور مەن بۇيىرلىك بولىك­تەردىڭ سۋرەتىمەن سوڭعى ءپىشىنى شىعادى. سوڭىندا دايىن ءونىم وتە مۇقيات تەكسەرىستەن وتەدى.

شينا زاۋىتىنىڭ قۇرىلىسى 2021 جىلى ساران يندۋستريالىق ايماعىندا باستالدى. ال­پاۋىت جوباعا ينۆەستورلار – پاو «تاتنەفت» اشىق اق مەن «گك «الليۋر» اق ءارتاراپ­­تى قول­داۋ كورسەتكەن. قۇيىلعان جالپى ينۆەستيتسيا كولەمى – 531,8 ملن دوللار. زاۋىت الاڭى – 106 مىڭ شار­شى مەتر. كاسىپورىندا الەم­دىك وندىرۋشىلەردىڭ زاماناۋي جاب­­دىق­تا­رى بار. وزىق تەحنولوگيا رەزەڭكە قوس­پا­لاردى ازىرلەۋدەن باستاپ, جيناقتاۋ مەن ۆۋلكانيزاتسياعا دەيىن تولىق تسيكلمەن شينالاردى وندىرۋگە مەيلىنشە مۇمكىندىك بەرىپ وتىر. مۇنداي ءوندىرىس ورنى ەكسپورتتىق باعىت­تى دا دامىتادى.

زاۋىت جىلىنا 3 ملن جەڭىل جانە 500 مىڭ جۇك كولىگىنە ارنال­عان شينا شىعارا الادى. بىل­تىر ماۋسىمدا «Attar» برەندىنىڭ جەڭىل اۆتوكولىكتەرىنە ارنال­عان شينالاردىڭ سەريا­­­لىق ءوندىرىسى جولعا قويىلدى. جەڭىل اۆ­توكولىك­تەر مەن جول تالعامايتىن تەمىر تۇل­­پار­لارعا ارنال­عان قوس مو­دەلدى شينا ازىرلەندى. مۇنى­­­مەن قوسا, قىسقى شينانىڭ دا تۇرلەرىن شى­عار­دى.

«Attar» برەندىنىڭ ونىمدەرى وتكەن جىلدان بەرى ىشكى نارىققا شىعارىلدى. شينالار رەسمي ديستريبيۋتورلاردىڭ مامان­داندىرىلعان دۇكەندەر جەلىسى ارقىلى ساۋداعا تۇسكەن. ديلەر­لىك ورتا­لىقتار ارقىلى ساتىلادى. ەكسپورت ماسە­لەسى دە جولعا قو­يىل­­عان. بىلتىر جازدا «Attar» شينا­لارىنىڭ رەسەيگە العاشقى جەت­­كىزىلىم­­­­­دەرى باستالدى. كاسىپ­ورىننىڭ وتاندىق اۆتوزاۋىتتارمەن دە ىنتىماقتاستىعى بار», دەيدى ماكسيم بەلياۆسكي.

قازىر زاۋىتتا شامامەن 800 ادام جۇمىس ىستەيدى. كەلەشەكتە ولاردىڭ سانى 1100-گە دەيىن ارتۋى مۇمكىن. قىزمەتكەرلەردىڭ كوبى شەتەلدە ارنايى تاعىلىمدامادان وتكەن.

قاراعاندى وبلىسى,

ساران قالاسى