رەسەي مەن ۋكراينا ستامبۋلداعى كەلىسسوزدەردەن كەيىن «1000-عا 1000» فورماتى بويىنشا تۇتقىندار الماسۋ ءۇردىسىن اياقتادى, دەپ حابارلايدى Egemen.kz رەسەيلىك جانە ۋكراينالىق دەرەككوزدەرگە سىلتەمە جاساپ.
الماسۋ ءۇردىسى ءۇش كۇنگە سوزىلدى. جەكسەنبى كۇنى تاراپتار 303 ادامنان الماستى. رەسەي قورعانىس مينيسترلىگىنىڭ مالىمەتىنشە, بوساتىلعان رەسەيلىك اسكەري قىزمەتكەرلەر بەلارۋسياعا جەتكىزىلدى, وندا ولارعا قاجەتتى مەديتسينالىق جانە پسيحولوگيالىق كومەك كورسەتىلۋدە.
ۋكراينانىڭ اسكەري تۇتقىندار ماسەلەلەرى جونىندەگى ۇيلەستىرۋ شتابىنىڭ حابارلاۋىنشا, تاراپتار بيىلدىققا التىنشى رەت تۇتقىن الماسىپ وتىر. ال ەكى ەل اراسىنداعى اسكەري قاقتىعىس باستالعالى مۇنداي الماسۋ 65 مارتە بولىپتى. 2022 جىلعى ناۋرىزدان بەرى كەلىسسوزدەر مەن تۇتقىن الماسۋدى ۇيلەستىرۋ شتابى 5757 ۋكراين ازاماتىن بوساتقان. تاعى 536 ۋكراين ازاماتى الماسۋسىز قايتارىلعان.
«بوستاندىق العان اسكەريلەردىڭ بارىنە قاجەتتى مەديتسينالىق كومەك كورسەتىلىپ, وڭالتۋدان وتەدى, سونىمەن قاتار تۇتقىندا بولعان ۋاقىتى ءۇشىن ءتيىستى وتەماقى تولەنىپ, ءبىر رەتتىك ماتەريالدىق كومەكتى الادى», دەلىنگەن شتاب حابارلاماسىندا.
بوساتىلعاندار قاتارىندا اسكەري-تەڭىز كۇشتەرى, اۋە كۇشتەرى, دەسانتتىق-شابۋىلداۋشى اسكەرلەر, تەرريتوريالىق قورعانىس كۇشتەرى, سونداي-اق ۇلتتىق گۆارديا, مەملەكەتتىك شەكارا قىزمەتى جانە مەملەكەتتىك ارنايى كولىك قىزمەتىنىڭ قىزمەتكەرلەرى بار.