الماتى قالاسىنىڭ ەكس-اكىمى ەربولات دوساەۆ مەگاپوليستى باسقارۋ ءوزى ءۇشىن ۇلكەن جاۋاپكەرشىلىك بولعانىن ايتتى.
- ەڭ الدىمەن, تۋعان قالاما ەلىمىزدىڭ ەڭ قيىن كەزەڭدەرىنىڭ بىرىندە قىزمەت ەتۋگە سەنىم مەن مۇمكىندىك بەرگەنى ءۇشىن مەملەكەت باسشىسى قاسىم-جومارت كەمەل ۇلى توقاەۆقا شىن جۇرەكتەن ريزاشىلىعىمدى بىلدىرەمىن. بۇل مەن ءۇشىن ەرەكشە مارتەبە جانە ۇلكەن جاۋاپكەرشىلىك بولدى.
العاشقى جۇمىس كۇننەن باستاپ وسى جوعارى سەنىمدى اقتاۋ ءۇشىن بارلىق ءبىلىمىم مەن تاجىريبەمدى سالىپ, الماتىنى تۇراقتى دامۋ جولىنا شىعارۋعا تىرىستىم. وتكەن ءۇش جىلدان استام ۋاقىت مەن ءۇشىن كۇردەلى سىناقتار مەن ماڭىزدى جەتىستىكتەرگە تولى كەزەڭ بولدى. قالانىڭ دامۋىنا جانە تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان ناقتى وزگەرىستەر ۋاقىتىنا اينالدى, - دەگەن قالانىڭ بۇرىنعى باسشىسى.
ونىڭ دەرەگىنشە, مەملەكەت باسشىسىنىڭ تاپسىرماسىمەن جانە تىكەلەي قولداۋىمەن الماتىنىڭ بولاشاق دامۋىن ايقىندايتىن 20-دان استام ستراتەگيالىق قۇجات قابىلداندى. اتاپ ايتقاندا, الماتى قالاسىنىڭ 2030 جىلعا دەيىنگى دامۋ باعدارلاماسى, الماتىنىڭ 2040 جىلعا دەيىنگى جاڭا باس جوسپارى, قالانىڭ كولىك كاركاسىنىڭ ماستەر-پلانى جانە ت.ب. ماڭىزدى قۇجاتتار.
سوڭعى 3 جىلدا قالانىڭ بۇكىل ينجەنەرلىك ينفراسترۋكتۋراسىن اۋقىمدى مودەرنيزاتسيالاۋ باستالدى. 540 كم سۋ قۇبىرى جانە كارىز جۇيەلەرى جاڭارتىلدى, 75 كم جاڭا جول سالىنىپ, 650 كم جول جوندەلدى.
- پرەزيدەنتىمىزدىڭ تۋعان قالاسىن دامىتۋ مەن جاڭعىرتۋعا كورسەتكەن تىكەلەي قولداۋىنىڭ, الماتىلىقتاردىڭ تۇراقتى نازارى مەن بەلسەندى قولداۋىنىڭ ارقاسىندا ءبىز الماتىنىڭ ورنىقتى الەۋمەتتىك-ەكونوميكالىق دامۋى ءۇشىن بەرىك نەگىز قالادىق. وتكەن ءۇش جىلدا الماتى ەكونوميكاسى 20%-دان استامعا ءوسىپ, 29 ترلن تەڭگەدەن استى. ال الماتى بيۋدجەتىنىڭ كىرىسى 2022 جىلدىڭ باسىمەن سالىستىرعاندا 2,2 ەسەدەن استام ءوسىپ, 2,5 ترلن تەڭگەگە جەتتى.
ءبىزدىڭ باستى مىندەتىمىز – الماتىلىقتاردىڭ ءومىر ساپاسىن جاقسارتۋ. بۇل ەڭ الدىمەن الەۋمەتتىك ينفراسترۋكتۋرانى اۋقىمدى دامىتۋ, مەكتەپتەر مەن بالاباقشالار سالۋ ارقىلى جۇزەگە اسىرىلدى. بۇل ماسەلە پرەزيدەنتىمىزدىڭ تۇراقتى باقىلاۋىندا. سوڭعى ءۇش جىلدان استام ۋاقىتتا قالامىزدا 57 وقۋ ورنى سالىنىپ, جاڭارتىلدى (جالپى سانى 2022 جىلى 416 ءبىلىم بەرۋ ۇيىمىنان 434-كە جەتكىزىلدى). سونىمەن قاتار, 12 دەنساۋلىق ساقتاۋ نىسانى سالىندى جانە جاڭعىرتىلدى.
ءبىزدىڭ جۇمىسىمىزدىڭ ماڭىزدى باعىتى الماتى ەكونوميكاسىن ءارتاراپتاندىرۋ بولدى. ءۇش جىلدان استام ۋاقىت ىشىندە 5 ترلن تەڭگەدەن استام قاراجات تارتىلدى, قالا ەكونوميكاسىنداعى شاعىن جانە ورتا بيزنەستىڭ ۇلەسى العاش رەت 60%-دان استى, ال الماتىدان ەاەو ەلدەرىنە دايىن ءونىم ەكسپورتى 3 ەسەگە ءوسىپ, 2024 جىلدىڭ قورىتىندىسى بويىنشا 2 ملرد اقش دوللارىنان استى, - دەيدى ە.دوساەۆ.
ول بۇل ناتيجەلەرگە مەملەكەت باسشىسىنىڭ, الماتىلىقتاردىڭ تۇراقتى قولداۋىنىڭ جانە قالانىڭ ناعىز كاسىبي ماماندارى مەن پاتريوتتارىنان قۇرالعان كوماندانىڭ جۇمىسىنىڭ ارقاسىندا عانا قول جەتكىزىلگەنىن اتاپ وتەدى.
- بۇگىن, وسى مۇمكىندىكتى پايدالانا وتىرىپ, قيىن-قىستاۋ ساتتەردە بەلسەندى اتسالىسىپ, قولداۋ كورسەتكەندەرىڭىز ءۇشىن سىزدەردىڭ بارشاڭىزعا شىن جۇرەكتەن راقمەتىمدى ايتقىم كەلەدى.
مەن ءومىر ءسۇرۋ ساپاسى جوعارى جانە جايلى قالالىق ورتاسى بار ەڭ زاماناۋي ءارى دامىعان مەگاپوليس رەتىندە الماتىنىڭ بولاشاعىنا شىن جۇرەكتەن سەنەمىن, - دەگەن بۇرىنعى اكىم.