الماتىداعى مەملەكەتتىك ورتالىق مۋزەيدە «سۋداعى شەڭبەرلەر» اتتى سۋرەت كورمەسى اشىلدى. «يابلونەۆايا پاليترا» كاسىبي سۋرەتشىلەر قاۋىمداستىعىنىڭ شىعارماشىلىق الەۋەتىن كورسەتكەن ونەر جارمەڭكەسىنە 40-قا جۋىق قىلقالام شەبەرىنىڭ ۇزدىك تۋىندىلارى قويىلدى.
كەنەپتەگى سىرلى بوياۋلار جانعا جىلىلىق سىيلايدى. جارقىن پاليترا, تاقىرىپ تاڭداۋداعى باتىلدىق ءومىردىڭ ارايلى ساتتەرىن قانىق تۇسكە بوياپ, باعالاي بىلگەن جانعا تىرشىلىكتىڭ ءار مينۋتى قايتالانباس قۋانىش ەكەنىن ۇمىتپاۋعا شاقىرادى. سۋرەتشىلەردىڭ وبرازدىق پايىمداۋلارىنان ونەردىڭ ءورىسى سونشالىقتى كەڭ ەكەنىن كورەسىز. كەسكىندەمە, گرافيكا جانرلارىندا ورىندالعان 100-گە جۋىق شىعارمانىڭ تاقىرىبى ورتاق بولعانىمەن, ايتار ويى سان الۋان.
راسىمەن دە, ءار سۋرەتشىنىڭ دۇنيەنى قابىلداۋى ءبىر-بىرىنە ۇقسامايدى. «سۋداعى شەڭبەرلەر» تاقىرىبىنا بويلاعان شەبەرلەر بۇل قۇبىلىستى رەاليستىك تۇرعىدان عانا ەمەس, فيلوسوفيالىق جانە ەكولوگيالىق كوزقاراسپەن دە بەينەلەۋگە كۇش سالعان. سۋ بەتىنە تارالعان شەڭبەرلەر – كەڭىستىككە تارالاتىن ويلار سەكىلدى سەزىمدەردى وياتىپ, ەستەلىكتەر تۋدىرادى. بۇل ادامزاتتىڭ تابيعاتقا, قورشاعان ورتاعا دەگەن سۇيىسپەنشىلىگى مەن بايىپتى قارىم-قاتىناسىنا ارنالعان تولعامدار توپتاماسى.
«شەڭبەر – ارقاشان ءومىردىڭ بەلگىلى ءبىر تەپە-تەڭدىگىن ساقتايتىن تابيعات ۇيلەسىمى. ول تابيعات اياسىنداعى سۋ الەمىندە كەنەتتەن پايدا بولىپ, كوزدەن عايىپ بولىپ كەتەتىن قۇبىلىستاردىڭ ماڭگىلىك اينالىمى. سۋدىڭ بەتىنە جايىلا تارالعان شەڭبەر – ءوزىنىڭ ءمانى بويىنشا جەردەگى ومىرمەن, ال تابيعاتتاعى اينالىم «بيوتسەنتريزممەن» تىكەلەي بايلانىستى. ءار كوكتەم سايىن سۋرەتشىلەر جۇرەكتەرىنەن شىققان جاڭا ونەر تۋىندىلارىن جارىققا شىعارادى جانە جىل سايىن كورمەنىڭ تاقىرىبى وزگەرىپ تۇرادى», دەيدى جوبا اۆتورلارى.
الماتى