«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ مامانداندىرىلعان حالىققا قىزمەت كورسەتۋ ورتالىقتارىندا اۆتوكولىك يەلەرى مەن ەمتيحان تاپسىرۋشىلارعا مەملەكەتتىك قىزمەت كورسەتۋ ءۇشىن بيومەتريالىق سايكەستەندىرۋ تەحنولوگياسى ىسكە قوسىلدى, دەپ حابارلايدى Egemen.kz.
مامىر ايىنان باستاپ ەلىمىزدىڭ ارنايى حالىققا قىزمەت كورسەتۋ ورتالىقتارىنا كەلۋشىلەردى سۋرەتكە ءتۇسىرۋ ءراسىمىن ەنگىزۋ باستالدى. بۇل شارا قاۋىپسىزدىكتى كۇشەيتۋگە جانە مەملەكەتتىك قىزمەتتەردى الۋ كەزىندە الاياقتىقتىڭ الدىن الۋعا باعىتتالعان. بۇعان دەيىن مامانداندىرىلعان حقكو-لاردا تۇلعانى سايكەستەندىرۋدى قىزمەت الۋشى ۇسىنعان قۇجات نەگىزىندە قىزمەتكەر جۇرگىزەتىن. ەندى راسىمدەۋ بارىسىندا ازاماتتىڭ ءتۇرى سۋرەتكە تۇسىرىلەدى, ودان كەيىن ونى جۇيە اۆتوماتتى تۇردە جەكە تۇلعالاردىڭ مەملەكەتتىك دەرەكتەر بازاسىندا ساقتالعان سۋرەتپەن سالىستىرادى. بۇل قىزمەت كورسەتۋ بارىسىندا جالعان سۋرەتتى نەمەسە تەلەفون ەكرانىنداعى فوتوسۋرەتتى قولدانۋدى بولدىرمايدى. ەگەر ازامات بيومەتريالىق سايكەستەندىرۋدەن وتە الماسا, جۇيە قىزمەت كورسەتۋ مۇمكىندىگىن بۇعاتتايدى.
ء«بىز مەملەكەتتىك قىزمەت الۋ جۇيەسىندەگى اشىقتىقتى تەك ءىشىنارا ەتەتىن ادامي فاكتوردى جويدىق. بيومەتريالىق سايكەستەندىرۋ زاڭ بۇزۋشىلىقتى ازايتىپ, مامانداندىرىلعان حقكو-لاردا سىبايلاس جەمقورلىق تاۋەكەلدەرىن جويۋعا تىكەلەي جول اشادى. بۇل زامانۋي تەحنولوگيا مەملەكەتتىك قىزمەت كورسەتۋ جۇيەسىن تولىعىمەن زاڭدى ءارى اشىق ەتۋگە جاسالعان تاعى ءبىر قادام», دەدى مەملەكەتتىك كورپوراتسيانىڭ باسقارما توراعاسى ارمان كەنجەعاليەۆ.
ەسكە سالا كەتسەك, بۇگىندە مەملەكەتتىك قىزمەتتەردى حقكو-لاردان بولەك ەلەكتروندىق ۇكىمەت پورتالى, سونىمەن قاتار حقكو ءموبيلدى قوسىمشاسى مەن ەكىنشى دەڭگەيلى بانكتەردىڭ قوسىمشالارى ارقىلى دا الۋعا بولادى.