ابۋ-دابي تاق مۇراگەرى شەيح حالەد بين موحاممەد بين زايد ءال ناحاياننىڭ قازاقستانعا رەسمي ساپارى اياسىندا استانادا Presight كومپانياسىنىڭ العاشقى شەتەلدىك كەڭسەسىنىڭ سالتاناتتى اشىلۋى ءوتتى. جاساندى ينتەللەكت جانە تسيفرلىق ترانسفورماتسيا سالاسىنداعى جاھاندىق كوشباسشىلاردىڭ ءبىرى سانالاتىن Presight ەندى قازاقستاندا دا ءوز جوبالارىن جۇزەگە اسىراتىن بولادى, دەپ حابارلايدى Egemen.kz.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە, ەكسپو اۋماعىندا ورنالاسقان جاڭا كەڭسە Presight كومپانياسىنىڭ ءباا-دەن تىس العاشقى حالىقارالىق وكىلدىگى سانالادى جانە ول ورتالىق ازياداعى وڭىرلىك حاب رەتىندە قىزمەت اتقارادى. قازىرگى تاڭدا كەڭسەدە 40-تان استام قازاقستاندىق مامان جۇمىس ىستەيدى.
ايتا كەتەيىك, قازاقستان پرەزيدەنتى قاسىم-جومارت توقاەۆ پەن شەيح حالەد بين موحاممەد بين زايدتىڭ قاتىسۋىمەن وتكەن رەسمي ءراسىم بارىسىندا Presight قاتىسقان ءۇش كەلىسىمگە قول قويىلدى:
– استانا قالاسى اكىمدىگى جانە قر تسيفرلىق دامۋ مينيسترلىگىمەن جالپى قۇنى 190 ميلليون اقش دوللارىن قۇرايتىن «اقىلدى قالا» جوباسىن ىسكە اسىرۋ تۋرالى كەلىسىم;
– قازاقستاننىڭ تسيفرلىق ترانسفورماتسياسى اياسىندا جوعارى ءونىمدى ەسەپتەۋ ورتالىعىن قۇرۋ ءۇشىن ەكى Nvidia H200 سۋپەركومپيۋتەر كلاستەرىن جەتكىزۋ جونىندەگى كەلىسىم.
استاناداعى Alem.AI ورتالىعى بازاسىندا ەلوردا ينفراقۇرىلىمىنىڭ زياتكەرلىك وزەگىنە اينالاتىن جاعدايلىق ورتالىق قۇرىلادى. بۇل زاماناۋي پلاتفورما ەنەرگەتيكا, قوعامدىق قاۋىپسىزدىك جانە قالالىق ينفراقۇرىلىمدى باسقارۋ سياقتى نەگىزگى سالالاردا ينتەللەكتۋالدى مونيتورينگ پەن شەشىم قابىلداۋدى قامتاماسىز ەتەدى.
«Presight كومپانياسىنىڭ استانادا وڭىرلىك كەڭسە اشۋى – ورتالىق ازياداعى يننوۆاتسيالار مەن تەحنولوگيالار ورتالىعى رەتىندەگى مارتەبەمىزدى نىعايتۋدىڭ ماڭىزدى قادامى. Presight سياقتى جەتەكشى كومپانيالارمەن سەرىكتەستىك تسيفرلىق شەشىمدەردى عانا ەمەس, بۇكىل قوعام مەن بيزنەستىڭ دامۋىنا جاڭا مۇمكىندىكتەر تۋعىزادى. بۇل ەلىمىزدە جاساندى ينتەللەكت دامۋىنا قوسىلاتىن ماڭىزدى ۇلەس, ونى ءارتۇرلى سالالاردا قولدانۋعا جول اشادى», دەدى قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
Presight جوبالارى قازاقستاننىڭ جاساندى ينتەللەكت سالاسىنداعى وڭىرلىك كوشباسشى رەتىندەگى ءرولىن نىعايتا تۇسەدى.
«استانادا كەڭسە اشۋ – Presight-تىڭ حالىقارالىق كەڭەيۋىندەگى ماڭىزدى كەزەڭ. قازاقستان – Presight ءوز قىزمەتىن ءباا-دەن تىس باستاعان ەل. بۇل ەلدىڭ تسيفرلىق ترانسفورماتسياسىن قولداۋعا جانە جاساندى ينتەللەكت دامۋىنا دەگەن بەرىك ۇستانىمىمىزدى بىلدىرەدى. ەكسپو اۋماعىنداعى شەتەلدىك كەڭسەمىز قازاقستاننىڭ ستراتەگيالىق كورەگەندىگىنە, كوشباسشىلىعىنا جانە ادامي كاپيتالىنا دەگەن سەنىمىمىزدى كورسەتەدى. جەرگىلىكتى ساراپتامانى دامىتىپ, ەلدىڭ اقىلدى جانە تەحنولوگيالىق بولاشاعىنا ۇلەس قوساتىنىمىزعا قۋانىشتىمىز», دەدى Presight باس ديرەكتورى توماس پراموتەدحام.
مينيسترلىكتىڭ حابارلاۋىنشا, ەلورداداعى «اقىلدى قالا» جوباسى قازاقستاننىڭ جاساندى ينتەللەكت سالاسىنداعى وڭىرلىك كوشباسشى رەتىندەگى پوزيتسياسىن نىعايتادى جانە تسيفرلاندىرۋدىڭ جاھاندىق دەڭگەيدەگى ۇلگىسىنە اينالادى. جوبا قوعامدىق قاۋىپسىزدىكتى ارتتىرۋعا, قالالىق ينفراقۇرىلىمدى ناقتى ۋاقىت رەجيمىندە ءتيىمدى باسقارۋعا, تۇراقتى ەنەرگيا تۇتىنۋعا جانە ازاماتتاردىڭ قاجەتتىلىكتەرىنە باعىتتالعان سەرۆيستەردى دامىتۋعا باعىتتالعان. ايتا كەتۋ كەرەك, جوبانىڭ 60%-ى قازاقستاندىق جەتكىزۋشىلەردىڭ قاتىسۋىمەن جۇزەگە اسادى, بۇل جەرگىلىكتى بيزنەستىڭ بەلسەندىلىگىن جانە ەل ەكونوميكاسىنا قوسقان ۇلەسىن ايقىندايدى.
شەيح حالەد بين موحاممەد بين زايد ءال ناحاياننىڭ قازاقستانعا جاساعان رەسمي مەملەكەتتىك ساپارى ءباا مەن قازاقستان اراسىنداعى سەنىمگە, ستراتەگيالىق سەرىكتەستىككە جانە استانالاردىڭ تسيفرلىق ترانسفورماتسياسىنا دەگەن ورتاق ۇمتىلىستارعا نەگىزدەلگەن بەرىك ەكىجاقتى قاتىناستاردىڭ ايعاعى. بۇل ساپار ەكى ەلدىڭ ءومىر ساپاسىن جاقسارتۋ مەن تۇراقتى دامۋ ماقساتىندا وزىق تەحنولوگيالار سالاسىنداعى ورتاق باستامالاردى ىلگەرىلەتۋگە دەگەن ۇمتىلىسىن پاش ەتەدى. Presight پەن قازاقستان اراسىنداعى ىنتىماقتاستىق ەكى ەل باسشىلىعىنىڭ تولىق قولداۋىمەن ىسكە اسىپ جاتىر. بۇل سەرىكتەستىك جاساندى ينتەللەكت مۇمكىندىكتەرىن الەۋمەتتىك-ەكونوميكالىق تۇراقتى دامۋ ءۇشىن پايدالانۋ جولىنداعى ورتاق ماقساتتاردى كورسەتەدى.