الماتىدا ۇلتتىق اسكەري-پاتريوتتىق ورتالىقتىڭ جاۋىنگەرلىك داڭق مۋزەيىنىڭ جاڭا «اشىق اسپان استىنداعى مۋزەي» ءبولىمىنىڭ سالتاناتتى اشىلۋ ءراسىمى ءوتتى. جاڭا ەكسپوزيتسيعا 30-دان استام تۇپنۇسقا جانە قالپىنا كەلتىرىلگەن اسكەري تەحنيكا ۇلگىلەرى قويىلعان, دەپ حابارلايدى Egemen.kz.
اشىق اسپان استىنداعى ايرىقشا مۋزەيدە بارلىق ەكسپونات قالپىنا كەلتىرىلىپ, تەحنيكالىق سيپاتتامالار مەن تاريحي مالىمەتتەر جازىلعان تاقتالارمەن جابدىقتالعان. ەكسپوزيتسيادا جەڭىستىڭ سيمۆولىنا اينالعان ت-34 تانكى, اتى اڭىزعا اينالعان بم-13 «كاتيۋشا» زىمىران تاسىعىشى, سونداي-اق ت-44 جانە ت-55 سياقتى كەڭەستىك تانكىلەر بار. سونىمەن قاتار, بتر-40, بردم-1 جانە بردم-2 برونەترانسپورتەرلەرى, بمپ-1 جاياۋ اسكەردىڭ جاۋىنگەرلىك ماشيناسى, ءارتۇرلى گاۋبيتسالار, مينومەتتەر, زەنيتتىك جانە دالالىق ارتيللەريا قۇرالدارى قويىلعان.
كورمەدەن ەرەكشە قىزىعۋشىلىق تۋدىراتىن شەتەلدىك سيرەك ۇلگىلەردى دە كورۋگە بولادى. ولاردىڭ اراسىندا 120 مم «فينۋليانۋ» مينومەتى (شۆەتسيا), 158 مم «كەبەلۆەرح-41» مينومەتى (گەرمانيا) جانە 105 مم M-2A1 HOWITZER گاۋبيتساسى (اقش) بىردەن نازار اۋدارتادى. سونداي-اق, 203 مم بل-39 گاۋبيتساسى, 122 مم م-30 گاۋبيتساسى, 100 مم بس-3 دالالىق زەڭبىرەگى, زپۋ-2 جانە س-60 زەنيتتىك قۇرىلعىلارى, پم-120 جانە م-240 مينومەتتەرى سىندى ارتيللەريالىق تەحنيكا دا كورمە تورىنەن ورىن العان.
ءىس-شارانىڭ اشىلۋ سالتاناتىنا قورعانىس ءمينيسترىنىڭ ورىنباسارى, گەنەرال-مايور شايح-حاسان جازىقباەۆ, الماتى قالاسى اكىمىنىڭ ورىنباسارى ازامات قالدىبەكوۆ, قارۋلى كۇشتەردىڭ وكىلدەرى مەن ارداگەرلەردىڭ ۇرپاقتارى قاتىستى. جەڭىس كۇنى قارساڭىندا ايرىقشا جوبانى قولعا الىپ, جاڭا ەكسپوزيتسيانى جاساۋعا اتسالىسقان اسكەري قىزمەتكەرلەر ماراپاتتالدى.
جاۋىنگەرلىك داڭق مۋزەيى 1965 جىلى قۇرىلعان جانە ول الماتىداعى اسكەري-پاتريوتتىق تاربيە بەرۋدىڭ ماڭىزدى ورتالىعى سانالادى. مۋزەي توپتاماسى XIX عاسىردان قازىرگى كۇنگە دەيىنگى قازاقستاننىڭ اسكەري تاريحىن قامتيدى. نەگىزگى قور مايدانگەرلەردىڭ تۇپنۇسقا قۇجاتتارى, فوتوسۋرەتتەرى, حاتتارى, ماراپاتتارى مەن جەكە زاتتارىنان تۇرادى. ماتەريالداردىڭ ەلەۋلى بولىگىن گەنەرال پانفيلوۆتىڭ قىزى – پانفيلوۆ ديۆيزياسىنىڭ ارداگەرى ۆالەنتينا پانفيلوۆا تاپسىرعان.