تۇركىستان وبلىسىندا جاستار اراسىندا جۇمىسشى ماماندىقتاردىڭ بەدەلىن ارتتىرىپ, كاسىبي داعدىلارىن دامىتۋ ماقساتىندا ۇيىمداستىرىلعان «جاس ەڭبەك ادامى – 2025» بايقاۋى ءوز مارەسىنە جەتتى. سايىستىڭ سوڭعى كەزەڭى بايدىبەك اۋدانىندا ءوتتى, دەپ حابارلايدى Egemen.kz.
وبلىستىق قوعامدىق دامۋ باسقارماسى «جاستار رەسۋرستىق ورتالىعى» كمم-ءنىڭ ۇيىمداستىرۋىمەن «جۇمىسشى ماماندىقتار جىلى» اياسىندا وتكەن بايقاۋعا 80-گە جۋىق ستۋدەنت پەن جاس كاسىپكەرلەر قاتىستى. سايىس بارىسىندا قاتىسۋشىلار ءوز ماماندىقتارىنا سايكەس شەبەرلىكتەرىن كورسەتىپ, ءتۇرلى تاپسىرمالاردى ورىندادى. جۇمىس ساپاسى ورىنداۋ تەحنيكاسى, كرەاتيۆتىلىك جانە قاۋىپسىزدىك تالاپتارىن ساقتاۋ كريتەريلەرى بويىنشا باعالاندى.
بايقاۋ قورىتىندىسىمەن «ۇزدىك اسپاز» جانە «ۇزدىك دانەكەرلەۋشى» نوميناتسيالارىن قازىعۇرت اۋدانىنان كەلگەن مەرۋەرت داۋلەتجان جانە اقجول ميراسبەك يەلەنسە, بايدىبەكتىك ازيزا ابدىلدابەكقىزى «قولونەر شەبەرى», نۇرعيسا دوڭباەۆ «اعاش ۇستاسى», نۇرلىاي جاقسىلىق «بەت ارلەۋشى» نوميناتسيالارى بويىنشا ۇزدىك اتاندى. «ۇزدىك سىلاقشى» نوميناتسياسىن كەلەس اۋدانىنان كەلگەن ازامات لەسباي جەڭىپ السا, «ۇزدىك تاس قالاۋشى» قازىعۇرتتىق بەكارىس ورازالى, «ۇزدىك شاشتاراز» وتىرارلىق بەيبىت اسانوۆا, «ۇزدىك سانتەحنيك» سوزاق اۋدانىنىڭ تۋماسى بەكارىس ءومىرتاي, «ۇزدىك شينومونتاج شەبەرى» سارىاعاشتىق نۇرباقىت قوبلانبەك اتاندى.
جەڭىمپازدارعا العىس حاتتار مەن باعالى سىيلىقتار تابىستالدى.