تۇرعىن ءۇيدىڭ قايتالاما نارىعىندا قوزعالىس بەلسەندى. Krisha.kz ەلىمىزدىڭ 18 قالاسىنداعى پاتەر باعاسىن تالداپ, ناتيجەسىن ۇسىندى, دەپ حابارلايدى Egemen.kz.
زەرتتەۋ ءارتۇرلى اۋداندارداعى ءبىر بولمەلى (35 شارشى مەتر), ەكى بولمەلى (47 شارشى مەتر) جانە ءۇش بولمەلى (70 شارشى مەتر) پاتەرلەردى قامتيدى. ءساۋىردىڭ اياق شەنىندە ەلىمىزدىڭ قايتالاما نارىعىنداعى ءبىر بولمەلى پاتەر 13,6 ملن تەڭگەگە, ەكى بولمەلى پاتەر 18,3 ملن تەڭگەگە, ال ءۇش بولمەلى پاتەر 27,3 ملن تەڭگەگە باعالانعان. بۇل باعا ۇسىنىسىنىڭ ورتاشا كورسەتكىشى.
ەگەر ەڭ ارزان نۇسقالاردى قاراستىراتىن بولساق, وندا قىزىلوردا كوش باستاپ تۇر. قالادا پاتەر باعاسى باسقا وڭىرلەرگە قاراعاندا ايتارلىقتاي تومەن. اتاپ كورسەتسەك, ءبىر بولمەلى پاتەر 8,7 ملن تەڭگە, ەكى بولمەلى پاتەر 11,7 ملن تەڭگە, ال ءۇش بولمەلى پاتەر 17,5 ملن تەڭگە تۇرادى. سونداي-اق باعا مۇمكىندىگىنشە قولجەتىمدى قالالاردىڭ قاتارىنا: تاراز, اقتوبە, تالدىقورعان جانە كوكشەتاۋ كىرەدى. وندا پاتەر قۇنى تۇرعىن ءۇيدىڭ اۋدانى مەن تۇرىنە بايلانىستى 10,8 ملن تەڭگەدەن 22,4 ملن تەڭگەگە دەيىن اۋىتقيدى.
ادەتتەگىدەي الماتى – باسپانا جونىنەن ەڭ قىمبات بولىپ قالا بەرەدى. مۇنداعى ءبىر شارشى مەتردىڭ ورتاشا باعاسى 751 055 تەڭگەنى قۇرايدى, بۇل جاقىن باسەكەلەسكە قاراعاندا 233 000 تەڭگەگە ارتىق. ءساۋىر ايىندا وڭتۇستىك شاھاردا ءبىر بولمەلى پاتەر قۇنى 26,3 ملن تەڭگە, ەكى بولمەلى – 35,3 ملن تەڭگە, ءۇش بولمەلى – 53 ملن تەڭگە بولدى. الماتى مەن قىزىلورداداعى تۇرعىن ءۇي باعاسىنىڭ ايىرماشىلىعى ءۇش رەتتەن اسادى, ياعني الماتىداعى ءبىر پاتەردىڭ باعاسىنا قىزىلوردادا ءۇش پاتەر ساتىپ الۋعا بولادى ەكەن.
استانادا ءبىر بولمەلى پاتەر 18 ملن تەڭگە, ەكى بولمەلى – 24,3 ملن تەڭگە, ءۇش بولمەلى – 36,2 ملن تەڭگە دەڭگەيىندە تۇر. قىمبات ۇشتىكتى ءبىر بولمەلى پاتەر ءۇشىن 15,8 ملن تەڭگەدەن جانە ءۇش بولمەلى پاتەر ءۇشىن 31,5 ملن تەڭگەگە دەيىنگى باعامەن شىمكەنت تۇيىندەيدى.
نارىقتاعى وزگەرىستەرگە كەلەتىن بولساق, اعىمداعى جىلدىڭ ءساۋىر ايىندا اقتاۋ, اقتوبە جانە استانادا باعالاردىڭ ءسال تومەندەۋى بايقالادى. دەگەنمەن وتكەن جىلدىڭ وسى مەزگىلىمەن سالىستىرعاندا ەلدە پاتەر باعاسى ورتا ەسەپپەن 6%-عا وسكەن.