اباي اتىنداعى وبلىستىق بالالار كىتاپحاناسىندا بالالار ادەبيەتى اپتالىعى جازۋشى توكەن الجانتەگىمەن وتكەن كەزدەسۋدەن باستالدى. باسپادان جاقىندا عانا شىققان «بازارلىق» اتتى جاس وقىرماندارعا ارنالعان كىتاپتىڭ تۇساۋى كەسىلدى.
بىلتىر جازۋشى توكەن الجانتەگىنىڭ «قىزىقتىڭ ءبارى اۋىلدا» شىعارماسى «ايبوز» ۇلتتىق ادەبي سىيلىعىنىڭ «ۇزدىك بالالار ادەبيەتى» اتالىمىندا جەڭىمپاز اتانعان ەدى. مىنەكي, جاس وسكىندەردى تاعى ءبىر كىتابىمەن قۋانتىپ وتىر.
جازۋشى سۇيىندىك جانىسباي, بالالار كىتاپحاناسىنىڭ باسشىسى بايان قۋانىشقىزى سالتاناتتى تۇردە جاڭا كىتاپتىڭ تۇساۋىن كەسىپ, جىلى لەبىزدەرىن ءبىلدىردى.
سۇيىندىك جانىسباي كەزدەسۋ قوناعىنىڭ شوقتىعى بيىك شىعارمالارىنا توقتالىپ, جاڭا كىتاپتىڭ جاس وقىرمان ءۇشىن تاپتىرماس تاربيە قۇرالىنا اينالاتىنىنا سەنىم ءبىلدىردى. ءسويتىپ, ءوزىنىڭ دە جاقىندا شىققان «التىن توستاق» اتتى ەرتەگىلەر كىتابىن تارتۋ ەتتى.
«كىتاپحانا قورىندا بالالارعا ارنالعان ساپالى, ءتۇرلى ءتۇستى كىتاپتار كوبەيگەن سايىن وقىرمان سانى دا ارتادى. سەبەبى كىتاپحاناعا العاش كەلگەن بالا قىزىلدى-جاسىلدى, ادەمى بەزەندىرىلگەن كىتاپقا قول سوزادى. «بازارلىق» كىتابى بالالاردىڭ تالعامىنا ساي شىققان. كىتاپحانا قورىنىڭ وسىنداي كىتاپپەن تولىققانىنا وتە قۋانىشتىمىز», دەگەن كىتاپحانا باسشىسى بايان قۋانىشقىزى ۇجىم اتىنان العىسحات پەن ابايدىڭ ءبيۋستىن سىيلادى.
شاكىرتتەرى اتىنان ءسوز العان قالامگەردىڭ قارىنداسى سالتانات سماعۇلتەگى جازۋشىعا قولساعات, قالامگەردىڭ جارىنا قازاقتىڭ ءجون-جورالعىسىمەن ورامال سىيلادى.
كەشكە جازۋشىنىڭ تۋعان جەرى جاڭاارقادان دا مەيماندار كەلىپتى. قالامگەردىڭ ەل اۋزىندا جۇرگەن «جاڭاارقا ءۆالسى» ءانىن مەيرامگۇل كارىپجانوۆا شىرقادى.
جاس وقىرماندار جازۋشىعا شىعارماشىلىعى, جاڭا كىتابى جونىندە ءتۇرلى سۇراق جاۋدىرتتى. قالامگەر دە سۇيىكتى وقىرماندارىن ساعىنسا كەرەك, ءار ساۋالعا جۇيەلى جاۋاپ قايىرىپ وتىردى. وسىلايشا, جاس وقىرماندارمەن ەمەن-جارقىن اڭگىمە كەشتىڭ سوڭىنا جەتكەنىن دە سەزدىرمەدى.
قاراعاندى وبلىسى