جۇمىر دۇنيەگە ەرلىك پەن ادالدىقتىڭ ءمانىن ايگىلەگەن جەڭىس وڭايلىقپەن كەلگەن جوق. ادامزات تاريحىنداعى ەڭ ءىرى قانقۇيلى سوعىس ميلليونداعان وتباسىن جاقىندارىنان ايىرىپ, قايعى-قاسىرەت جۇتتىردى. سول سۇراپىل شايقاستا وت كەشىپ, كەۋدەسىن وققا توسەگەن ارىستىڭ ءبىرى – الماتى وبلىسى قاراساز اۋىلىنىڭ ازاماتى اسانعازى تەمىربەكوۆ ەدى.
مەكتەپتى ەندى تامامداعان بوزبالا 1942 جىلى مايدانعا ءوزى سۇرانىپ, اتتانادى. اكەسى تەمىربەك تە وتباسىمەن, بالا-شاعاسىمەن جۇمىلىپ, نارىنقولداعى «پرومكومبيناتتا» جاۋىنگەرلەر ءۇشىن بايپاق, تون, قولعاپ تىككەن. جۇمىسشىلار كۇن سايىن 18 ساعات تاپجىلماي ەڭبەك ەتىپ, بەلگىلەنگەن جوسپاردى اسىرا ورىنداپ, مايدانعا جونەلتىپ وتىرىپتى. ء«بارى مايدان ءۇشىن, ءبارى جەڭىس ءۇشىن!» دەگەن ۇرانمەن جۇمىس ىستەگەن تالاي وتباسى سەكىلدى تەمىربەكوۆتەر دە تىل مايدانىنىڭ وزاتى اتانادى. ءسويتىپ ءجۇرىپ اسكەردەگى اسانعازىنىڭ اماندىعىن تىلەپ, زارىققان كۇندەردە ارا-تۇرا حات كەلەدى ەكەن. ول بىردە ماسكەۋدى قورعاۋعا اتتانىپ بارا جاتقانىن, ەندى بىردە كالينينگراد مايدانىنا جەتكەنىن جازادى. تاعى ءبىر حاتىندا «رجەۆ, ۆەليكيە لۋكي قالالارىن ازات ەتتىك», دەپتى. ءبىر جولعى حاتىندا «ەرلىگى ءۇشىن» مەدالىمەن ماراپاتتالعانىن حابارلاعان. 1943 جىلدىڭ 26 قازانىندا اسانعازى: «نەۆەل قالاسىن ۇستاپ تۇرمىز, الدا – اۋىر شايقاس. وسىدان امان شىقسام, حابار بەرەمىن» دەگەن. وسىدان كەيىن ەش حابار بولماپتى. تەك 1945 جىلدىڭ اياعىندا كەگەن اۋداندىق اسكەري كوميسسارياتىنان جاۋىنگەردىڭ حابارسىز كەتكەنى تۋرالى قاعاز كەلگەن. سوندا دا اكە-شەشەسى ەش ءۇمىتىن ۇزبەي, پەرزەنتىنىڭ جولىن توسۋمەن كۇن كەشتى.
تىل مايدانىندا تىنىمسىز ەڭبەك ەتكەن ونەگەلى وتباسىنىڭ بالالارى ەر جەتىپ, ومىردەن ءوز ورىندارىن تاپقاندا, اناسى: «اسانعازىم ءبىر توبە, ىزدەۋدى توقتاتپاڭدار. حابارسىز كەتتى دەگەن سولداتتار دا ورالىپ جاتىر» دەپ امانات ەتىپتى. اسانعازىنىڭ باۋىرلارى – قۇدايبەردى, بولات جانە رەسەيدىڭ ەڭبەك سىڭىرگەن عىلىم قايراتكەرى, قارىنداسى سۇلۋحان ىزدەستىرۋ جۇمىستارىن توقتاتپاي جالعاستىرا بەردى. كسرو قورعانىس مينيسترلىگىنە سۇراۋ سالۋ بارىسىندا اسانعازىنىڭ مايدان دالاسىندا سوعىسقان جەرلەرىندەگى قۇجاتتارى دا تابىلدى.
پودولسك مۇراعاتىنان كەلگەن انىقتامادا جاۋىنگەردىڭ نەۆەل قالاسىنان 24 شاقىرىم جەردەگى تەتەرينو, ۆيدۋسوۆو, تۋركي-پەرەۆوز ەلدى مەكەنىندەگى اسكەري ستراتەگيالىق ماڭىزى بار تەمىرجول بويىن جاۋ قولىنان ازات ەتۋ ءۇشىن كەسكىلەسكەن ۇرىسقا قاتىسقانى ايتىلادى. تەمىرجول ستانساسى كەزەك-كەزەك ەكى جاقتىڭ قولىنا وتەدى. بىرنەشە اۋىل جەرمەن جەكسەن بولادى. ۇرىس قيمىلى وتە اۋىر بولىپ, قاندى شايقاستا 5 مىڭعا جۋىق كەڭەس جاۋىنگەرى قازا تاپقان. وسى ۇرىستا اسانعازى تەمىربەكوۆ تە مەرت بولادى. جانتۇرشىگەرلىك جاعداي كوپ جىل ايتىلماي, جاريا ەتىلمەي, قازا بولعاندار حابارسىز كەتكەندەر ساناتىنا قوسىلىپتى. اراعا كوپ جىل سالىپ قۇپيا اشىلعان. الاساپىراندا حابار-وشارسىز كەتتى دەلىنگەن جاۋىنگەرلەردىڭ باۋىرلاستار زيراتىندا جەرلەنگەنى انىقتالعان. سولاردىڭ ىشىندە اسانعازى تەمىربەكوۆتى ىزدەگەن تۋىستارى 2010 جىلى تۋركي-پەرەۆوزدان تابادى. زيراتتا «سەرجانت تەمىربەكوۆ اسانعازى 05-ءحى. 1943» دەپ جازىلعان. تابىلعان قۇجاتتاردا روتا كومانديرى بولعان ول قاراماعىنداعى اسكەردى تالاي ۇرىس مايدانىنا باستاپ شىققانى, جاۋمەن بەتپە-بەت ايقاسقانى جونىندە دەرەك كەلتىرىلگەن.
سودان بەرى ءسابيت تەمىربەكوۆ باس بولعان اسانعازىنىڭ تۋىستارى بۇل جەرلەردە بىرنەشە رەت بولىپ قايتتى. مايدانگەر جاتقان جەرگە ەسكەرتكىش-تاس بەلگى قويىپ, قاراسازعا ءبىر ۋىس توپىراعىن الا كەلدى. الماتى وبلىستىق ءماسليحاتىنىڭ شەشىمىمەن قاراساز اۋىلىنداعى مەكتەپتە جاۋىنگەرگە ارناپ ەسكەرتكىش-تاقتا ورناتىلدى. جىل سايىن مايدانگەردىڭ باسىنا بارىپ تاعزىم ەتەتىن تەمىربەكوۆتەر اۋلەتى وتانداستارىمىزدىڭ بۇل مەكەنگە ءجيى قاتىنايتىنىن ايتادى. ويتكەنى بۇل سوعىستا تالاي قانداسىمىز ەرلىكپەن قازا تاپتى. ەلىمىزدەن بارعان ازاماتتار نەۆەل قالاسىنىڭ ماڭىندا جاتقان ءبىرتۋار باتىر قىزىمىز مانشۇك مامەتوۆانىڭ رۋحىنا باس ءيىپ, قۇران باعىشتايدى.