كوشپەلىلەر ويىنى مادەني مەرەكەگە اينالدى - ايدا بالاەۆا

ورتالىق ازيا مەملەكەتتەرى باسشىلارىنىڭ شولپان-اتا قالاسىندا وتكەن كونسۋلتاتيۆتىك كەزدەسۋىندە قاسىم-جومارت توقاەۆ بىرلەسكەن جۇمىستىڭ ماڭىزدى ۆەكتورى ورتالىق ازيا حالىقتارىنىڭ باي تاريحي جانە مادەني مۇراسىن تانىمال ەتۋ ەكەندىگىن اتاپ وتكەن ەدى. سوعان وراي قازاقستان مەن وزبەكستان بىرلەسىپ شىعارعان «قورقىت اتا» تاريحي تەلەسەريالىن, قىرعىزستانمەن بىرلەسكەن «قوس قانات» تەلەكوپىرىن, قازاقستان مەن وزبەكستان اراسىنداعى مادەني-گۋمانيتارلىق ىنتىماقتاستىقتى كەڭەيتۋگە باعىتتالعان «زاكوۆات» زياتكەرلىك ويىندارى ەل نازارىنا ۇسىنىلدى. 

ايدا بالاەۆا وسىنداي تاجىريبەنى ءوڭىردىڭ ورتاق تاريحي تۇلعالارىنا, مادەني مۇراسىنا, تۋريستىك مۇمكىندىكتەرى مەن قازىرگى زامانعى جەتىستىكتەرىنە ارنالعان جاڭا بىرلەسكەن مەدياجوبالاردى جاساۋ ارقىلى كەڭەيتە ءتۇسۋ كەرەكتىگىن ايتتى. 

ء«بىزدىڭ ارنالار قازىردىڭ وزىندە قىرعىزستاندا, وزبەكستاندا, ازەربايجاندا جانە تاجىكستاندا حابار تاراتادى, ولارمەن ءبىز ارنالاردىڭ پاريتەتتىك قاتىسۋ ءتىزىمىن كەڭەيتۋ بويىنشا جۇمىس ىستەپ جاتىرمىز. وڭىردە مادەني-گۋمانيتارلىق بايلانىستار دا جوسپارلى تۇردە نىعايىپ كەلەدى. جىل سايىن قازاقستاندا قىرعىزستاننىڭ, وزبەكستاننىڭ, تاجىكستاننىڭ جانە تۇرىكمەنستاننىڭ مادەني كۇندەرى زور تابىسپەن وتكىزىلىپ ءجۇر», دەدى ول.

سونداي-اق مادەنيەت جانە اقپارات ءمينيسترى كوشپەلىلەردىڭ دۇنيەجۇزىلىك ويىندارى ورتالىق ازيا ەلدەرى ءۇشىن ورتاق مادەني-تاريحي مۇرانى بەينەلەيتىن بىرىكتىرۋشى وقيعاعا اينالعانىن تىلگە تيەك ەتتى.

«وتكەن جىلدىڭ قىركۇيەك ايىندا استانادا وتكەن 5-ءشى كوشپەندىلەر ويىندارىنا الەمنىڭ 89 ەلىنەن 2 800 (ەكى مىڭ سەگىز ءجۇز) قاتىسۋشى جانە 700-دەن استام جۋرناليست كەلدى. دۇنيەجۇزىلىك ويىنداردىڭ اشىلۋ ءراسىمى مەن باسقا دا سپورتتىق جارىستاردى تۇركيا, رەسەي, ازەربايجان, موڭعوليا, وزبەكستان, تۇرىكمەنستان جانە قىرعىزستان ەلدەرى جوعارى ساپادا تاراتىپ, كوپشىلىك كورەمەنگە تاراتتى. بۇل ءىس-شارا سپورتتىق جارىس اياسىنان الدەقايدا اسىپ, بۇكىل وڭىردەن جۇزدەگەن مىڭ كورەرمەن مەن ءتۋريستىڭ باسىن قوسقان كوشپەلى مادەنيەتتىڭ تاماشا مەرەكەسىنە ۇلاستى», دەدى ا. بالاەۆا.