وتاندىق عالىمدار يگور پونومارەۆ پەن نۇرلىبەك ۇدەرباەۆ «ۇلتتىڭ يممۋندىق پورترەتى» جوباسى اياسىندا جاساندى ينتەللەكت كومەگىمەن ادامنىڭ يممۋنيتەتىن جالپى قان تالداۋى بويىنشا باعالايتىن يننوۆاتسيالىق ImmuniGuide پلاتفورماسىن ازىرلەدى, دەپ حابارلايدى Egemen.kz.
كادىمگى قان تالداۋى يممۋندىق جۇيەڭىزدىڭ جاعدايىن 99% دالدىكپەن انىقتاي الادى. عالىمداردىڭ «ۇلتتىڭ يممۋندىق پورترەتى» جوباسى قازاقستان حالقىنىڭ يممۋندىق جۇيەسىنىڭ جاي-كۇيىن تەرەڭ زەرتتەۋگە باعىتتالعان. Immuniguide پلاتفورماسى ماتەماتيكالىق الگوريتمدەر مەن جاساندى ينتەللەكت تەحنولوگيالارى ارقىلى جالپى قان تالداۋىنىڭ كورسەتكىشتەرىن وڭدەيدى.
«بۇل قاراپايىم جۇيە دەسەك تە بولادى. ول دايىن تالداۋلاردى وقىپ, زەرتحانالىق ناتيجەنى وڭدەيدى. يممۋندىق جۇيەنىڭ جاي-كۇيىنىڭ ناقتى كورسەتكىشىن بەرەدى. پلاتفورما رەزەرۆتى عانا ەمەس, سونداي-اق ادامنىڭ اعزاسىنداعى نازار اۋدارۋدى قاجەت ەتەتىن قانداي جاسىرىن ينفەكتسيالار بارىن كورسەتە الادى», دەيدى پلاتفورما اۆتورلارىنىڭ ءبىرى, يننوۆاتسيالىق مەديتسينا عىلىمي-كلينيكالىق ورتالىعىنىڭ جەتەكشىسى مەديتسينا عىلىمدارىنىڭ دوكتورى نۇرلىبەك ۇدەرباەۆ.
ادام يممۋنيتەتىنىڭ جاي-كۇيى تۋرالى دەرەك قاۋىپتىڭ الدىن الۋعا, اۋرۋ سالدارىن باعالاۋعا, وسال توپتاردى باقىلاۋعا, الدىن الۋ مەن ەمدەۋ شارالارىن دەربەستەندىرۋگە مۇمكىندىك بەرەدى. باستاپقىدا ImmuniGuide ەلوردانىڭ ونكولوگيالىق كلينيكالارىنىڭ بىرىندە ەنگىزىلىپ, سىنالعان. پلاتفورمانى كۇندەلىكتى جۇمىستا قولدانۋ دارىگەرلەرگە پاتسيەنتتەردىڭ جاعدايىن باقىلاۋعا كومەكتەستى. عالىمداردىڭ ايتۋىنشا, ەل تۇرعىندارى اعزانىڭ يممۋندىق Chek-UP-ىن تەگىن وتكىزە الادى. ول ءۇشىن Telegram ارناسىندا اقپارات, سونداي-اق پايدالانۋ نۇسقاۋلىعى كورسەتىلگەن «يممۋنوگيد» چات-بوتىن ىسكە قوسۋ قاجەت. جالپى قان تالداۋىن PDF فورماتىندا جۇكتەگەننەن كەيىن, نەمەسە تالداۋ ناتيجەلەرىمەن ساپالى فوتوسۋرەت سالعاننان سوڭ ناتيجە 1 مينۋتتا دايىن بولادى.