بانك سەكتورىنىڭ ەكونوميكاعا ۇسىناتىن نەسيەسى ەكونوميكادا شەشۋشى ءرول اتقارىپ, سالىق اۋدارىمدارى ارقىلى مەملەكەتتىك بيۋدجەتتى تولتىرۋعا ايتارلىقتاي ۇلەس قوسادى. مۇنداي تۇسىمدەر الەۋمەتتىك باعدارلامالاردى, ينفراقۇرىلىمدىق جوبالاردى جانە ەلدى دامىتۋعا قاتىستى باسقا دا ماڭىزدى باعىتتاردى قارجىلاندىرۋعا كومەكتەسەدى.
مالىمەت ۇسىنۋشى «Ranking» شولۋشىلارى ەنشىلەس ۇيىمدار تۋرالى اقپاراتتى شوعىرلاندىرىلعان قارجىلىق ەسەپتىلىك بويىنشا اۋديتورلىق ەسەپتەردەن, سونداي-اق اشىق كوزدەردەن العان. ءار ۇيىمنىڭ, ونىڭ ىشىندە بانكتەردىڭ جانە وزگە دە ەنشىلەس ۇيىمداردىڭ سالىق اۋدارىمدارى تۋرالى دەرەكتەر قارجى مينيسترلىگىنىڭ مەملەكەتتىك كىرىستەر كوميتەتى ۇسىنعان اقپاراتتا كورسەتىلگەن.
2024 جىلدىڭ قورىتىندىسى بويىنشا ەلدەگى بارلىق ەدب اراسىندا «Kaspi.kz» ەڭ ءىرى سالىق تولەۋشى اتاندى: سالىق اۋدارىمدارىنىڭ سوماسى 285,8 ملرد تەڭگەگە جەتتى. ايتا كەتەرلىگى, ءبىر جىل ىشىندە تولەنگەن سالىق سوماسى 24%-عا ارتقان. «Kaspi»-ءدىڭ ەل اۋماعىندا قىزمەتىن جۇزەگە اسىراتىن 11 ەنشىلەس ۇيىمى بار. ەكىنشى ورىنعا «Halyk» توبى جايعاستى. «Halyk Bank» جانە ونىڭ ەنشىلەس ۇيىمدارىنىڭ 2024 جىلى تولەگەن سالىق سوماسى 270 ملرد تەڭگەدەن استى. قازاقستانداعى 10 ەنشىلەس ۇيىمى ەسەپكە الىندى.
«Kaspi.kz» پەن «Halyk»-تىڭ قوسىندى سالىق اۋدارىمدارى 556,5 ملرد تەڭگەنى نەمەسە ەلىمىزدەگى 12 ءىرى بانك تولەگەن بارلىق سالىقتىڭ 66,3%-ىن قۇرادى. ۇزدىك ۇشتىكتى ءوزىنىڭ ءتورت ەنشىلەس ۇيىمىمەن «تسەنتر كرەديتبانكى» تۇيىندەيدى: 75,7 ملرد تەڭگە. سونىمەن بىرگە العاشقى بەستىككە «ForteBank» توبى (42,8 ملرد تەڭگە) جانە «ەۋرازيالىق بانك» توبى (34,7 ملرد تەڭگە) ەندى. ايتا كەتەرلىگى, ەنشىلەس ۇيىمدارى جوق ەدب دا بار. تيىسىنشە, ولاردىڭ تىكەلەي سالىق اۋدارىمدارى عانا ەسكەرىلدى. مۇنداي قارجى ينستيتۋتتارىنىڭ قاتارىندا «وتباسى بانك», «سيتيبانك قازاقستان», «Bereke Bank» جانە «Altyn Bank» بار», دەپ مالىمدەيدى.
2024 جىلدىڭ قورىتىندىسى بويىنشا ەلىمىزدىڭ 12 ءىرى بانكى سالىق اۋدارىمدارى تۇرىندە بيۋدجەتكە 840 ملرد تەڭگە اۋدارعان. وسىلايشا, بانك سەكتورىنىڭ بيۋدجەتكە قوسقان ۇلەسى ميللياردتاعان تەڭگەمەن ەسەپتەلىپ, بۇل سەگمەنتتى ەكونوميكانىڭ نەگىزگى قارجى دونورلارىنىڭ بىرىنە اينالدىرادى. وسى ارادا ايتا كەتەرلىگى, مۇنداي جاعداي جىلدار بويى ساقتالىپ كەلەدى, بانك سەكتورى بيۋدجەتكە تۇسەتىن سالىقتىڭ ەڭ ءىرى كوزىنىڭ ءبىرى بولىپ قالا بەرمەك, ال مۇنداي سالىم جىل سايىن جۇزدەگەن ميلليارد تەڭگەمەن ولشەنەدى.
«بولاشاقتا بانكتەردىڭ سالىق اۋدارىمدارىنىڭ كولەمى قارجى نارىعىنىڭ وسىمىنە, رەتتەۋدەگى وزگەرىستەرگە جانە ەلدەگى جالپى ەكونوميكالىق جاعدايعا بايلانىستى بولادى. الايدا بۇگىندە بانكتەر ەكونوميكالىق تۇراقتىلىقتا شەشۋشى ءرول اتقارادى. مىسالى, تەك 2024 جىلدىڭ قورىتىندىسى بويىنشا ەكىنشى دەڭگەيدەگى بانكتەر اكتيۆتەرىنىڭ سوماسى ءبىر جىلدا 19,7%-عا, 61,6 ترلن تەڭگەگە دەيىن ۇلعايدى. سونىمەن قاتار ەدب اكتيۆتەرىنىڭ ەلدەگى ءىجو-گە قاتىناسى ءبىر جىل ىشىندە 45,2%-دان 47,8%-عا دەيىن ءوستى, بۇل ايتارلىقتاي جاقسى كورسەتكىش بولىپ سانالادى», دەيدى ماماندار.