وڭتۇستىك كورەيادا ازيا ەلدەرىندەگى قازاقتاردىڭ ەكىنشى قۇرىلتايى ءوتتى. بۇل جولى يونين قالاسىندا مالايزيا, جاپونيا جانە موڭعولياداعى قازاق دياسپورالارىنىڭ وكىلدەرى باس قوستى. جيىنعا قاتىسۋشىلار مادەني جانە ەكونوميكالىق ىنتىماقتاستىق جونىندە پىكىر الماستى.
ءىس-شارا سەۋلدەگى «Qazaq Nomad Korea» ۇيىمىنىڭ باستاماسىمەن, قازاقستاننىڭ كورەيا رەسپۋبليكاسىنداعى ەلشىلىگى جانە «وتانداستار قورى» كەاق-نىڭ قولداۋىمەن 5-6 ءساۋىر كۇندەرى ۇيىمداستىرىلدى. سونداي-اق دەمەۋشىلەر قاتارىندا Hankuk شەت تىلدەرى ۋنيۆەرسيتەتى (HUFS), «Air Astana» اۋە كومپانياسى, «Pana» قوناقۇيلەر جەلىسى مەن «ELSYM8» كومپانياسى بار.
قۇرىلتايدىڭ العاشقى كۇنى مادەنيەت سالاسى وكىلدەرىنىڭ قاتىسۋىمەن مادەني بلوك جانە قازاقستان جانە كورەيا كاسىپكەرىنىڭ قاتىسۋىمەن ەكونوميكالىق بلوكتەن تۇراتىن ەكى پلەنارلى وتىرىس ءوتتى. وندا ازيا ەلدەرىندەگى قازاق مادەني ورتالىقتارىنىڭ قازىرگى جاعدايى مەن بولاشاق جوسپارلارى, مادەني-رۋحاني بايلانىستاردى نىعايتۋ, سونداي-اق شەتەلدەگى وتانداستارمەن ءبىلىم, عىلىم جانە كاسىپكەرلىك سالالارىندا سەرىكتەستىك ورناتۋ سەكىلدى ماڭىزدى ماسەلەلەر تالقىلاندى.
جيىنعا «وتانداستار» قورى قازاق تىلىندەگى كىتاپتاردى الىپ باردى. سۋرەتشى ءارى زەرگەر اقمارال باقىتوۆا ءوز جۇمىستارىن كورسەتتى. قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆا قاتىسۋشىلاردى قازاق ونەرىمەن تانىستىردى. ال ەتنوگراف ايگەرىم مۇساعاجينوۆا قازاقتىڭ ۇلتتىق تاعامدارىنىڭ پايدالى قاسيەتتەرى تۋرالى ايتىپ بەردى. قازاقستاننىڭ ەڭبەك سىڭىرگەن قايراتكەرى جۇبانىش جەكسەن ۇلى كورەرمەندەرمەن بىرگە تانىمال قازاق اندەرىن شىرقادى. قۇرىلتايدىڭ حانگۋك شەتەل تىلدەرى ۋنيۆەرسيتەتىندە ءوتۋى كەزدەيسوق ەمەس.
– ازيانىڭ ءار تۇكپىرىنەن كەلگەن دەلەگاتتاردىڭ كورەياداعى باسقوسۋى شەتەلدەگى قازاقى قۇندىلىقتاردىڭ جاڭعىرىپ, جىراقتا جۇرسە دە, تۋعان ەلمەن بايلانىسىن ۇزبەيتىن وتانداستارىمىزبەن اراداعى ىنتىماقتاستىقتى نىعايتاتىن ماڭىزدى قادام ەكەنى ءسوزسىز. بيىل بۋرابايدا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقاەۆ اباي ينستيتۋتى نەگىزگى سەرىكتەس ەلدەردىڭ بارىندە ءتول مادەنيەتىمىزدى ناسيحاتتايتىن ورتالىق بولۋعا ءتيىس دەگەن ەدى. وسى تاپسىرما نەگىزىندە اتالعان جوعارى وقۋ ورنىندا اباي ينستيتۋتىن اشۋدى كوزدەپ وتىرمىز. ازىرگە كەلىسسوزدەر جۇرگىزىلىپ جاتىر. بۇل ورتالىق وسى ءبىزدىڭ دياسپورالار مەن باسقا دا شەتەلدىكتەرگە قازاق ءتىلىن ۇيرەتۋ قۇرالى رەتىندە جۇمىس ىستەيتىن بولادى, – دەدى «وتانداستار قورى» كەاق پرەزيدەنتى دانيار قادىروۆ.
فەستيۆال اياسىندا وڭتۇستىك كورەيادا العاش رەت قازاق تىلىندە شەشەندىك ونەر سايىسى ءوتتى. ونى قازاقستاننىڭ سەۋلدەگى ەلشىلىگى ۇيىمداستىردى. فينالعا حانگۋك ۋنيۆەرسيتەتىنىڭ جەتى ستۋدەنتى شىقتى. ولاردىڭ قابىلەتىن مادەنيەت قايراتكەرى, ءانشى قانات ايتباەۆ باستاعان قازىلار القاسى باعالادى. ءبىرىنشى ورىن ەكىنشى كۋرس ستۋدەنتى لي سو يونعا بۇيىردى.
– مادەنيەت جاي عانا عيماراتتار, مەكەمەلەر ەمەس. بۇل تۇتاس ۇلتتىق سانا-سەزىمىن جاھاندىق دەڭگەيدە نىعايتا تۇسەتىن مىقتى تۇعىر. سوندىقتان مادەني بايلانىسىمىز بەرىك بولۋى ءۇشىن قازاق ءتىلىن ۇيرەنىپ, ەكى ەل اراسىنداعى قارىم-قاتىناستى ودان ءارى ارتتىرۋعا ىقپالداسقىم كەلەدى, – دەدى ستۋدەنت.
قازاق ءتىلى بايقاۋىنىڭ جەڭىمپازى سەۋل-الماتى-سەۋل باعىتىنداعى تەگىن اۋە بيلەتىن يەلەندى. ۇيىمداستىرۋشىلار بۇل سىيلىق لي سو يونعا قازاقستانعا بارىپ, ءتىلىن ودان ءارى جەتىلدىرۋگە مۇمكىندىك بەرەدى دەگەن ويدا.
– حانگۋك ۋنيۆەرسيتەتىندە ورتالىق ازيا ەلدەرىنىڭ تانۋ فاكۋلتەتى بار ەكەن. سول جەردە قازاق-وزبەك ءتىلىن ۇيرەنەتىن جاستاردىڭ ءبىزدىڭ مادەنيەتىمىزدى, ءتىلىمىزدى ەركىن مەڭگەرىپ ۇيرەنىپ جاتقانىن كورىپ كوڭىلىمىز ءبىراز كوتەرىلىپ قالدى. كەلبەتتەرىنەن ەمەس, تىلىنە قاراپ قانا كورەي نە قازاق جاستارى ەكەنىن ايىرىپ تۇرمىز, – دەدى ءانشى قانات ايتباەۆ.
ال ەكىنشى كۇنى قازاق ورتالىقتارىنىڭ وكىلدەرى مەن وتانداستارىمىزدىڭ قاتىسۋىمەن ناۋرىز مەرەكەسىن اتاپ ءوتۋ, ۇلتتىق ويىندار فەستيۆالى جانە ونەر جۇلدىزدارىنىڭ قاتىسۋىمەن مەرەكەلىك كونتسەرت ۇيىمداستىرىلدى.