الماتىدا پيك جانە ميب قاۋىمداستىقتارىنىڭ, باسقارۋشى, سەرۆيستىك كومپانيالاردىڭ وكىلدەرى, سونداي-اق ساراپشىلار تۇرعىن ءۇي زاڭناماسى ماسەلەلەرىن تالقىلادى, دەپ حابارلايدى Egemen.kz.
2019 جىلى بيلىك ەسكىرگەن پاتەر يەلەرى كووپەراتيۆى (پيك) جۇيەسىن رەفورمالاۋ تۋرالى شەشىم قابىلداپ, ونىڭ ورنىنا م ۇلىك يەلەرى بىرلەستىكتەرىن (ميب) قۇرۋدى ۇسىنعان بولاتىن. مۇنىڭ ءمانى – ءار ءۇي تاۋەلسىز زاڭدى بىرلىككە اينالىپ, تۇرعىندار ورتاق م ۇلىكتى قالاي باسقارۋ كەرەكتىگىن وزدەرى شەشەدى.
دەگەنمەن, ءار ءۇيدىڭ ەرەكشەلىكتەرى مەن وندا تۇراتىن ادامداردىڭ مۇمكىندىكتەرى ەسكەرىلۋى كەرەك. ميب-ءتىڭ ناقتى ءبىر ۇلگىسىن زاماناۋي تۇرعىن ءۇي كەشەنى مەن جارتى عاسىردان استام ۋاقىت بۇرىن سالىنعان ەسكى ۇيگە بىردەي قولدانۋ مۇمكىن ەمەس. ءماجىلىس دەپۋتاتى ەكاتەرينا سمىشلياەۆانىڭ ايتۋىنشا, قازىر ەلىمىزدە 6 مىڭعا جۋىق ميب پەن 1,5 مىڭ جۇمىس ىستەپ تۇرعان پيك بار. بىراق مۇنداي جۇزدەگەن بىرلەستىكتىڭ جۇمىسى تەك قاعاز جۇزىندە قالىپ, يەسىز, زاڭدى مارتەبەسىز ۇيلەر كوبەيىپ تۇر.
تكش زاڭناماسىنا جاڭا تۇزەتۋلەر بويىنشا تۇرعىندارعا كوبىرەك ەركىندىك بەرىلەدى. ولار شارۋاشىلىق باسقارۋدىڭ كەز كەلگەن ءتۇرىن تاڭداي الادى. تەك جاۋاپكەرشىلىك پەن اشىقتىق ساقتالسا بولعانى. ميب كوبىرەك قۇقىققا يە بولىپ, قىزمەتكەرلەردى رەسمي تۇردە جالداي الادى, ءتىپتى ەگەر ءۇي ۇلكەن بولسا, شتات قۇرىپ, اتقارۋشى ديرەكتوردى تاعايىنداي الادى. پيك رەسمي تۇردە جالعا الۋشىلاردىڭ وزدەرى قۇرعان كوممەرتسيالىق ەمەس بىرلەستىك رەتىندە ءومىر سۇرەدى. مۇنداي پيك تاپقان اقشا تەك ۇيلەردى ۇستاۋعا – جوندەۋگە, جۇمىسشىلاردىڭ ەڭبەگىنە اقى تولەۋگە, تەحنيكا ساتىپ الۋعا جۇمسالۋى كەرەك. سونداي-اق تۇرعىندار جيناقتالماعان, باسقارۋدىڭ قانداي دا ءبىر تۇرىنە داۋىس بەرمەگەن جاعدايدا اكىمدىكتەن باسقارۋشى كومپانيا ۋاقىتشا ىسكە قوسىلىپ, ءتارتىپتى قامتاماسىز ەتەدى.
تاعى ءبىر وزەكتى ماسەلە – تاريفكە قاتىستى. ەندى تۇرعىنداردىڭ كىرەبەرىستەردى تازالاۋ, قوقىستاردى شىعارۋ, جارىقتاندىرۋ, ليفتتەرگە تەحنيكالىق قىزمەت كورسەتۋ, ۇساق جوندەۋ, تازالاۋشىلارعا, سانتەحنيكتەرگە جالاقى تولەۋ ءۇشىن اي سايىن تولەيتىن سوماسى اەك-كە بايلانىستىرىلاتىن بولادى. اەك بىركەلكى وسەتىندىكتەن, تاريف تە بىرنەشە تەڭگەگە ۇلعايادى, بۇل تۇرعىنداردىڭ بيۋدجەتىنە ەلەۋلى سوققى بولمايدى. سونداي-اق رەفورما ەسەپ بەرۋ مەحانيزمىنە دە اسەر ەتەدى. ەندى كەز-كەلگەن باسقارۋ سۋبەكتىسى – ميب, پيك نەمەسە باسقارۋشى كومپانيا تۇرعىندارعا ەسەپ بەرۋگە, تولعاندىرعان سۇراقتارىنا جاۋاپ بەرۋگە جانە جۇمىستى اشىق جۇرگىزۋگە مىندەتتى.