قازىر كىتاپ وقيتىندار ازايدى دەپ دابىل قاعادى الەۋمەتتىك زەرتتەۋشىلەر. بىراق ەل ىشىندە ەركەبۇلان توكەنوۆ سەكىلدى قاراپايىم ەڭبەك ادامىنىڭ كىتاپ كەمىرىپ جۇرگەنىن كورگەندە زەرتتەۋدىڭ رەتتىلىگىنە كۇمان كەلتىرەتىن ءجونىمىز بار. قاراعاندى مەتالل كونسترۋكتسيالارى زاۋىتىنىڭ بىلىكتى بۇرعىلاۋشىسى, «ۇلاعات» وقىرمان كلۋبىنىڭ مۇشەسى ەركەبۇلان مىرزا زاۋىت قىزمەتكەرلەرىنىڭ كىتاپ وقۋعا دەگەن ىنتاسىن اشىپ ءجۇر.
قاراعاندى مەتالل كونسترۋكتسيالارى زاۋىتى – وڭىردەگى ىرگەلى كاسىپورىن. زاۋىت ونەركاسىپ پەن ەنەرگەتيكا, مۇناي-گاز سالاسىنا, باسقا دا نىساندارعا ارنالعان مەتالل بۇيىمدارىن شىعارادى. قازىرگى كەزدە «Changan», «Chery», «Kia», «Haval» كومپانيالارى مەن وڭىردەگى گاز, جىلۋ ەلەكتر ورتالىقتارىنىڭ تاپسىرىسىن ورىنداپ وتىر. الپاۋىت زاۋىتتا ەڭبەك قىز-قىز قايناپ جاتادى. مۇندا جونىلعان ءتۇرلى مەتالل بۇيىمى تەك ءوڭىردىڭ عانا ەمەس, ەل ءوندىرىسىنىڭ كادەسىنە جاراپ تۇر. ەكسپورتتالعان ءار مەتالل بۇيىمىندا ءوز ءىسىنىڭ شەبەرى ەركەبۇلان سەكىلدى مامانداردىڭ دا وزىندىك قولتاڭباسى بار.
وسى رەتتە ەركەبۇلان مىرزانىڭ جۇمىسى اسا جاۋاپتى. بۇرعىلاۋ تسەحىندا تاپسىرىس بەرۋشىنىڭ سۇراۋى بويىنشا مەتالل بۇيىمى ولشەپ, پىشىلەدى. قاجەت ءپىشىن نە ارتىق, نە كەم كەسىلمەۋى كەرەك. دالدىكتى قاجەت ەتەدى. ەگەر ەسەبىڭىز قاتە شىقسا, بىرنەشە تسەحتاعى ەڭبەك زايا كەتەدى, مەتالل ىسكە العىسىز بولادى.
– قازىردە قاشاۋىش, ءتىستى قاشاۋىش بىلدەكتەرمەن, باسقا دا قۇرىلعىلارمەن جۇمىس ىستەپ, زاۋىت ءوندىرىسىن وركەندەتۋگە ءوز ۇلەسىمدى قوسىپ كەلەمىن. ەلىمىزدىڭ جەر-جەرىنەن ءتۇرلى تاپسىرىس تۇسەدى. سولارعا قاجەتتى بولشەكتەردى دايىنداۋ – نەگىزگى مىندەتىمىز. بولشەكتەردىڭ دالدىگى مەن ساپاسى تەك ءوندىرىس تيىمدىلىگىنە عانا ەمەس, بۇكىل كاسىپورىننىڭ قاۋىپسىزدىگىنە دە تىكەلەي اسەر ەتەدى, – دەيدى مەتالل مامانى.
ەركەبۇلان – ۇستازدار وتباسىندا دۇنيەگە كەلگەن ون بالانىڭ توعىزىنشىسى. زاۋىتتا ەڭبەك ەتۋ – بالا كۇنگى ارمانى. وعان مۇعالىمىنىڭ مىنا ءبىر ءاپساناسى اسەر ەتىپتى.
– مەكتەپتە وقىپ جۇرگەندە ۇستازىمنىڭ ايتقان اڭگىمەسى ماعان ارمان-مۇراتىما جول سالعانداي بولدى. ول اڭگىمەدە ءۇش بالانىڭ قيال-ارمانى ايتىلادى. قالا اۋماعى اباتتانىپ, ءزاۋلىم عيماراتتار بوي كوتەرىپ, قۇرىلىس جۇمىسى ءجۇرىپ جاتقان ەدى. بالالار بولاشاق قالانى جىلدام كورگىلەرى كەلەدى. بىراق ول ۇزاققا سوزىلعانىنا ريزا بولمايدى دا, ءوز ارماندارىن ءبىر-بىرىنە ايتادى. ءبىرىنشى بالا: «مەن ون جىلعا باسقا ەلگە كەتىپ, قايتىپ كەلسەم», دەيدى. ەكىنشى بالا: «ون جىل ۇيىقتاپ, سودان كەيىن تۇرعانىم دۇرىس», دەپ شەشەدى. ءۇشىنشى بالا: «وسى قالانىڭ اسەم بولۋىنا ۇلەسىمدى قوسىپ, ءوز قولىممەن ساۋلەتتى, عاجاپ عيماراتتار سالىسسام», دەگەن پىكىر بىلدىرەدى. ءدال وسى وي مەنىڭ نەگىزگى ارمانىما اينالىپ, سوعان قولىم جەتتى. قاراعاندى قالاسىندا «ۇماي», «تاير» سەكىلدى باسقا دا قۇرىلىس نىساندارىنىڭ سالىنۋىنا سەپتىگىمىز ءتيدى, – دەيدى.
ەرتەدەن ەڭبەكپەن شىڭدالعان ەركەبۇلان 1991 جىلى ستۋدەنتتىك بريگاداعا ىلەسىپ, ەگىندىبۇلاق اۋدانىنداعى اۋرۋحانانى دا سالىسادى. اسكەردەگى بورىشىن بايقوڭىر قالاسىنداعى قۇرىلىس باتالونىندا وتەيدى. وندا جيناقتاعان تاجىريبەسىنىڭ قىزىعىن قازىر كورىپ جاتىر.
ەركەبۇلان – قارقارالىداعى شوپتىكول اۋىلىنىڭ كىتاپحاناسىن تاۋىسقان وقىرمان. كىتاپحانا ءۇيىنىڭ ءدال ىرگەسىندە بولىپتى. قاتارلاستارى اسىر سالىپ ويناپ جۇرگەندە, ول ەرتەگىلەردى, باتىرلار جىرىن, تاريحي شىعارمالاردى وقىپ, وي كەشىپ وتىرادى ەكەن.
– وسىدان ءبىر جىل بۇرىن «ۇلاعات» وقىرمان توبىنا رىمحان دوسىم ارقىلى قوسىلدىم. ەكى اپتادا ءبىر كەزدەسىپ, وقىعانىمىزدى تالقىلايمىز. ونىمەن قوسا, ءتۇرلى ءىس-شاراعا قاتىسامىز. ماسەلەن, «الاش ايلىعىندا» ساحنا تورىنە شىعىپ, شاكارىم قاجىنىڭ ءرولىن سومداپ, ءبىر بەلەسكە شىققانداي كۇي كەشتىم. ورتا تاۋىپ, كادىمگىدەي جانىم جادىراپ قالدى, – دەيدى ۇزدىك وقىرمان.
ەركەبۇلان كۇنىنە 40–50 بەت كىتاپ وقىماسا, اسقازانىنا اس بارماعانداي كۇي كەشەدى ەكەن. كىتاپتى كوبىنە «Qasym» دۇكەنىنەن الادى.
– بۇل كىتاپ ورتالىعىندا شەتەل ادەبيەتى مەن قازاق ادەبيەتىنىڭ كلاسسيكتەرى جازعان شوقتىعى بيىك شىعارمالار بار. 160-قا جۋىق شەتەل قالامگەرىنىڭ كىتابى قازاقشالاندى. شەتىنەن وقىپ جاتىرمىن. «اباي جولىن» بەس مارتە وقىدىم. مۇحتار ماعاۋيندى دە ءسۇيسىنىپ وقيمىن. ابايدىڭ, شاكارىمنىڭ, ماحامبەتتىڭ كەز كەلگەن ولەڭىن جاتقا ايتامىن. «جەڭىسكە جەتكەن ادامداردىڭ كىتاپحاناسى ۇلكەن بولادى, ۇتىلعانداردىڭ تەلەديدارى ۇلكەن بولادى», دەپتى الەمگە ايگىلى كاسىپكەر دەن كەننەدي. رۋحاني قازىنا ويىڭدى كەمەل ەتەدى. سوندىقتان كىتاپتان باس المايمىن. وقىعاندارىمدى ارىپتەستەرىمە اڭگىمەلەپ بەرەمىن. بىرنەشەۋى سونىڭ الەمىنە ەنىپ, كىتاپ وقىپ كەتتى. ۇزىلىستە تالقىلايتىنىمىز – وقىعان كىتابىمىز», دەيدى ول.
ەركەبۇلان وتباسىندا اسىل جار, قادىرلى اكە, ابىرويلى اتا. كىشكەنتاي ەكى جيەنى اتاسىنا اسىعادى. ويتكەنى ءتۇرلى ەرتەگى, داستانداردى اڭگىمەلەپ بەرەدى. بۇگىندە بالانى تەلەفون تاربيەلەپ جاتىر دەگەندى ءجيى ايتامىز. ەگەر ءار ۇيدە ەركەبۇلان سەكىلدى ەرتەگى ايتار جان بولسا, وندا بالا قازاقشا ءتىل ۇستارتىپ, رۋحاني بولمىسى بولاتتاي بولار ەدى.
قاراعاندى وبلىسى