بۇگىندە قازاقتىڭ ۇلتتىق كيىمى قايتا جاڭارىپ, وزگەشە سيپات الدى. ناۋرىز كەلگەندە عانا ساندىعىنان الىپ شىعاتىن قىدىرما شاپان قازىر جوققا اينالدى. تالعام جوعارى. ەتنوشاپاننىڭ ءتۇر-ءتۇرىن ۇزدىكسىز كيىپ جۇرەتىن ەل كوبەيدى. وسىلايشا, ۇلتتىق كيىمىمىزدىڭ ۇپايى تۇگەلدەنىپ كەلەدى. وسىعان وراي جاقىندا كەنشىلەر مادەنيەت سارايىندا «Nayryz – fashion» دەپ اتالعان ەتنو-زاماناۋي كيىم فەستيۆالى ءوتتى. ناۋرىزنامانىڭ ونكۇندىگى اياسىنداعى ءسان كورمەسىنە بىلتىر وبلىستاعى ديزاينەرلەر قاتىسسا, بيىل رەسپۋبليكالىق دەڭگەيدە ءوتتى.
فەستيۆالعا قاراعاندى مەن استانا, الماتى قالالارىنان 9 ديزاينەر, تىگىنشى قاتىستى. كورەرمەن نازارىنا 90-عا جۋىق كيىم ۇلگىسى ۇسىنىلدى.
فەستيۆال قازاق حالقىنىڭ مادەني مۇراسىن زاماناۋي كوزقاراسپەن ۇسىنۋدى, ۇلتتىق كيىمدەردى كەڭىنەن تانىمال ەتىپ, جاس ۇرپاققا ۇلتتىق قۇندىلىقتاردى دارىپتەۋدى كوزدەيدى.
– ۇلتتىق كيىمدەرىمىز – الەمدەگى ەڭ ادەمى, ءساندى كيىمدەردىڭ قاتارىندا. بۇلاي دەپ سەنىمدى تۇردە ايتا الامىز. شەتەلدىك قوناقتاردىڭ ويۋ-ورنەكپەن اسپەتتەلگەن كيىمدەرىمىزگە تاڭدانا, قىزىعا قاراعانىن تالاي كوردىم. بۇگىنگى قازاق جاستارىنىڭ شاپان كيىپ جۇرگەنىن كورگەندە, كوڭىلگە قۋانىش ۇيالايدى. شاپان, كامزول, بورىك كيۋ سانگە اينالىپ كەلەدى. اسىرەسە كوكتەمنىڭ جىلى كۇندەرىندە شاپان كيگەن جىگىتتەردى ءجيى كورەتىن بولدىق. فەستيۆالدىڭ دا ماقساتى – ۇلتتىق كيىمدى ۇلىقتاۋ, دارىپتەۋ. جاس بۋىن ۇلتتىق كيىمىن ماقتان تۇتۋى ءتيىس, – دەيدى كەنشىلەر مادەنيەت سارايىنىڭ ديرەكتورى سايات ابدىعالي.
ديزاينەرلەر ءداستۇرلى ويۋ-ورنەك پەن ءستيلدى قازىرگى زامان ترەندتەرىمەن ۇيلەستىرگەن. ۇلتتىق كيىمدى مەيرامدا عانا ەمەس, كۇندەلىكتى كيەتىندەي ەتىپ ءپىشىپتى. وسى سەكىلدى ءسان الەمىندەگى كوزدىڭ جاۋىن الاتىن جاڭا توپتامالار كورەرمەن نازارىنا ۇسىنىلدى. فەستيۆالدىڭ تاعى ءبىر كوزدەگەنى – ەلگە تانىلماي جۇرگەن تالانتتى سانگەرلەردى جۇرتقا تانىستىرۋ.
ءبىر عانا ءوڭىرىمىزدىڭ وزىندە ۇلتتىق كيىم تىگەتىن 200-گە تارتا ديزاينەر, تىگىنشى بار ەكەن. ولاردىڭ تاپسىرىسسىز وتىرعان كۇنى جوق كورىنەدى. اسىرەسە توي-دومالاققا ءجون-جورالعى ءۇشىن تاپسىرىس كوپ. ودان بولەك جاستار كۇندەلىكتى كەڭسەگە, جيىن-تويعا كيىپ جۇرەتىن زاماناۋي كيىم ءتۇرى ترەندتەن تۇسپەي تۇرعانىن ايتادى جەرگىلىكتى ديزاينەرلەر. سولاردىڭ ءبىرى – «GulNur» تىگىن ستۋدياسىنىڭ ديزاينەرى گۇلنۇر جارىلقانوۆا.
– تىگىن ستۋدياسىن اشقانىما بەس جىلداي ۋاقىت بولدى. جىلدان-جىلعا تاپسىرىس كوبەيىپ كەلەدى. ەلدىڭ تالعامى دا ۋاقىت وتكەن سايىن ارتۋدا. ءتىپتى وزدەرىنىڭ يدەياسىمەن كەلىپ, سىزباسىن ۇسىنىپ جاتاتىن تاپسىرىس بەرۋشىلەرىمىز دە بار. ءبىز دە كوبىنە قازاق قىزدارىنا ارنالعان ءتۇرلى توپتاما بار. كۇندەلىكتى جۇمىسقا, جيىن-تويعا كيەتىن شاپان تۇرىنەن باستاپ, كويلەكتىڭ ءتۇرلىسىن تىگەمىز. بىزدىكى اسىرەسە, اسەمدىگىمەن ەرەكشەلەنەدى. مىسالعا, مەن ءار كويلەككە گۇلدىڭ ءپىشىنىن مونشاقتاپ سالامىن. بايشەشەك سەكىلدى نازىك گۇل كيىمدى اشا تۇسەدى. ال ءتۇسىن اشىق, اسپان تۇستەس قىلامىن. ۇلتتىق كيىم كۇنىنە وراي وتەتىن فەستيۆالعا كوكتەمنىڭ كەلگەنىن, جەردىڭ جاڭاراتىنىن سەزىندىرەتىن توپتاما ۇسىندىم, – دەيدى بەلگىلى ديزاينەر گ.ورازبەكقىزى.
ال سانگەر ليۋدميلا قۇنانباەۆا ەتنوكيىمدەرىن قازاقستاندىق سۋرەتشىلەر سالعان كارتينالارمەن بەزەندىرىپتى.
– وسى جولى قازاقستاندىق سۋرەتشىلەردىڭ كارتينالارىمەن بەزەندىرىلگەن توپتامامدى ۇسىندىم. ءبىزدىڭ برەندتىڭ ونىمدەرى ءوز تالانتتارىمىزدىڭ تۋىندىلارىمەن ساندەلگەن. سول تالانتتارىمىزدى ەلگە تانىتسام دەگەن نيەتىم بار. وسىنداي ونەر مەن ءساننىڭ كوللابوراتسياسى حالىق اراسىندا كەڭىنەن تارالىپ, سۋرەتشىلەرىمىزدىڭ تانىمالدىعى ارتادى دەپ سەنەمىن. وزدەرىڭىز بايقاپ جۇرگەندەي, ۇلتتىق ناقىشتاعى كيىمدەر ءسان الەمىنىڭ تورىنە شىقتى. الەۋمەتتىك جەلىدە قازىر ۇلتتىق كيىممەن كونتەنت سالۋ ترەندكە اينالدى. دارىپتەۋ ءۇشىن ءارى قاراي ەڭبەكتەنەمىز. ويۋ-ورنەكتەر ماعان شابىت سىيلايدى, – دەدى سانگەر ل.قۇنانباەۆا.
ۇلتتىق كيىم كورمەسىن وبلىستىق مادەنيەت, ارحيۆتەر جانە قۇجاتتاما باسقارماسىنىڭ باستاماسىمەن, كەنشىلەر مادەنيەت سارايىنىڭ ۇجىمى ۇيىمداستىردى. ۇلتتىق كيىم كۇنىنە وراي وتەتىن «Nayryz – fashion» كەلەر جىلى حالىقارالىق دەڭگەيدە ءوتىپ قالۋى مۇمكىن. ۇيىمداستىرۋشىلار مەن قاتىسۋشىلار مۇنداي ءسان كورمەسى ءداستۇرلى قولونەردىڭ جاڭعىرۋىنا جول اشادى دەيدى.
قاراعاندى وبلىسى