«قوسىلعاننىڭ – قولى ۇزىن, قوس كەرۋەننىڭ – جولى ۇزىن» دەيدى حالىق ءتامسىلى. قازاق ەلى اۋمالى-توكپەلى زاماندا تاعدىر تالايىمەن جۇزدەگەن دياسپورامەن كەرۋەنىنىڭ سوقپاعىن ءتۇيىستىردى. بۇل كوش ءتۇيىسىپ قانا قويماي, ادىلەت جولىنا ىنتىماقتاسا بىرىگىپ, قوي ۇستىنە بوزتورعاي جۇمىرتقالاعان زامان ورناتۋ ءۇشىن ءبىر باقىت – ءبىر باعىتقا بەت الدى. ادىلەتتى تۋ ەتكەن ءادىل ەلدىڭ بۇل ساپارىنىڭ ۇزاق بولماعى – بارشاعا ورتاق ماقسات.
21 ناۋرىز – ىنتىماق كۇنى. وسى كۇننىڭ قارساڭىندا استانا قالاسىنداعى دوستىق ۇيىنە جول تارتتىق. استانا قالاسى اكىمدىگى جانىنداعى «قوعامدىق كەلىسىم» مەكەمەسى ەلورداداعى ءتۇرلى ەتنوستاردىڭ باسىن قوسىپ, ناۋرىز مەرەكەسىن تويلاماق ەكەن. ناۋرىزدى عانا ەمەس, مەملەكەت باسشىسى قاسىم-جومارت توقاەۆتىڭ باستاماسىمەن «ناۋرىزناما» تۇجىرىمداماسىنىڭ ىنتىماق كۇنىن اتاپ وتەدى.
بىرلىك پەن ىنتىماقتىڭ التىن ۇياسىنا اينالعان دوستىق ءۇيىنىڭ الدى – قاراقۇرىم حالىق. اقشاڭقان كيىز ۇيلەر قاز-قاتار ءتىزىلىپ تۇر. الاڭقايعا تىگىلگەن التىباقان اۋەلەگەن انگە ۇندەسە تەربەلەدى. بۇرمەلى كويلەك, ويلى كامزول كيىپ, التىباقان تەپكەن قىزداردىڭ سىڭعىر كۇلكىسى قۇلاقتى قىتىقتايدى. بوز كىلەمنىڭ ۇستىندە كۇش سىناسقان بالۋانداردى قيقۋلاپ قولداعان جۇرت شۋ-شۋ ەتەدى. قول مەرگەندىگىنە ءۇمىت ارتقان بالالار اسىق ويناپ, اسىر سالادى. ازدىڭ ازانشىسى ەمەس, كوپتىڭ قازانشىسى بولۋدى قالايتىن قازاقتىڭ ۇلتتىق كيىمىن كيگەن ءتۇرلى ەتنوس وكىلدەرى ەرسىلى-قارسىلى قىدىرىستاپ ءجۇر. جۇزدەرىندە – شاتتىق, ەزۋلەرىندە – كۇلكى.
ءبىز الدىمەن باشقۇرتستاندا دۇنيەگە كەلىپ, قىرىق جىلدان اسا ۋاقىت قازاق جەرىندە تۇرىپ جاتقان باشقۇرت قىزى گۇزال سۇلەيمەنوۆامەن تىلدەستىك. ول: «ناۋرىز مەيرامى – دوستىقتىڭ مەرەكەسى. ءبىز جىل سايىن ناۋرىزدى اسىعا كۇتەمىز. وسى كۇنى استانا قالاسىندا تۇراتىن ءتۇرلى ەتنوس وكىلدەرى باس قوسىپ, ءبىر-ءبىرىمىزدى قۇتتىقتايمىز. بۇل كۇندى قازاق, باشقۇرت, وزبەك, ۇيعىر سەكىلدى تۇركى حالىقتارى عانا ەمەس, نەمىس, ۋكراين, كارىستەرگە دەيىن تويلايدى. سەبەبى ءبىز وسى كۇنى ناۋرىزكوجە, باۋىرساق ءپىسىرىپ, ءوزىمىزدى قازاق سەزىنەمىز», دەپ اعىنان جارىلدى.
استانا قالاسىنداعى وزبەك ەتنو-مادەني ورتالىعىنىڭ توراعاسى, ۇلتتىق قۇرىلتاي مۇشەسى شەرزود پۋلاتوۆ بولسا, ناۋرىز مەرەكەسىن قازاقستان حالقى اسسامبلەياسىنا قارايتىن ەتنو-مادەني بىرلەستىكتەر 30 جىلدان بەرى تويلاپ كەلە جاتقانىن, پرەزيدەنتتىڭ باستاماسىمەن «ناۋرىزناما» تۇجىرىمداماسى بەكىتىلىپ, 10 كۇننىڭ ءبىرى ىنتىماق كۇنى دەپ تانىلعاننان كەيىن بۇل مەيرامنىڭ ءمانى ءتىپتى ارتقانىن تىلگە تيەك ەتتى.
ء«بىزدىڭ مەملەكەتىمىز وسىدان 30 جىل بۇرىن قازاقستان حالقى اسسامبلەياسىن قۇرىپ, ءتۇرلى ەتنوستىڭ باسىن قوسىپ, ءبارىمىزدى ءبىر شاڭىراقتىڭ استىنا جيدى. مەنىڭشە, ىنتىماق پەن بىرلىكتىڭ ىرگەتاسى ورتاق قۇندىلىقتار قالىپتاسقاندا عانا بەرىك بولادى. سوندىقتان دا پرەزيدەنتتىڭ باستاماسىمەن ناۋرىزدىڭ ءبىر كۇنى ىنتىماققا ارنالىپ, بۇل مەيرامنىڭ بىرلىكتىڭ مەرەكەسىنە اينالعانى ءبىزدى قۋانتادى. ۇلتتار مەن ۇلىستار اراسىنداعى سىيلاستىقتى كۇشەيتىپ, ءبىر-بىرىمىزگە دەگەن قۇرمەتىمىزدى ارتتىراتىن مەيرامنىڭ الدىمىزعا قويعان ۇلى ماقساتقا جەتۋگە جول سالارىنا سەنىمىمىز مول», دەدى ش.پۋلاتوۆ.
تاتار-باشقۇرت مادەني بىرلەستىگىنىڭ جەتەكشىسى سەرگەي سادىقوۆ ناۋرىز مەرەكەسىنە ارنالعان كيىز ۇيلەردى ەلورداداعى ەتنو-مادەني ورتالىقتار تىككەنىن ايتا كەلىپ, بۇل مەيرامنىڭ باستى ەرەكشەلىگى ۇلتتىق ونەر مەن ۇلتتىق ويىندار ەكەنىنە توقتالدى.
«وزدەرىڭىز كورىپ وتىرعانداي, بۇگىن ارقان تارتۋ, اسىق اتۋ, كۇرەس, گىر كوتەرۋ سەكىلدى ۇلتتىق ويىندار ءوتىپ جاتىر. قازاقتىڭ ۇلتتىق ويىندارى ءبارىمىز ءۇشىن قىزىق. سونىمەن قاتار بۇل كۇنى قازاقتىڭ ءانىن ايتىپ, ءبيىن بيلەپ ءبىر جاساپ قالامىز», دەدى س.سادىقوۆ.
تىرلىگىنىڭ تامىرىن بىرلىككە بايلاعان ەلىمىز ىنتىماقتىڭ بۇزىلمايتىن قورعان ەكەنىن ازاتتىقتى العان كۇنى شىن ءتۇيسىندى. تاعدىردىڭ جازۋىمەن قازاق جەرىن پانالاعان ءتۇرلى ەتنوس وكىلدەرىنە تىزەسىن باتىرماي, قۇشاعىن اشتى. شەتتەن كەلگەندى شەتقاقپاي جاساپ, جەتىم قوزىداي جاۋتەڭدەتپەي باۋىرىنا باستى. دوستىق ءۇيى الاڭىندا وتكەن ناۋرىز مەرەكەسىندەگى اۋرا سول ساياساتتىڭ دۇرىستىعىنىڭ ايقىن ايعاعى سەكىلدى كورىندى.
ءبىزدىڭ بىلۋىمىزشە, ناۋرىز مەرەكەسىنە يدەيالىق تۇرعىدا ءار بەرەتىن ىنتىماق كۇنى ەلىمىزدىڭ ءار ايماعىندا ءدال وسىلاي تويلانىپ جاتىر ءھام تويلانا بەرەدى دە.
مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ ءحححىىى سەسسياسىندا ء«بارىمىز – ءبىر ەلدىڭ ازاماتىمىز. تاريح توعىستىرعان تاعدىرىمىز – ءبىر, سەنىممەن قادام باساتىن كەلەشەگىمىز – ءبىر. ءبىز ءبىرتۇتاس ۇلت رەتىندە ءاردايىم بابالار اماناتىنا ادال بولامىز. قاسيەتتى قاراشاڭىراعىمىز – قازاقستاننىڭ جارقىن بولاشاعىن بىرگە جاسايمىز. ءبىزدىڭ ماقساتىمىز ايقىن, بۇل – ادىلەتتى قازاقستاندى قۇرۋ», دەگەن ەدى.
ەندەشە, ناۋرىزنامانىڭ 10 كۇندىگىندەگى ىنتىماق كۇنىن بابالار اماناتىنا ادال بولىپ, ءبىر كەلەشەككە نىق قادام باسۋعا ۇيىتقى بولار مەرەكە دەپ تانيتىن كۇن تۋىپ كەلە جاتىر.