قاراعاندىداعى «الشىناي» تسەحى تاقيادان باستاپ كيىز ءۇي جابدىعىنا دەيىن تىگەدى. ەتنوشاپانى شەتەلگە ساتىلىپ جاتىر. مەملەكەتتىك مەكەمەلەر مەن ءىرى كاسىپورىنداردان تۇسەتىن تاپسىرىس تا كوپ.
تىگىن تسەحىنىڭ يەسى گۇلسىم حاميتقىزى كۇيەۋىنىڭ كولىك تۇراعىن تسەح رەتىندە پايدالانىپ وتىر. ۇزاق جىل ساۋدا-ساتتىقپەن اينالىسىپ كەلگەن شەبەر ەڭ اۋەلى بالالار كەۋدەشەسىن تىگىپ, ساتىپتى. كەيىن ونىسى شاپان, تاقيا, كورپە-جاستىققا ۇلاسقان. ساپالى دۇنيە تۇتىنۋشى كوڭىلىنەن شىعىپ, كۇن وتكەن سايىن تاپسىرىس مولايا تۇسەدى. كاسىبىنە ءۇيىنىڭ ءبىر بۇرىشى تارلىق ەتىپ, گاراجعا كوشەدى. ءوزى ۇلگەرمەيتىن بولعان سوڭ قاسىنا تىگىنشىلەر الادى.
– كىشكەنتاي كەزىمىزدەن اجەلەرىمىزدىڭ ءىس تىگىپ وتىرعانىنا كوزىمىز قانىپ وسكەن. انام دا ىسمەر. كوزكورگەن جۇرت بۇل قابىلەتىمدى اكەمنىڭ تۋعان اپاسىنا تارتقان دەيدى. ول كىسى 1930 جىلدارى اۋىلداعى كەلىنشەكتەرگە كويلەك تىگىپ بەرگەن كورىنەدى. اتام دا اعاش ۇستاسى بولعان. سول كىسىنىڭ قولىنان شىققان بەسىك ءالى بار. بالالارىم, نەمەرەلەرىم سونىمەن ءوستى. تەگىمدە بار دۇنيە تەگىن جاتپاسا كەرەك. وقۋشى كەزىمدە ۇستازدارىما ءشالى توقىپ بەرەتىنمىن. مىنە, ءوزىمنىڭ سۇيىكتى ءىسىمدى قولعا العالى ون جىلدان استى. قازىر تاپسىرىستىڭ كوپتىگىنەن باسقالارىنان باس تارتۋعا تۋرا كەلەتىن كەزدەر دە بار, – دەيدى اڭگىمەسىن ارىدەن باستاعان گۇلسىم كەنجەبەكوۆا.
تسەح ىسمەرلەرى ەتنوشاپاننىڭ ءتۇر-ءتۇرىن تىگەدى. تاپسىرىس بەرۋشىنىڭ تالعامىنا سايكەس ويۋ-ورنەگىن, ءتىپتى ەسىمىنە دەيىن كەستەلەپ جازىپ بەرەدى. «الشىناي» ونىمدەرىنىڭ برەندكە اينالعانىن شەتەلدەن تۇسەتىن تاپسىرىستان اڭعارۋعا بولادى. وسى كۇنگە دەيىن ون مىڭعا جۋىق شاپان ساتىلىپتى. «Instagram» ارقىلى اقش, فرانتسيا, سينگاپۋر, تايلاندتان دا تاپسىرىس تۇسكەن. كەيىن تۇركيا, موڭعوليا مەملەكەتىندەگى ەلشىلىكتەر دە سىيلى مەيماندارىنا ارناپ بىرنەشە شاپان العان. «قازاقمىس» كومپانياسى دا – تىگىن تسەحىنىڭ تۇراقتى تۇتىنۋشىسى.
تسەح ۇجىمىنىڭ ەڭ اۋقىمدى العاشقى تاپسىرىسى – استانادا وتكەن «EXPO» كورمەسىنىڭ ساحنالارى. دالا ساحناسىنىڭ شاتىرىن تىگىپ, اسەمدەپ بەزەندىرىپتى. ودان كەيىن «استانا وپەرا» تەاترىنىڭ ء«بىرجان سال» سپەكتاكلىنە ارناپ كيىز ءۇي جابدىعى مەن 8 مەترلىك شاتىر تىككەن. سودان بەرى باس قالاداعى ونەر ۇجىمدارىمەن ۇدايى بايلانىستا. قاراعاندىداعى «التاي پوليمەتالى» كاسىپورنىنا 15 كيىز ءۇي جابدىقتاعان. وسى سەكىلدى كاسىپورىندار مەن مەملەكەتتىك مەكەمەلەرگە وتىزعا تارتا كيىز ءۇي قۇراپ بەرگەن. قازاقستان مۇسىلماندارى ءدىني باسقارماسى باس كەڭسەسىنىڭ ءماجىلىس زالىنداعى بارلىق ورىندىقتى قاپتاپ, ساحنا شىمىلدىعىن اسەمدەگەن. «Helios», «گازپرومنەفت» سەكىلدى كومپانياداعى جۇمىسشىلاردىڭ كيىمىن دە وسىنداعى ىسمەرلەر ءپىشىپ, تىگەدى.
ءتورت تىگىنشى جۇمىسقا مەملەكەتتىك باعدارلامالار («التىن جاس», «كۇمىس جاس» جوباسى مەن «جاستار پراكتيكاسى» باعدارلاماسى) ارقىلى قابىلدانعان.
– ماماندىعىم – تىگىنشى. مانساپ ورتالىعىندا جۇمىس ىزدەپ جۇگىنگەنىمدە «كۇمىس جاس» جوباسى بويىنشا وسى تسەحتى ۇسىندى. ۇجىم بىردەن ۇنادى. ءىس تىگۋ – وتە نازىك جۇمىس. اسا مۇقيات بولۋ كەرەك. ءبىر-بىرىمىزگە بىلگەنىمىزدى ۇيرەتەمىز. ىنتىماق جاراسقان جەردە ىرىس مولايادى. بوس كۇنىمىز بولمايدى. تاپسىرىس كوبەيگەن سايىن تابىس تا ارتادى, – دەيدى ايناگۇل اسانباەۆا.
باقىتكامال يسابەكوۆا ءىس-ماشيناسىمەن كەسكىندەمە جاسايدى. ەڭ جاۋاپتى جۇمىس – وسى ماماندىكى. «تسەح ەكىنشى ۇيىمە اينالدى. مۇنداعى مىندەتىم – ەتنوشاپانعا, باسقا دا كيىمگە كومپيۋتەر كومەگىمەن كەسكىندەمە سالۋ» دەيدى ىسمەر.
گۇلسىم حاميتقىزى بىلتىر «دامۋ» قورىنىڭ 20 ملن تەڭگە جەڭىلدەتىلگەن نەسيەسى ارقىلى تسەحقا قاجەتتى ءىس ماشينكالارىن الىپتى.
– ءالى دە تسەحتى كەڭەيتسەم دەيمىن. ەندى لازەرلى كەسكىندەمەلى اپپارات العىمىز كەلەدى. ءجۇن وڭدەۋ تسەحىن دا قاتار الىپ ءجۇرۋ ويىمدا بار. ول ءۇشىن بيىل گرانتقا قاتىسسام دەيمىن. ىڭعايى كەلسە ءبارىن ءبىر جەردە اتقارۋدى ويلاپ وتىرمىز, – دەيدى.
قاراعاندى وبلىسى