ەلىمىزدە كرەاتيۆتى يندۋستريانى دامىتۋ قورى قۇرىلادى

2021 جىلدان بەرى پرەزيدەنت ءوزىنىڭ قازاقستان حالقىنا جولداۋىندا ەل ەكونوميكاسىنداعى وسى سەكتوردىڭ ۇلەسىن ارتتىرۋدىڭ ماڭىزىن بىرنەشە رەت اتاپ وتكەن بولاتىن. 

وسىعان وراي رەسپۋبليكادا ارنايى جوبالىق كەڭسە جۇمىس ىستەيدى, سالانى دامىتۋ تۇجىرىمداماسى دا قابىلدانعان. ونى ينستيتۋتسيونالدىق تۇرعىدا قالىپتاستىرۋ جانە سالاداعى بيزنەستى ىنتالاندىرۋ بويىنشا جۇمىس جۇرگىزىلگەن.

«بۇگىنگى تاڭدا قازاقستانداعى كرەاتيۆتى يندۋستريا 12 باعىت بويىنشا دامىپ, 43 ەكونوميكالىق قىزمەت جىكتەۋىشى ءتۇرىن قامتيدى. قازاقستاندا كرەاتيۆتى يندۋستريامەن اينالىساتىن تىركەلگەن سۋبەكتىلەرىنىڭ سانى 45,5 مىڭنان اسادى, ەلىمىزدىڭ ءجىو-دەگى جالپى قوسىلعان قۇننىڭ ۇلەسى 1%-دى قۇرايدى. بارلىق سۋبەكتىنىڭ 50%-دان استامى الماتى مەن استانادا شوعىرلانعان, ولاردىڭ 70%-ى جەكە كاسىپكەرلەر», دەدى ايدا بالاەۆا. 

ەلىمىزدىڭ كرەاتيۆتى سەكتورلارىندا بارلىعى 143,6 مىڭ ادام جۇمىسپەن قامتىلعان. ولاردىڭ ىشىندە IT, ساۋلەت جانە ءسان ونەرى, مادەني-دەمالىس مەكەمەلەرى, كىتاپحانالار مەن مۋزەيلەر, سونداي-اق حالىقتىڭ قولونەرى ەڭبەكتى كوپ قاجەت ەتەتىن سالالار بولىپ سانالادى.

ەلىمىزدە كرەاتيۆتى يندۋستريانى دامىتۋ قورى قۇرىلادى

مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا ەلىمىزدە جەتەكشى شىعارماشىلىق جانە ءبىلىم بەرۋ ۇيىمدارىنىڭ قاتىسۋىمەن كرەاتيۆتى يندۋستريانى دامىتۋ قورىن قۇرۋ جوسپارلانىپ وتىرعانىن حابارلادى.

مينيستر مەملەكەت باسشىسى 2021 جىلعى جولداۋىندا كرەاتيۆتى يندۋستريانى قولداۋدىڭ ارنايى ينستيتۋتىن قۇرۋدى تاپسىرعانىن اتاپ ءوتتى. وسىلايشا, زاڭناماعا سايكەس, كرەاتيۆتى يندۋستريانى دامىتۋعا جاردەمدەسەتىن زاڭدى تۇلعا – كرەاتيۆتى يندۋستريالاردى دامىتۋ قورى بولادى.

قور قازاقستاننىڭ جەتەكشى شىعارماشىلىق جانە ءبىلىم بەرۋ ۇيىمدارىنىڭ قاتىسۋىمەن كورپوراتيۆتىك قور رەتىندە قۇرىلادى جانە نەگىزگى 4 باعىت بويىنشا جۇزەگە اسىرىلادى:

تالانتتاردى انىقتاۋ (كونكۋرستار, كرەاتوندار, ءموبيلدى پروديۋسەرلىك ورتالىقتار ۇيىمداستىرۋ, وڭىرلەردە تالانتتاردى ىزدەۋ).

جوبالاردى دامىتۋ (ستارتاپتاردى اكسەلەراتسيالاۋ جانە ينكۋباتسيالاۋ, كوممەرتسيالاندىرۋ, ينۆەستيتسيا تارتۋ).

ينفراقۇرىلىمدى دامىتۋ (حابتار جەلىسىن كەڭەيتۋ, تۇراقتى ارت-الاڭدار قۇرۋ, مەملەكەتتىك م ۇلىككە قول جەتكىزۋدى قامتاماسىز ەتۋ).

ەكسپورتقا قولداۋ كورسەتۋ (شەتەلدىك اۋديتورياعا شىعۋ, ماركەتينگ جانە PR, اۆتورلىق قۇقىقتى قورعاۋ).

«ەلىمىزدەگى كرەاتيۆتى يندۋستريالاردى دامىتۋ قورىنىڭ بيۋدجەتى ۇلتتىق لوتەرەيا وپەراتورى قىزمەتىنەن بولىنەتىن 3% اۋدارىم ەسەبىنەن قالىپتاستىرىلادى. قور قىزمەتىنىڭ ماڭىزدى باعىتتارىنىڭ ءبىرى – كرەاتيۆتى يندۋسترياداعى ۆەنچۋرلىق ينۆەستيتسيالاردى دامىتۋ. وسىعان بايلانىستى احقو بازاسىندا باسقارۋشى كومپانيالاردىڭ پۋلىن تارتا وتىرىپ, جەدەل جانە قايتارىمدى نەگىزدە اقشالاي قاراجاتتى ءتيىمدى ورنالاستىرۋعا مۇمكىندىك بەرەتىن ۆەنچۋرلىق بولىمشە قۇرىلاتىن بولادى», دەپ تولىقتىردى ايدا بالاەۆا.

وبلىستار مەن ەلىمىزدىڭ ءىرى قالالارىندا كرەتيۆتى ورتالىقتار اشىلادى

ايدا بالاەۆا ۇكىمەت وتىرىسىندا ەل وڭىرلەرىندە كرەاتيۆتى حابتاردى دامىتۋ جونىندەگى جۇمىس تۋرالى دا باياندادى.

ول جەرگىلىكتى اتقارۋشى ورگاندارعا كرەاتيۆتى يندۋستريانى دامىتۋ بويىنشا زاڭنامالىق قۇزىرەت بەرىلگەنىن اتاپ ءوتتى. بۇل نورما ەل وڭىرلەرىندە كرەاتيۆتى حابتار قۇرۋ جانە دامىتۋ ماقساتىندا قابىلداندى.

«بۇگىنگى تاڭدا رەسپۋبليكا بويىنشا 12 كرەاتيۆتى حاب اشىلدى. الايدا, اقمولا, الماتى, جەتىسۋ, ۇلىتاۋ, جامبىل, قاراعاندى, قوستاناي جانە پاۆلودار وبلىستارىندا بۇل جۇمىس ءالى اياقتالعان جوق. كرەاتيۆتى حابتار – وڭىرلەردەگى كرەاتيۆتى يندۋستريانى دامىتۋدىڭ نەگىزگى ينفراقۇرىلىمى بولۋعا ءتيىس. ولار وڭىرلىك ەكوجۇيەنىڭ ورتالىعىنا اينالىپ, تالانتتاردى تارتۋ جانە ولارمەن جۇمىس ىستەۋ بويىنشا ماڭىزدى ءرول اتقارادى», دەپ اتاپ ءوتتى ايدا بالاەۆا.