قاراعاندىداعى بىرلىكتىڭ شاڭىراعىنا اينالعان دوستىق ۇيىندە قازاقستان حالقى اسسامبلەياسىنىڭ 30 جىلدىعىنا وراي «ادامگەرشىلىك – اسىل قاسيەت» اتتى فورۋم ءوتتى. جيىنعا قحا مۇشەلەرى, ەتنومادەني بىرلەستىك وكىلدەرى, قوعام قايراتكەرلەرى, ارداگەرلەر مەن قوعام بەلسەندىلەرى قاتىستى. ءوڭىردىڭ باسقا دا قالا, اۋدانىنان وكىلدەر ونلاين قوسىلدى.
فورۋمدا «قازاقستان حالقى اسسامبلەياسىنا 30 جىل» ەسكەرتكىش تاقتاسى سالتاناتتى تۇردە اشىلدى. قحا-نىڭ وڭىردەگى توراعاسى, ايماق باسشىسى ەرماعانبەت بولەكپاەۆ مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ, فورۋمعا قاتىسۋشى قاۋىمدى مەرەيلى مەرەكەمەن قۇتتىقتادى.
– ءبىز العاشقىلاردىڭ ءبىرى بولىپ قازاقستان حالقى اسسامبلەياسىنىڭ 30 جىلدىعىن مەرەكەلەۋدى باستادىق. اسسامبلەيا قۇرىلعان جىلدارىندا ءبىزدىڭ قوعامىمىزدىڭ ماڭىزدى بۋىنىنا اينالدى. بۇل ءوزارا قۇرمەتكە, ىنتىماقتاستىققا جانە قولداۋعا تولى جول بولدى. جاقىندا عانا وتكەن «اقساقالدار كەڭەسى» رەسپۋبليكالىق فورۋمىنىڭ قوعامدىق جانە ازاماتتىق سەكتور تاراپىنان جوعارى باعالاندى. تۇعىرلى تاتۋلىعىمىز بەن ىرىستى ىنتىماعىمىزدى جاڭا بەلەسكە جەتەلەيتىن, بىرلىگىمىزدى بەكەمدەيتىن مۇنداي ماڭىزى بار ءىس-شارالاردى ءجيى وتكىزۋىمىز قاجەت, – دەدى ە.بولەكپاەۆ.
بۇعان قوسا ءوڭىر باسشىسى وبلىستاعى ەتنومادەني بىرلەستىكتەردىڭ قازاقستان حالقى اسسامبلەياسىنىڭ 30 جىلدىعىنا ارنايى ۇيىمداستىرعان «بىرلىكپەن گۇلدەنگەن سارىارقا» كورمەسىن بارلىق قالا, اۋداندى ارالاپ, كوشپەلى ەتىپ ۇيىمداستىرۋدى تاپسىردى.
القالى جيىندا اسسامبلەيا مۇشەلەرى «قايىرىمدىلىق كەرۋەنى» اتتى اكتسياسىنىڭ باستاۋ العانىن مالىمدەدى. يگىلىكتى شارۋا بىردەن قولداۋ تاپتى. وبلىستاعى تۇگەلگە جۋىق ەتنومادەني بىرلەستىك وكىلدەرى مۇنى جىلى قابىلدادى. ماسەلەن, بالقاش قالاسىنىڭ انالار كەڭەسىنىڭ توراعاسى الميرا مۋسينا «قايىرىمدىلىق كەرۋەنى» اكتسياسى اياسىندا كەڭەس وكىلدەرىمەن قالاداعى پەرزەنتحانا بارىپ, العىس ايتۋ كۇنى تۋعان بالالاردى قۇتتىقتاپ, سىيلىق تابىستاپ شىققاندارىن ايتتى. قاراعاندى وبلىسىنىڭ كورەي ەتنومادەني بىرلەستىگىنىڭ ءتورايىمى ليليا كيم دە قاراعاندى قۇرىلىس-تەحنيكالىق كوللەدجىنىڭ 4-كۋرس ستۋدەنتى مۇحامەتالى يسايىنعا الەم چەمپيوناتىندا باق سىناۋ ءۇشىن دەمەۋشىلىك كومەك كورسەتىلگەنىن جەتكىزدى. ء«ومىر تىنىسى» قوعامدىق بىرلەستىگى ترانسپلانتاتسيالانعان ناۋقاستاردىڭ توراعاسى جانىبەك ۋسپانوۆ دونورلارعا ادام ءومىرىن ساقتاۋعا قوسقان باعا جەتپەس ۇلەستەرى ءۇشىن العىس ءبىلدىردى. «ۆايناح» شەشەن-ينگۋش ەتنومادەني بىرلەستىگىنىڭ توراعاسى ۋۆايس دجاناەۆ ەتنومادەني بىرلەستىكتەر باسشىلارىنىڭ اتىنان قوناقجاي قۇرمەتى ءۇشىن قازاق حالقىنا العىس ايتتى.
سونىمەن قاتار فورۋمدا وبلىستىق قحا بەلسەندىلەرى وبلىس اكىمىنىڭ العىس حاتتارىمەن ماراپاتتالدى. «نامۋس» ازەربايجان ۇلتتىق-مادەني ورتالىعىنىڭ توراعاسى گيۋلاگا ۆەكيلوگلى رزاەۆ – ماراپاتتالعانداردىڭ ءبىرى. ول ازەربايجان حالقىنىڭ قيىن قىستاۋ كەزەڭى – كەڭەس تۇسىنداعى دەپورتاتسيانى ەسىنە سالىپ, باۋىرمال قازاق جۇرتىنا ريزاشىلىق ءبىلدىردى.
دوستىقتى تۋ ەتكەن جيىن ەتنومادەني بىرلەستىك وكىلدەرى مەن فورۋمعا قاتىسۋشىلاردىڭ تاۋەلسىزدىك ستەللاسىنا گۇل شوقتارىن قويۋ راسىمىمەن جالعاستى.
قاراعاندى وبلىسى