وڭىرىمىزدە العاش بولىپ اۋدان باسقارعان سالتانات ابەۋوۆا – سانالى عۇمىرىن مەملەكەتتىك قىزمەتكە ارناعان جان. الاش ارىستارىنىڭ التىن بەسىگى اقتوعاي ەلىنىڭ تىزگىنىن ۇزاق جىل ۇستاعان اكىم ايەل بۇگىندە وبلىستىق تىلدەردى دامىتۋ باسقارماسىنىڭ باسشىسى قىزمەتىن ابىرويمەن اتقارىپ وتىر.
ەڭبەك جولىن مەكتەپتە باستاعان س.مىراسىلقىزىندا مەملەكەتتىك قىزمەتكەر بولامىن دەگەن وي بولماعان. «بىلىكتى مۇعالىم اتانىپ, ءبىلىمدى شاكىرتتەر تاربيەلەسەم» دەگەن اسقاق ارمانى ونى 1980 جىلى الماتى شەت تىلدەر پەداگوگيكالىق ينستيتۋتىنا وقۋعا تۇسىرەدى. ىزدەنىس ۇستىندە جۇرگەن جۇدىرىقتاي قىز قوعامدىق جۇمىستىڭ دا بەل ورتاسىنان تابىلادى. ىسكەرلىك داعدىنى جوعارى وقۋ ورنىندا ءجۇرىپ دامىتقان ونىڭ بۇل قاسيەتى ومىرلىك تاجىريبەسىنە قاجەت ەدى. وقۋىن ۇزدىك تامامداعان سوڭ, «نەمىس, اعىلشىن ءتىلى پاندەرىنىڭ مۇعالىمى» ديپلومىمەن كالينين اتىنداعى سەگىز جىلدىق مەكتەپكە جۇمىسقا قابىلدانادى. كەيىندە اقتوعاي اۋداندىق ورىس ورتا مەكتەبىندە, قىزىلاراي اۋىلدىق مەكتەبىندە نەمىس تىلىنەن ساباق بەرەدى. ءسويتىپ, التى جىل تاقتا الدىندا تۇرىپ, اۋىل بالالارىنىڭ ساۋاتىن اشىپ, ءتىل ۇيرەتەدى. ۇستاز بولا ءجۇرىپ, كومسومول كوميتەتى تاپسىرعان قوعامدىق جۇمىستارعا بەلسەنە ارالاسادى. ۇيىمداستىرۋشىلىق قابىلەتىمەن كوزگە تۇسكەن جاستى اۋداندىق كومسومول كوميتەتىنىڭ ەكىنشى حاتشىسى قىزمەتىنە تاعايىندايدى. قىزمەتتە شىڭدالعان س.مىراسىلقىزى سەكىلدى تالاپتى كادر اۋداندىق پارتيا كوميتەتىنە دە كەرەك ەدى. ءسويتىپ, ونىڭ پارتيا كوميتەتىندەگى, اۋدان اكىمدىگىندەگى قىزمەتى ءساتتى باستالدى. ۇيىمداستىرۋ ءبولىمىنىڭ نۇسقاۋشىسى, حالىق دەپۋتاتتارى اۋداندىق كەڭەسى اپپاراتىنىڭ ساۋدا, تۇرمىستىق قىزمەت كورسەتۋ سالاسىنىڭ اعا مامانى سىندى قىزمەتتەر مەملەكەتتىك قىزمەتتەگى العاشقى باسپالداعى بولدى.
ودان كەيىن اۋدان اكىمدىگىنىڭ اعا رەفەرەنتى, جالپى ءبولىم مەڭگەرۋشىسى بولىپ جۇمىس ىستەپ, تاجىريبەسىن ودان ءارى جەتىلدىردى. اۋدان اكىمىنىڭ ورىنباسارى قىزمەتىندە ءجۇرىپ ءوڭىردىڭ الەۋمەتتىك, ەكونوميكالىق ماسەلەسىمەن ابدەن تانىس بولدى. كەيىن قاراعاندى وبلىسىنىڭ مادەنيەت, مۇراعاتتار جانە قۇجاتتامالار باسقارما باسشىسىنىڭ ورىنباسارلىعىنا شاقىرىلىپ, ايماقتىڭ رۋحاني دامۋىنا ەكى-ءۇش جىل ەڭبەك ءسىڭىردى.
كەيىن اقتوعاي اۋدانىنا قايتادان اكىم بولىپ اۋىسادى. ءوڭىردىڭ ءار ماسەلەسىن جەتىك بىلەتىن س.مىراسىلقىزى جاۋاپتى قىزمەتىنە بىلەك سىبانا كىرىسەدى. ءسويتىپ, وڭىردە تۇڭعىش اۋدان باسقارعان اكىم ايەل رەتىندە موينىنا ۇلكەن جۇك ارقالايدى. باسشىلىققا كەلگەن كۇننەن باستاپ اۋىلدى ساپالى اۋىزسۋمەن قامتۋ, ينتەرنەت تارتۋ, جول جوندەۋ سەكىلدى جۇمىستى جانداندىرادى. اۋداننىڭ الەۋمەتتىك ماسەلەسىن ۇنەمى نازارىندا ۇستايدى. ەسكىرگەن مادەنيەت وشاقتارى مەن اكىمدىك عيماراتتارىن كۇردەلى جوندەۋدەن وتكىزەدى.
«مەن وتكەن مەملەكەتتىك قىزمەتتەگى مەكتەپتىڭ ەڭبەك جولىما ۇلكەن اسەرى بار. الاش ارداقتىلارى شىققان توپىراقتا ەل باسقارۋ ءىسى, ارينە, وڭايعا سوقپادى. سىندارلى ساتتە ەل ازاماتتارىنىڭ قولداۋىن تەرەڭ سەزىندىم. «ۇلتقا قىزمەت ەتۋ – بىلىمنەن ەمەس, مىنەزدەن», دەيدى الاش ارىسى ءاليحان. وسى ءبىر ۇلاعاتتى ءسوز ومىرلىك قاعيداما اينالدى. ەڭبەگىمىزگە ەل باعا بەرە جاتار. حالىقتان ءادىل سىنشى جوق», دەيدى س.مىراسىلقىزىنىڭ ءوزى.
اكىم ايەل الاشتىڭ رۋحاني استاناسىنا اينالعان اسىل مەكەننىڭ مادەني دامۋىنا ايتارلىقتاي ۇلەسىن قوستى. قاجى اتانعان ءمىراسىل اكەسىنىڭ اقىلىمەن «اقسوراڭ» مەشىتىنىڭ بوي كوتەرۋىنە ىقپالىن تيگىزدى. اۋداننىڭ تورقالى توقسان جىلدىعىنا وراي «اقتوعاي اۋدانى» ەنتسيكلوپەدياسىنىڭ جارىققا شىعۋىنا مۇرىندىق بولدى. وسى توپىراقتان شىققان ەكىنشى دۇنيەجۇزىلىك سوعىس ارداگەرلەرىنە ارناپ مەموريالدى كەشەن ورناتىلدى. «باتىرلار» ساياباعىنا كەڭەس وداعىنىڭ باتىرى, ۇشقىش نۇركەن ءابدىروۆتىڭ ەسكەرتكىشى قويىلدى. ءان مەن جىردىڭ التىن بەسىگىنە اينالعان اقتوعايدىڭ كىرەبەرىسىنە «دومبىرا» مونۋمەنتىن سالعىزدى. مىنە, ىسكەر اكىم ايەلدىڭ سوڭىنان وسىنداي ىزگىلىكتى ءىز قالدى.
سالتانات مىراسىلقىزى بۇگىندە وبلىستىڭ تىلدەردى دامىتۋ باسقارماسىنا جەتەكشىلىك ەتىپ وتىر. مەملەكەتتىك ءتىلدىڭ مارتەبەسىن كوتەرۋ – ۇلتقا قىزمەت ەتۋدىڭ ەڭ ءبىر وزىق ۇلگىسى.
س.ابەۋوۆانىڭ مەملەكەتتىك قىزمەتتەگى قىرىق جىلدىق ەڭبەگى ەلەۋسىز ەمەس. ءتۇرلى مەرەكەلىك مەدالدار, قۇرمەت گراموتالارىمەن قوسا «ۇزدىك مەملەكەتتىك قىزمەتشى» اتتى مارتەبەلى ماراپاتتىڭ يەسى. «ەڭ بيىك قۇرمەت – ەلدىڭ شىنايى العىسى. ودان باعالى قۇرمەت جوق», دەيدى ءوزى.
قاراعاندى وبلىسى