بىلتىر 1 336 ملرد تەڭگەنىڭ قۇرىلىس ماتەريالى ءوندىرىلىپ, الدىڭعى جىلمەن سالىستىرعاندا (2023 جىلى 1 249 ملرد تەڭگە بولعان) 6,9%-عا ارتىق ءوسىم كورسەتكەن. نە ءوندىرىلدى دەگەنگە كەلسەك, ەسكەرتكىشتەرگە ارنالعان تاس ءوندىرىسى, مينەرالدى جانە شلاك ماقتا ءوندىرىسى, وتقا ءتوزىمدى ەمەس كەراميكالىق كىرپىش ءوندىرىسىنىڭ كولەمى ەسەلەپ ۇلعايعان.
«QazIndustry» جەڭىل ونەركاسىپ, اعاش وڭدەۋ, جيھاز ونەركاسىبىن جانە قۇرىلىس ماتەريالدارى ءوندىرىسىن دامىتۋ ديرەكتسياسىنىڭ حابارلاۋىنشا, سالاداعى ءوندىرىس كولەمىنىڭ ءوسۋى قۇرىلىس جۇمىسىنىڭ 18,5%-عا ارتۋىمەن بايلانىستى.
«بۇعان بەلگىلى دارەجەدە ينۆەستيتسيا دا ىقپال ەتتى. وتكەن جىلى تۇرعىن ءۇي قۇرىلىسىنا 3 542,5 ملرد تەڭگە ينۆەستيتسيا باعىتتالىپ, 2023 جىلمەن سالىستىرعاندا 14,7%-عا جوعارى بولعان. ءوندىرىستىڭ ەڭ ۇلكەن كولەمى استانا قالاسىنا (جالپى ءوندىرىستىڭ 13,5%-ى), قاراعاندى وبلىسىنا (9,3%), الماتى وبلىسىنا (9,1%) تيەسىلى بولدى», دەپ حابارلايدى «QazIndustry».
وندىرىلگەن قۇرىلىس ماتەريالدارىن وزگە ەلدەرگە ساتۋدان تۇسكەن تابىس كولەمى – 276,3 ملن دوللار. 2023 جىلمەن سالىستىرعاندا 11,8%-عا ءوسۋ بار. نەگىزىنەن شەت مەملەكەتتەرگە وتقا ءتوزىمدى تسەمەنت, پورتلاندتسەمەنت, ارماتۋرا, كەراميكالىق وقشاۋلاعىش بۇيىمدار, كەراميكالىق پليتكالار ەكسپورتقا شىعارىلادى.
يمپورتتىق كورسەتكىش تە ەكسپورتتان قالىسپاي ءوسىپ جاتىر. جىل بويىنا 1 300,2 ملن دوللاردىڭ تاۋارى ساتىپ الىنعان. 2023 جىلمەن سالىستىرعاندا سىرتتان ساتىپ الۋ 8,8%-عا كوبەيگەن. ەلىمىز اسىرەسە, سىرتقى نارىقتان كەلەتىن تسەمەنتتەن جاسالعان بۇيىمدارعا, شلاك پەن مينەرالدى سيليكاتتى ماقتاعا مۇقتاج.
قۇرىلىس سالاسىنداعى نەگىزگى كاپيتالعا سالىنعان ينۆەستيتسيا كولەمى – 180 ملرد تەڭگە. 2024 جىلى الماتى وبلىسىندا جىلۋ وقشاۋلاعىش ماتەريالدار شىعاراتىن «تەحنونيكول-كازاحستان» جشس زاۋىتى, جامبىل وبلىسىندا تسەمەنت وندىرەتىن «Korcem» جشس زاۋىتى, شىمكەنتتە كەراميكالىق پليتكالار شىعاراتىن «Wang Sheng Ceramic» جشس زاۋىتى, باسقا دا جوبالار ىسكە قوسىلدى. بۇل وتاندىق قۇرىلىس ماتەريالدارىنىڭ ءوندىرىسىن دامىتۋعا ەلەۋلى سەرپىلىس بەرەدى.