بىلتىردان بەرى اقش پەن ەۋروپالىق وداق ەلدەرى قىتايلىق ماركەتپلەيستەرگە, اتاپ ايتقاندا «Temu» مەن «Shein»-گە قارسى بەلسەندى تۇردە كۇرەس باستادى. اقش-تا بيىل 4 اقپاننان باستاپ باج سالىعى بويىنشا جاڭا ەرەجەلەر مەن شەكتەۋلەر – قىتايدان اكەلىنەتىن تاۋارلارعا 10% مولشەرىندە قوسىمشا سالىقتار ەنگىزىلدى. سونىمەن قاتار 800 دوللاردان ارزان تاۋارلاردى باجسىز اكەلۋگە مۇمكىندىك بەرەتىن «De minimis» جەڭىلدىگىنىڭ دە كۇشى جويىلدى. ساراپشىلاردىڭ ايتۋىنشا, بۇعان دەيىن «De minimis» مۇمكىندىگىنىڭ كۇشىمەن كەز كەلگەن تاريف پەن كەدەندىك تەكسەرۋدەن بوساتىلعان «Temu» مەن «Shein»-گە بۇل ۇلكەن سوققى بولدى.
2023 جىلعى ماۋسىمدا جاريالانعان اقش كونگرەسى كوميتەتىنىڭ مالىمەتى بويىنشا, «Temu» مەن «Shein» ۇلەسى «De minimis» قاعيداسىنا سايكەس اقش-قا كۇندەلىكتى جىبەرىلەتىن بارلىق جونەلتىلىمنىڭ جالپى سانىنىڭ 30%-دان استامىن قۇرادى. جاڭا ەرەجەلەر ەنگىزىلگەننەن كەيىن «Temu» ماركەتپلەيسى بىرقاتار شارا قابىلدادى: اقش-تاعى قويمالاردا تۇرعان تاۋارلاردى قولدانا باستادى, سونىمەن قاتار اقش-تاعى جەرگىلىكتى ساتۋشىلاردى تارتا باستادى (بۇلاي بۇرىن دا جاسالعان).
اقش-تا جاڭا تاريفتەر كۇشىنە ەنە باستاعان كەزدە (اقپاننىڭ العاشقى اپتاسىندا) «Shein»-ءنىڭ كۇندەلىكتى ساتىلىمى بىردەن 41%-عا تومەندەگەن. ال «Temu»-دىڭ كۇندەلىكتى ساتىلىمى 32%-عا ازايعان.
«De minimis» جەڭىلدىگىنىڭ كۇشى جويىلعاننان كەيىن بىردەن لوگيستيكالىق تىزبەكتەردە ەلەۋلى پروبلەما تۋىنداي باستادى. پوشتا قىزمەتتەرى بۇعان دايىن بولماعان ەدى. ميلليونداعان, ءتىپتى ميللياردتاعان تاۋارارالىق جونەلتۋ پۋنكتتەرىندە تۇرىپ قالدى. وسىدان كەيىن دونالد ترامپ اقش-تىڭ ساۋدا مينيسترلىگىنە بارلىق قيىندىقتار مەن نيۋانستاردى شەشۋگە مۇمكىندىك بەرىپ, باجسىز «De minimis» رەجىمىنىڭ كۇشىن جويۋدى ۋاقىتشا توقتاتتى. بۇل كۇرەستە اقش جالعىز ەمەس. ەۋروپالىق وداقتا بىرنەشە ايدان بەرى قىتايلىق ماركەتپلەيستەردەن اكەلىنەتىن تاۋارلاردىڭ ساپاسى, سونداي-اق ولاردىڭ كۇماندى قاۋىپسىزدىگى جونىندە ماسەلەلەر كوتەرىلىپ كەلەدى. ەندى كەدەندىك جارنالارعا قاتىستى ماسەلە دە بەلسەندى تۇردە قاراستىرىلىپ جاتىر», دەپ جازادى «Ranking».
بۇدان بىلاي ەۋروپالىق كوميسسيا ەو-عا مۇشە 27 مەملەكەتتىڭ ۇلتتىق كەدەن ورگاندارىمەن بىرلەسىپ, نارىقتى قاداعالاۋ مەن تەستىلەۋدى كۇشەيتپەك. ءسويتىپ, ينتەرنەتتە ساتىلاتىن قاۋىپتى ونىمدەر ماسەلەسىن شەشۋگە نازار اۋدارماق. كوميسسيا ونلاين ساتىپ الىناتىن ارزان تاۋارلار سانىنىڭ ءوسۋى كەدەن ورگاندارىنا قىسىمدى كۇشەيتەتىنىن ايتىپ, ەو زاڭ شىعارۋشىلارىن – ەۋروپارلامەنت مۇشەلەرى مەن قاتىسۋشى مەملەكەتتەردى قۇنى 150 ەۋرودان تومەن يمپورتتى باج سالىعىنان بوساتۋدىڭ كۇشىن جويۋعا شاقىردى. سونداي-اق ەو-عا جىل سايىن اكەلىنەتىن ميللياردتاعان ارزان ونىمدەردىڭ كوپشىلىگى وداق زاڭدارىنا سايكەس كەلمەيتىنى, ال ەرەجەلەردى ساقتايتىن ەۋروپالىق كومپانيالار قاۋىپتى نەمەسە جالعان ونىمدەردى ساتاتىن باسەكەلەستەرىنەن جەڭىلىپ جاتقانى تاعى دا اتاپ ءوتىلدى.
بىلتىر ەۋرووداق ەلدەرىنە كەلىپ تۇسكەن قۇنى 150 ەۋرودان اسپايتىن سالەمدەمەلەردىڭ 91%-دان استامى قىتايدان كەلگەن جانە ولاردىڭ نەگىزگى ۇلەسى «Temu» مەن «Shein»-گە تيەسىلى.
ءبىزدىڭ ەلدە دە «Temu» مەن «Pinduoduo» تاۋارلارىنا سۇرانىس وتە جوعارى. ساراپشىلاردىڭ باعالاۋىنشا, مۇنداي ماركەتپلەيستەر وتاندىق شاعىن جانە ورتا بيزنەس كەلەشەگىنە قاۋىپ توندىرەدى. بىرىنشىدەن, ولاردىڭ باعاسى قولجەتىمدى, تەز جەتكىزىلەدى, ونىمەن قوسا ءبىزدىڭ ەلدە تىركەلمەگەن, سول سەبەپتى ەشقانداي سالىق تا, باج دا تولەمەيدى.
دەگەنمەن ۇكىمەت مۇنداي كومپانيالاردىڭ جۇمىسىن رەتتەۋگە تىرىسىپ جاتىر. بيىل اقپاندا «Temu», «Pinduoduo», «Alibaba Group» كومپانيالارىن قوسا العاندا, 101 ونلاين ساۋدا پلاتفورماسى سالىق ەسەبىنە قويىلىپتى. الايدا بىزدە باجسىز اكەلۋ شەگى بار بولعاندىقتان ولار كەدەندىك باجدى تولەمەۋگە قۇقىلى. قازىر ونىڭ شەگى – 500 ەۋرو جانە (نەمەسە) 25 كيلودان اسپايتىن سالماقتى قۇرايدى. بۇل ارينە, ءالى دە بولسا وتاندىق بيزنەستى شەتەلدىك ماركەتپلەيستەر الدىندا وسال ەتە تۇسەدى. ال باتىس تاجىريبەسىن ەنگىزەمىز بە, جوق پا, ول ۋاقىت ەنشىسىندەگى ماسەلە.