قارجىلىق ساۋاتتىلىقتىڭ تومەندىگى سالدارىنان ازاماتتارىمىز الاياقتاردىڭ قۇرىعىنا ءجيى ىلىنەتىن بولدى. كۇماندى كۋرستاردان اۋلاق بولىڭىزدار دەپ قانشا ايتسا دا, كوپشىلىك ەن بايلىقتىڭ ۇستىنەن توپ ەتە تۇسكەندى ءالى دە قولاي كورەتىن سىڭايلى. تالدىقورعاندا مەملەكەتتىك ساتىپ الۋ كۋرسىنا قاتىستى شۋلى ءىس سوڭىنا جەتتى. سوت ءىستى تەندەر ارقىلى قوماقتى اقشا تابۋدى ۇيرەنەمىن دەپ, قارجىسىنان ايرىلعان تۇتىنۋشىلاردىڭ پايداسىنا شەشتى.
جۇلدىز ءىدىرىسوۆا ەسىمدى ازامات جەتىسۋ وبلىسى ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتىنە ساپاسىز كۋرسقا قاتىستى شاعىم تۇسىرگەن. ماسەلەمەن تانىسقان دەپارتامەنت ماماندارى وتكەن جىلى بۇل تۋرالى الەۋمەتتىك جەلىلەردە حابارلاپ, ازاماتتاردى قابىلداۋ وتكىزدى. ارتىنشا تاعى دا وسى كوۋچتىڭ جۇمىسىنا شاعىمدانعان 8 ازاماتتىڭ شاعىمىن قابىلدادى.
دەپارتامەنت جۇرگىزگەن جۇمىس ناتيجەسىندە كاسىپكەر كوۋچتىڭ سالىق كودەكسىن ەلەمەي, رەسمي كەلىسىمشارت جاساسپاعانى, تولەم كەزىندە فيسكالدى چەك بەرمەگەنى بەلگىلى بولدى. كوۋچ ۋادە ەتىلگەن 1 ايلىق كۋرستىڭ 3-4 ءدارىسىن وتكىزىپ, وقۋ ۇدەرىسىن توقتاتقان. بۇل «تۇتىنۋشىلاردىڭ قۇقىعىن قورعاۋ» زاڭىنىڭ 13-بابىن ورەسكەل بۇزۋ بولىپ سانالدى. سالدارىنان ازاماتتار وقۋدان دا, قارجىدان دا قاعىلعان. وقۋشىلار اراسىندا تەندەردەن تەز اقشا تابۋعا ۇمىتتەنىپ, نەسيە راسىمدەگەندەر دە بار.
«دەپارتامەنت تۇتىنۋشىلارعا كاسىپكەر اتىنا سوتقا دەيىنگى تالاپ جولداۋدا قۇقىقتىق كومەك كورسەتتى. وعان كاسىپكەر 10 جۇمىس كۇنى ىشىندە جاۋاپ بەرۋگە مىندەتتى. الايدا كاسىپكەر جاۋاپ بەرمەي, دەپارتامەنت جەكە كاسىپكەرگە قاتىستى جوسپاردان تىس تەكسەرىس اشتى», دەدى دەپارتامەنت باسشىسى ايدوس داۋەشوۆ.
تەكسەرىس بارىسىندا ساپاسىز قىزمەتتەن زارداپ شەككەندەردىڭ سانى 18 ادامعا دەيىن ارتىپ, جەتىسۋ وبلىسىنىڭ تۇرعىندارىنان بولەك الماتى, قوستاناي وبلىستارى مەن استانا قالاسىنىڭ تۇتىنۋشىلارى دا شاعىمداندى. ناتيجەسىندە, جالپى شىعىن كولەمى 6 593 000 تەڭگەگە دەيىن ۇلعايدى. دەپارتامەنت 10-نان استام تۇتىنۋشىنىڭ زاڭدى مۇددەسىن قورعاۋ ماقساتىندا تالدىقورعان قالاسى سوتىنا تالاپ-ارىز جولدادى. سوت ۇدەرىسى بارىسىندا كاسىپكەر كوۋچ ءۇش تۇتىنۋشىعا 850 000 تەڭگەدەن تولىق كولەمدە, ەكى تۇتىنۋشىعا 450 000 تەڭگەدەن ءبولىپ تولەدى. الايدا سوت تالاپتاردى تولىق كولەمدە قاناعاتتاندىرۋ تۋرالى شەشىم قابىلداپ, بارلىق قاتىسۋشىنىڭ مۇددەسىن قورعادى.
ساۋدا مينيسترلىگىنە قاراستى تۇتىنۋشىلار قۇقىعىن قورعاۋ كوميتەتىنە بىلتىر ءبىلىم سالاسىنداعى قىزمەتتەرگە قاتىستى 877 شاعىم تۇسكەن. نەگىزىنەن تۇتىنۋشىلار ساپاسىز كۋرستار, وقىتۋشىلاردىڭ تومەن بىلىكتىلىگى, وقۋ كۋرستارىنا اقشا قايتارۋدان باس تارتۋ ماسەلەلەرىنە وراي شاعىمدانعان. تۇتىنۋشىلاردىڭ قۇقىعىن قورعاۋ كوميتەتى مۇنداي «جىلدام بايۋ» كۋرستارى شىعىنعا اكەلەتىنىن ەسكەرتەدى. سوندىقتان ساراپشى ترەنەرلەر تۋرالى اقپاراتتى مۇقيات تەكسەرۋ, مىندەتتى تۇردە رەسمي كەلىسىمشارت جاساسۋ جانە فيسكالدى چەك تالاپ ەتۋ قاجەت. كۇماندى جاعدايلاردا قۇقىقتارىڭىزدى قورعاۋ ءۇشىن ۋاكىلەتتى ورگاندارعا جۇگىنۋگە بولادى.