2025 جىلعى 17 اقپاندا ۇلىتاۋ وبلىسى جاڭاارقا اۋدانىنداعى «قازاقمىس كورپوراتسياسى» جشس-نىڭ «جومارت» كەنىشىندە قايعىلى وقيعا ورىن الدى. شاحتادا 640 مەتر تەرەڭدىكتە تاۋ جىنىسى وپىرىلىپ, جەتى جۇمىسشى ءۇيىندى استىندا قالدى, دەپ جازادى Egemen.kz.
كابەلدەردىڭ ۇزىلۋىنە بايلانىستى ولارمەن بايلانىس ورناتۋ مۇمكىن بولمادى.
قۇتقارۋ جۇمىستارىنا «اسس سەرىكتەس» جشس قۇتقارۋشىلارى, ۇلىتاۋ جانە قاراعاندى وبلىستارىنىڭ توتەنشە جاعدايلار دەپارتامەنتتەرىنىڭ ماماندارى, كينولوگيالىق توپتار, اپاتتار مەديتسيناسى ورتالىعىنىڭ قىزمەتكەرلەرى مەن پسيحولوگتار جۇمىلدىرىلدى. وكىنىشكە قاراي, ىزدەستىرۋ-قۇتقارۋ جۇمىستارى بارىسىندا بارلىق جەتى جۇمىسشىنىڭ دەنەسى تابىلدى. ولاردىڭ جەكە باسىن انىقتاۋ جۇمىستارى جۇرگىزىلۋدە.
وقيعانىڭ سەبەپتەرىن انىقتاۋ جانە زارداپ شەككەندەرگە كومەك كورسەتۋ ماقساتىندا پرەمەر-مينيستر ولجاس بەكتەنوۆتىڭ تاپسىرماسىمەن ارنايى ۇكىمەتتىك كوميسسيا قۇرىلدى. كوميسسيانى پرەمەر-ءمينيستردىڭ ورىنباسارى قانات بوزىمباەۆ باسقارادى. قازىرگى ۋاقىتتا وقيعانىڭ ءمان-جايىن انىقتاۋ ءۇشىن تەرگەۋ امالدارى جۇرگىزىلۋدە.
بۇل قايعىلى وقيعا كەنشىلەردىڭ قاۋىپتى ەڭبەك جاعدايلارىن تاعى دا ەسكە سالىپ, وندىرىستىك قاۋىپسىزدىك شارالارىن كۇشەيتۋ قاجەتتىگىن كورسەتەدى.