شۆەتسيانىڭ ورتالىعىنداعى ەرەبرۋ قالاسىنداعى بالالار مەكتەبىنىڭ جانىنداعى ەرەسەكتەرگە ارنالعان ءبىلىم بەرۋ ورتالىعىندا ادامدارعا وق جاۋدىرعان ەر ادام قازا تاپتى, دەپ حابارلايدى Egemen.kz BBC اقپاراتتىق اگەنتتىگىنە سىلتەمە جاساپ.
قالالىق پوليتسيا باسشىسى روبەرتو ەيد فورەست وقيعا سالدارىنان «شامامەن 10 ادامنىڭ» مەرت بولعانىن, ونىڭ ىشىندە وق جاۋدىرعان ەر ادامنىڭ دا قازا تاپقانىن راستادى.
قىلمىسكەر تۋرالى بەلگىلى اقپارات – ول پوليتسياعا بۇرىن تانىس ەمەس جانە ەشقانداي ۇيىمداسقان قىلمىستىق توپقا قاتىسى بولماعان. پوليتسيا شابۋىلدى ازىرگە لاڭكەستىك ارەكەتپەن دە بايلانىستىرىپ وتىرعان جوق.
«قازا تاپقانداردىڭ ءبىرى قازىر باستى كۇدىكتى سانالىپ وتىر. ول بۇرىن پوليتسياعا بەلگىسىز بولىپ كەلگەن جانە بۇل وقيعا نەلىكتەن بولعانىن ءالى كۇنگە دەيىن بىلمەيمىز», دەيدى شۆەتسيانىڭ ادىلەت مينيسترى گۋننار ستروممەر.
بيلىك قالا تۇرعىندارىن بۇدان ءارى شابۋىلدى كۇتۋگە نەگىز جوقتىعىنا, سوندىقتان ەرتەڭ تاڭەرتەڭ بالالاردى ەش قورىقپاستان مەكتەپكە ادەتتەگىدەي جىبەرۋگە بولاتىنىنا سەندىردى.